بۇل شارا قازاقستان حالقى اسسامبلەياسىنىڭ بيىلدان باستاپ قولعا العان « ۇلى دالا داستۇرلەرىنە» نەگىزدەلگەن قايىرىمدىلىق اياسىندا ۇيىمداستىرىلعان. باتىس قازاقستان وبلىسى قحا «قوعامدىق كەلىسىم» كمم باسشىسى مەدحات قامبەتوۆتىڭ ايتۋىنشا, اسسامبلەيا بيىل قازاق حالقىنىڭ يگى داستۇرلەرى نەگىزىندە «سارقىت», «سىباعا», «شاشۋ», «اسار», «قامقور», «توقىمقاعار», «ەرۋلىك», «جىلۋ», «كورىمدىك», «باتا», «بەس جاقسى», «كادە» اتاۋلارىمەن جىل سوڭىنا دەيىن قايىرىمدىلىق شارالارىن وتكىزەدى.
- ءبىزدىڭ باستامامىزعا قالاداعى بىرنەشە مەيرامحانا ءۇن قوسىپ, قولداۋ ءبىلدىردى. قازىر قىستىڭ كەزى, ءتۇن سۋىق. بۇل جەردە بەلگىلى تۇراعى جوق جانداردىڭ باسساۋعالاپ, قونىپ كەتۋىنە جاعداي جاسالعان. تاعدىر تالكەگىنە تۇسكەن بۇل كىسىلەرگە بارىنشا كومەك كورسەتۋ, جاناشىر بولۋ – حالقىمىزدىڭ ەجەلدەن كەلە جاتقان قايىرىمدىلىق ءداستۇرى عوي, - دەيدى بقو قحا «قوعامدىق كەلىسىم» كمم باسشىسى مەدحات قامبەتوۆ.
اكتسيانىڭ اتاۋى دا «سارقىت» دەپ وتە ءساتتى قويىلىپتى. مەيرامحانا كوبىنەسە ۇلان-اسىر توي-دۋمان وتەتىن جەر بولسا, وسى تويدان مۇقتاج جاندارعا سارقىت تاراتۋ – عاسىرلاردان كەلە جاتقان قازاقى ءداستۇردىڭ زاماناۋي كورىنىسى سەكىلدى.
- ءبىزدىڭ الەۋمەتتىك بەيىمدەۋ ورتالىعىنىڭ تۇراقتى بولىمىندە قازىر 60 ادام تۇرىپ جاتىر. ولارعا زاڭگەرلىك, دارىگەرلىك جانە پسيحولوگيالىق كومەك كورسەتۋ, قۇجاتتارىن رەتتەۋ, زەينەتاقى تاعايىنداۋ, جۇمىسقا ورنالاستىرۋ ماسەلەلەرىمەن اينالىسامىز. بۇعان قوسا 40 ادامعا ارنالعان تۇنەمەلىك ورىنعا كۇن سايىن كەشكى 18.00.-دەن تاڭعى 10.00.-عا دەيىن قونىپ كەتۋ ءۇشىن قالاداعى قاڭعىباس-كەزبەلەر جينالادى. «سارقىت» وسى توپقا ارنالعان, - دەيدى ورتالىقتىڭ ءبولىم باسشىسى نۇرحات جايلاۋوۆ.
قازبەك قۇتتىمۇرات ۇلى,
«Egemen Qazaqstan»
باتىس قازاقستان
