مادەنيەت سالاسىنداعى مەملەكەتتىك ستيپەنديا جىل سايىن قۇرمەتتى اتاقتار مەن مەملەكەتتىك ناگرادالارعا يە بولعان شىعارماشىلىق مايتالماندارىن, مادەنيەت قايراتكەرلەرىن, سونداي-اق قازاقستان رۋحانياتىن قالىپتاستىرۋعا, ساقتاۋعا جانە دامىتۋعا قوسقان ۇلەسى ءۇشىن ايىرىقشا دارىندى جاستاردى مەملەكەتتىك تۇرعىدا قولداۋ ماقساتىندا بەرىلىپ كەلەدى. دوستىق ءۇيىنىڭ دوڭگەلەك ۇستەلى باسىنداعى سالتاناتتى جيىندى مادەنيەت جانە سپورت ءمينيسترى ارىستانبەك مۇحامەدي ۇلى اشىپ, ءسوز كەزەگىن گ.ابدىقالىقوۆاعا ۇسىندى. مەملەكەتتىك حاتشى قازاقستاننىڭ تۇڭعىش پرەزيدەنتى – ەلباسىنىڭ مادەنيەت سالاسىنداعى مەملەكەتتىك ستيپەندياسى يەگەرلەرىن قۇتتىقتاپ, 2018 جىلعى ستيپەندياعا يە بولعانداردىڭ كورسەتكىشىمەن تانىستىردى. اتاپ ايتقاندا, 20 مەن 35 ارالىعىنداعى جاستار – 0,4 پايىز, 35 پەن 50 ىشىندەگى ورتا بۋىن – 0,5 پايىز, 55-75 اراسىنداعى كەمەلىنە كەلگەن تولقىن – 18,6, ال 75-تەن اسقان اعا بۋىن وكىلدەرى – 61 پايىزدى قۇراپ وتىر.
«وتكەن جىل ەلىمىز ءۇشىن ەرەكشە كەزەڭ بولدى. ەلىمىزدە ءۇشىنشى جاڭعىرۋ ۇدەرىستەرى جالعاسىن تاپتى. ەكونوميكالىق وزگەرىستەر, ساياسي رەفورمالار جانە رۋحاني جاڭعىرۋ دامۋدىڭ باستى باعىتتارى رەتىندە ىلگەرىلەي ءتۇستى. تاۋەلسىز قازاقستاننىڭ سيمۆولى جانە جارقىن جەتىستىگى استانانىڭ 20 جىلدىعى اتاپ ءوتىلدى. باس قالامىزدىڭ مەرەيتويى اياسىندا بارلىق وڭىردە 5300-دەن استام مادەني-كوپشىلىك, سپورتتىق, قايىرىمدىلىق جانە وزگە دە ءىس-شارالار وتكىزىلدى. ءار وڭىردەگى ولاردىڭ ورتاشا سانى 400-دەن استى. بۇگىندە ەلوردامىز ساياسي, ەكونوميكالىق, مادەني جانە عىلىمي ورتالىق رەتىندە الەمگە تانىمال» دەدى گ.ابدىقالىقوۆا.
مەملەكەتتىك حاتشى بىلتىرعى جىلى ونەر مەن مادەنيەتتەن كورىنىس تاپقان ەلەۋلى جەتىستىكتەردى تياناقتى اتاپ ءوتتى جانە بۇگىنگى تاڭدا ەلدە جاسالىپ جاتقان «رۋحاني جاڭعىرۋ» جوباسىنىڭ دامۋعا جول اشاتىن ماڭىزدى تەتىكتەرىنە جان-جاقتى توقتالدى. ەلباسى جارلىعىمەن لاتىن گرافيكاسىنا نەگىزدەلگەن قازاق ءتىلى ءالىپبيى بەكىتىلدى. ۇكىمەت جانىنداعى ارناۋلى وقۋ كوميسسياسىنىڭ قازاق ءالىپبيىن 2025 جىلعا دەيىن قوعامدىق ءومىردىڭ بارلىق سالاسىنا كەزەڭ-كەزەڭىمەن قولدانۋ جونىندە جۇيەلى جۇمىس جۇرگىزىپ وتىر. قوعامدىق ءومىردىڭ ءتۇرلى سالالارىندا جوعارعى جەتىستىككە جەتكەن قازاقستاننىڭ 100 جاڭا تۇلعاسىنىڭ تاڭدالىپ الىنعانىن, جۇزەگە اسىرىلىپ جاتقان ءار ءتۇرلى مەملەكەتتىك جوبالار نەگىزىندە الداعى ۋاقىتتا تاعى دا تۇلعالاردىڭ دارالانىپ شىعاتىنى ەلدىڭ رۋحاني كاپيتالى مەن الەۋەتىن ودان ارى ارتتىرا تۇسپەك. «رۋحاني جاڭعىرۋ» باعدارلاماسىنىڭ «تۋعان جەر» جوباسى اياسىندا دا ءار وڭىردە دەمەۋشىلەر ەسەبىنەن 300-دەن استام الەۋمەتتىك نىساندار سالىنعان. 200-گە جۋىق الەۋمەتتىك ينفراقۇرىلىم نىسانى قايتا جوندەۋدەن وتكىزىلگەن. ولكەتانۋ جۇمىسىن كەڭ قامتيتىن بۇل جوبا ءالى دە جالعاسىن تابا بەرمەك.
گ.ابدىقالىقوۆا «جاھانداعى زاماناۋي قازاقستاندىق مادەنيەت» جوباسى شەڭبەرىندە ادەبيەت, تەاتر, كينو, ءداستۇرلى, كلاسسيكالىق مۋزىكا, بەينەلەۋ ونەرى سىندى ءتورت باعىت بويىنشا بىرقاتار جۇمىستاردىڭ تولاسسىز اتقارىلىپ كەلە جاتقانىن جەتكىزدى. مىسالى, ادەبيەت باعىتى بويىنشا تاجىريبەسى بار, وزىق شەتەلدىك ستراتەگيالىق سەرىكتەستەردى تارتا وتىرىپ, «قازىرگى زامانعى قازاقستاندىق پروزا», «قازىرگى زامانعى قازاقستاندىق پوەزيا» انتولوگيالارى بۇۇ-نىڭ رەسمي التى تىلىنە ساپالى اۋدارىلىپ, دۇنيەجۇزى وقىرمانىنا جول تارتاتىنى – رۋحانيات سالاسىنداعى ءىرى جەتىستىك. «قازاقستاننىڭ كيەلى گەوگرافياسى» جوباسى شەڭبەرىندە دە 185 ماكرو كيەلى نىساننىڭ, 456 ميكرو كيەلى نىساننىڭ تىزىمگە ەنۋى مادەنيەت پەن عىلىمنىڭ ماڭىزدى ىستەرىن تۇگەندەۋدەگى يگى قادام.
ستيپەندياعا يە بولعاندار قاتارىندا ءاسانالى ءاشىموۆ, ءسابيت ورازباەۆ, نۇكەتاي مىشپاەۆا, تورعىن تاسىبەكوۆا, بايان يماشەۆا, ەسمۇحان وباەۆ, چاپاي زۇلقاشەۆ, قابدەش ءجۇمادىلوۆ يران-عايىپ ورازباەۆ, مىڭباي ءراش, نۇرتاس يساباەۆ, ەسكەندىر حاسانعاليەۆ, سارا تىنىشتىعۇلوۆا, گۇلۆيرا رازيەۆا, اسحات ماەميروۆ, ارمان جۇدەباەۆ, ەركەبۇلان دايىروۆ, ايان وتەپبەرگەن جانە وزگە دە مايتالماندار مەن جاس دارىندار بار.
ءداستۇرلى وتەتىن باسقوسۋ بارىسىندا مەملەكەتتىك حاتشى رۋحانياتتىڭ كوشىن العا سۇيرەپ كەلە جاتقان اعا بۋىن مەن جاستاردىڭ لەبىزىن, ۇسىنىس-تىلەكتەرىن تىڭداپ, ولاردىڭ قازاقستان مادەنيەتىن ودان ارى دامىتۋعا ۇلەس قوسا بەرەتىنىنە سەنىم ءبىلدىردى.
ايگۇل احانبايقىزى,
«ەگەمەن قازاقستان»
الماتى
