ستۋدەنتتىك ۇيىمداردىڭ كوشباسشىلارى مەن جاس عالىمداردى, كاسىپكەرلەر مەن ەرىكتىلەردى ءبىر الاڭدا جيناعان ايتۋلى فورۋمعا قازۇۋ-دىڭ 2 مىڭعا تارتا بەلسەندى شاكىرت قاتىستى. ولار جاستار جىلىندا ەلىمىزدىڭ عىلىم سالاسىن دامىتۋعا ناقتى ىستەرىمەن ۇلەس قوسۋدى كوزدەيتىندەرىن ايتادى. ەلباسى ايتقان بارلىق نەگىزگى باعىتتاردى جولعا قويۋ ءۇشىن ۋاقىتتى ءتيىمدى پايدالانۋ, تالماي ەڭبەكتەنۋ, عىلىم مەن يننوۆاتسياعا دەن قويۋ ەل ەرتەڭى سانالاتىن جاڭا بۋىننىڭ باستى ۇستانىمى بولۋعا ءتيىس دەپ ەسەپتەيدى. تالقىلاۋدىڭ باستى باعىتى ءبىلىم ەكونوميكاسىن قۇرۋعا جاستاردى قاتىستىرۋ جولدارىن تابۋعا ارنالدى.
فورۋمدى اشقان ءال-فارابي اتىنداعى قازۇۋ رەكتورى عالىمقايىر مۇتانوۆ: «تاۋەلسىزدىك جىلدارىندا قازاقستاندا جاڭا فورماتسيانىڭ جاس تولقىنى ءوستى. ەل پرەزيدەنتى مەن مەملەكەت ونىڭ قالىپتاسۋىنا جانە دامۋىنا كوپ ۇلەس قوستى. مەملەكەت تاۋەلسىزدىگىن نىعايتۋدىڭ جاۋاپكەرشىلىگى مەن ينتەللەكتۋالدى ۇلت قالىپتاستىرۋ جانە الەمدىك دەڭگەيدە ۇلتىمىزدىڭ باسەكەگە قابىلەتتىلىگىن ارتتىرۋدا جاستارعا اسا زور جاۋاپكەرشىلىك پەن ۇلكەن ءۇمىت جۇكتەلەدى», – دەيدى.
جاس زياتكەرلەر وزدەرىنە جۇكتەلگەن مىندەتتەردى ورىنداۋعا قانداي ۇلەس قوسا الاتىندارى جايلى ءوز ويلارىن ورتاعا سالدى. سونداي-اق ولار 4.0 يندۋسترياسىن قۇرۋعا باعىتتالعان جەكە يدەيالارى مەن يننوۆاتسيالىق جوبالارىن ۇسىنىپ, ستارتاپتاردى ىسكە اسىرۋ تاجىريبەلەرىمەن ءبولىستى.
قازۇۋ-لىق تالىمگەرلەر فورۋم جۇمىسىنىڭ قورىتىندىسى رەتىندە «جاستاردىڭ شىعارماشىلىعى مەن كۇش جىگەرى – ەلدىڭ يننوۆاتسيالىق دامۋى ءۇشىن» ۇلتتىق جاستار قوزعالىسىن قۇرىپ, تۇتاس ەل جاستارىن وسى باستاماعا ءۇن قوسۋعا شاقىردى. ولار زامانداستارىن بويداعى ءبىلىمى مەن قابىلەتىن, كرەاتيۆتى يدەيالارىن, ەلگە پايداسى تيەتىن تىڭ جوبالاردى جۇزەگە اسىرۋ جولىنا جۇمساۋعا شاقىردى.
«قازاقستان جاستار جىلىنا اياق باستى, بۇل – ەلباسىنىڭ ەل بولاشاعى جاس ۇرپاققا دەگەن ۇلكەن ءارى ەرەكشە قامقورلىعىنىڭ كورىنىسى. مەملەكەت ءبىز ءۇشىن ءبىر نارسە جاساپ بەرەدى دەپ كۇتىپ وتىرۋدىڭ ەش قاجەتى جوق. «مەن ەلىم ءۇشىن نە ىستەي الامىن؟» دەگەن سۇراقتى ءاربىر ادام وزىنە قويۋى ءتيىس», – دەلىنگەن ۇندەۋدە.
بەلسەندى شاكىرتتەر, جىل سايىن ەلىمىزدە جوو قابىرعاسىن 200 مىڭعا جۋىق تۇلەكتىڭ ءبىتىرىپ شىعاتىنىن, ولار قاجەتتى قۇزىرەتتىلىككە قول جەتكىزگەن سوڭ جۇمىسسىزداردىڭ قاتارىن ەمەس, وزدەرى جۇمىس ورىندارىن قۇرا الاتىن ساۋاتتى مامان بولۋى ءتيىس دەپ سانايدى. ەلباسى ايتقانداي, قازاقستانعا عىلىم مەن يننوۆاتسيانى كوتەرەتىن جانە 4.0. يندۋستريانى قۇراتىن كرەاتيۆتى ۇرپاق كەرەك. تەك سول كەزدە عانا ەلدىڭ جاھاندىق تەحنولوگيالار ترەندىنە ساي دامۋىن جانە الەمدىك كەڭىستىكتەگى باسەكەگە قابىلەتتىلىگىن قامتاماسىز ەتە الامىز. جاستاردى ءبىلىم ەكونوميكاسىن دامىتۋعا تارتۋ – جاڭا يدەيالاردى انىقتاۋعا جانە قولداۋعا باعىتتالعان بىرەگەي الاڭ قۇرۋعا ىقپال ەتەتىندىگى قۇجاتتا باسا ايتىلعان.
ينتەللەكتۋالدى-شىعارماشىلىق الەۋەتتى ىنتالاندىرۋ ماقساتىندا جانە تالانتتى جاستاردى انىقتاۋ ءۇشىن ۋنيۆەرسيتەت قابىرعاسىندا 6 جىلدان بەرى «مەنىڭ قازاقستاننىڭ يننوۆاتسيالىق دامۋىنا قوسقان ناقتى ۇلەسىم» ۇزدىك جاس عالىم, ۇزدىك ستۋدەنتتىك ستارتاپقا, ء«وز ەلىمنىڭ گۇلدەنۋى ءۇشىن مەن نە ىستەي الامىن؟» اتتى ۇزدىك ەسسە مەن پوەتيكالىق شىعارماعا, «ماڭگىلىك ەل – مەنىڭ مۇراتىم» ۇزدىك پاتريوتتىق اندەرگە ارنالعان بايقاۋلار جوباسى جۇزەگە اسىرىلىپ كەلەدى.
ستۋدەنتتەر ۇلتتىق جاستار قوزعالىسىن قالىپتاستىرۋ ماقساتىنداعى اتالمىش تاجىريبە نەگىزىندە «جاستاردىڭ شىعارماشىلىعى مەن كۇش جىگەرى – ەلىمىزدىڭ يننوۆاتسيالىق دامۋى ءۇشىن» ۇرانىمەن جوعارىدا اتالعان بايقاۋلاردى رەسپۋبليكانىڭ بارلىق جاستارى اراسىندا جىل سايىن وتكىزۋ تاجىريبەسىن قاراستىرۋدى ۇسىندى.
«ەگەر بۇل جوباعا ءاربىر ۋنيۆەرسيتەت, كاسىپورىن جانە ايماق قوسىلسا, وندا يننوۆاتسيالىق جاستار قوزعالىسى شىن مانىندە قانات جايىپ, ءبىلىم ەكونوميكاسىنىڭ دامۋىنا زور ىقپال ەتەتىن ىنتالاندىرۋشى كۇش بولادى.ء بىز جاستاردىڭ ەڭ ۇزدىك باستامالارى مەملەكەتتىك ۇيىمداردىڭ بارلىق دەڭگەيىندەگى ءتيىستى رەسۋرستاردان قولداۋ تابادى دەپ سەنەمىز! وسىعان وراي ءبىز ۇلكەن ىنتامەن پرەزيدەنتتىڭ تاپسىرماسىن قولعا الا وتىرىپ, تالانتتى جاستاردىڭ يدەيالارى مەن ستارتاپتارىنا كومەك كورسەتۋ ماقساتىندا ارنايى گرانت تابىستايتىن بيزنەس-قۇرىلىمدارعا ۇسىنىس تاستايمىز. ءبىزدىڭ ۇسىنىسىمىز كەڭ كولەمدە جۇزەگە اسىرىلار بولسا, قولايلى يننوۆاتسيالىق ورتا قالىپتاستىرۋعا ءارى جاستاردىڭ كۇش جىگەرى مەن شىعارماشىلىعىنىڭ جاسامپاز كۇشكە اينالۋىنا مۇمكىندىك بەرەدى», - دەيدى قازۇۋ ستۋدەنتتەرى.
ارمان وكتيابر,
«Egemen Qazaqstan»
الماتى
