جيىندى اشقان وبلىس اكىمى جەرگىلىكتى جاۋاپتى مەملەكەتتىك ورگانداردىڭ «7-20-25» يپوتەكالىق نەسيەلەۋگە, ستۋدەنتتەرگە ارنالعان جاتاقحانا قۇرىلىسى مەن ەلدى مەكەندەردى گازداندىرۋعا قاتىستى باستامالارىن جۇزەگە اسىرۋ جۇمىستارىن سىنعا الدى.
«7-20-25» باعدارلاماسى جۇزەگە اسىرىلعاننان باستاپ يپوتەكالىق تۇرعىن ءۇي قارىزدارىن الۋعا ەكىنشى دەڭگەيلى بانكتەرگە وبلىس بويىنشا 360-قا جۋىق ءوتىنىش بەرىلىپ, ولاردىڭ ىشىندە جالپى سوماسى 1,7 ملرد تەڭگەگە 202 ءوتىنىش ماقۇلداندى», - دەدى وبلىس اكىمىنىڭ ورىنباسارى سەرىك تولەنبەرگەنوۆ.
سونىمەن بىرگە وبلىس اكىمدىگى «باسپانا يپوتەكالىق ۇيىمى» اق-مەن بيۋدجەتتىك قىزمەتكەرلەر, اسكەري قىزمەتكەرلەر, قۇقىق قورعاۋ ورگاندارى ءۇشىن باستاپقى جارنانى باعدارلاما بويىنشا 20 پايىزدان 10% -عا تومەندەتۋ تۋرالى كەلىسىمگە قول قويدى, بۇل يپوتەكانى ودان سايىن قول جەتىمدى ەتەدى.
«بۇل ءبىزدىڭ وبلىستىڭ قتقجب-دەگى كەزەكتە تۇرعاندار مەن سالىمشىلار سانى بويىنشا كوش باسىنداعى ۇشتىككە كىرەتىنىن, سونىمەن قاتار وتكەن جىلى 900 مىڭ شارشى مەتر تۇرعىن ءۇي پايدالانۋعا بەرىلگەنىن ەسەپتەگەندە وتە از. حالىق اراسىندا ءتۇسىندىرۋ جۇمىسىن كۇشەيتىپ, قۇرىلىستى سالۋشىلارمەن جانە باعدارلامانىڭ وپەراتور بانكتەرىمەن بىرگە تىعىز بايلانىستا بولۋ كەرەك»,- دەدى بەردىبەك ساپارباەۆ.
ايتا كەتەيىك, باعدارلامانى تابىستى جۇزەگە اسىرۋ ماقساتىندا قۇرىلىس كومپانيالارىمەن مەموراندۋمدارعا قول قويىلماق, سوعان سايكەس جاڭا قۇرىلىستارداعى پاتەرلەردىڭ 50 پايىزى «7-20-25» بويىنشا جۇزەگە اسىرىلادى.
سەرىك تولەنبەرگەنوۆتىڭ ستۋدەنتتەر جاتاقحاناسىن سالۋ بويىنشا جوبالاردىڭ جۇزەگە اسىرىلۋى تۋرالى ەسەبىن تىڭداپ شىققان وبلىس اكىمى جوعارى جانە ارنايى ورتا وقۋ ورىندارىندارىنىڭ جاتاقحانالارعا دەگەن ناقتى قاجەتتىلىگىن قايتا ناقتىلاۋدى جانە جۇزەگە اسىرىلۋعا جوسپارلانىپ جاتقان جوبالاردى ولاردىڭ تيىمدىلىگىنە تالداۋدى تاپسىردى.
سەرىك تولەنبەرگەنوۆ ەلدى ءارى قاراي گازداندىرۋ تۋرالى باستاماعا قاتىستى بيىل وبلىس بويىنشا قۇنى 6,06 ملرد. تەڭگەنىڭ 19 گازبەن جابدىقتاۋ جوباسى جۇزەگە اسىرىلىپ جاتقانىن جەتكىزدى. ونى 2019-2020 جىلدارى پايدالانۋعا بەرۋ جوسپارلانعان. سونداي-اق, حرومتاۋ اۋدانىنىڭ تاسساي جانە كوكپەكتى اۋىلدارىن گازداندىرۋ جۇمىستارىن باستاپ كەتۋ جوسپارلانىپ وتىر. ناتيجەسىندە 7 مىڭ حالقى بار 13 اۋىلعا گاز بەرىلەدى.
وبلىس اكىمى ءالى كۇنگە دەيىن گازبەن جابدىقتالماعان ەلدى مەكەندەرگە گاز جۇرگىزۋدىڭ ەكونوميكالىق ماقساتتىلىعى مەن تابىستىلىعىنا تالداۋدىڭ جوقتىعىنا نارازىلىعىن ءبىلدىردى. بۇل قۇجات ءوڭىردى گازداندىرۋدىڭ كەلەشەگىن ءارى قاراي انىقتاۋ كەزىندە قاراجاتتى تيىمدىرەك جۇمساۋعا مۇمكىندىك بەرەر ەدى.
«مەن سىزدەرگە بەلگىلى ءبىر ەلدى مەكەنگە گاز جۇرگىزۋدىڭ تيىمدىلىگىن ەسەپتەۋدى باياعىدا تاپسىرعانمىن. بۇل حالىق ءۇشىن گازدىڭ قۇنىنا اسەر ەتىپ, جوبانىڭ قۇنى قىمباتقا تۇسپەي مە؟ مۇنداي گازدىڭ قۇنى حالىق ءۇشىن قىسقا جاعاتىن كومىر قۇنىنان دا قىمبات بولماي ما؟ قاي اۋىلدا نە پايدالانعان ءجون – گاز با, ەلەكتر جارىعىن با, الدە قاتتى جانە سۇيىق وتىن با؟ بۇكىل ءۇش باستامانىڭ دا ورىندالۋى ناشار. بۇل باقىلاۋدىڭ جوقتىعى سالدارىنان»,- دەدى بەردىبەك ساپارباەۆ.
جيىن جالعاسىندا وبلىس اكىمى مەملەكەت باسشىسىنىڭ ەڭبەكاقىسى 25 اەك-تەن نەمەسە 63 125 تەڭگەدەن تومەن قىزمەتكەرلەردىڭ سالىق جۇكتەمەسىن 10 ەسە تومەندەتۋ جونىندەگى باستاماسىنىڭ جۇزەگە اسىرىلۋىن جالعاستىرۋدى تاپسىردى. ەكونوميكا جانە بيۋدجەتتى جوسپارلاۋ باسقارماسىنىڭ باسشىسى گۇلقاسيما سۇيىنتاەۆا: «اتالمىش سالىق جەڭىلدىگىنە 92 مىڭنان استام ادام يە بولدى. ناتيجەسىندە ولاردىڭ جالپى كىرىسى 1,6 ملرد تەڭگەنى قۇرايتىن بولادى»,- دەپ جەتكىزدى.
«ەشكىم ەسەپسىز قالماس ءۇشىن ەڭ تومەن ەڭبەكاقى ءوسىمىن دە باقىلاۋدا ۇستاۋ قاجەت. ەڭبەكاقىسىن كوتەرۋدى قاجەت ەتەتىن ءاربىر ادام ونى الۋعا ءتيىس», - دەدى بەردىبەك ساپارباەۆ.
وبلىس اكىمىنىڭ ورىنباسارى قايرات بەكەنوۆ نەسيەلەۋدى كەڭەيتۋ باستاماسىنىڭ جۇزەگە اسىرىلۋى جونىندە ەسەپ بەردى. بىلتىر شاعىن جانە ورتا بيزنەس ءۇشىن شاعىن نەسيەلەۋگە 4,9 ملرد. تەڭگە بولىنگەن. قاراجاتتىڭ كوپ بولىگى, اتاپ ايتقاندا 3,9 ملرد. تەڭگە شوب سۋبەكتىلەرىنە, اۋىلدا جۇمىس ىستەيتىندەرگە بەرىلدى. جالپى, اقتوبە وبلىسى جىل قورىتىندىسى بويىنشا قر وڭىرلەرى اراسىندا شاعىن نەسيەلەۋ قاراجاتىن يگەرۋدە كوش باسىنا شىقتى. اۋقىمدى مەملەكەتتىك قولداۋدىڭ ناتيجەسىندە شوب-تەگى ءوندىرىس ءوسىمى 121% قۇرادى, شاعىن جانە ورتا بيزنەستىڭ جالپى وڭىرلىك ونىمدەگى ۇلەسى 25 پايىزعا جەتىپ, 3,2%-عا ءوستى»,-دەپ اتاپ ءوتتى ق.بەكەنوۆ. قوسا كەتەيىك, وسى جىلى شوب-ءتى شاعىن نەسيەلەۋگە 5,1 ملرد تەڭگە اۋدارىلماق.
«ەلباسىنىڭ بارلىق تاپسىرمالارى ۋاقىتىندا ءارى ساپالى ورىندالۋ كەرەك. ءبىزدىڭ وبلىس ءوز رەزەرۆتەرىن تولىق پايدالانىپ وتىرعان جوق. سوندىقتان ءبىرىنشى كەزەكتە, «7-20-25» بويىنشا جۇمىستى «باسپانامەن» جانە قالا اكىمدىگىمەن بىرگە كۇشەيتۋدى تاپسىرامىن. جاتاقحانالار بويىنشا ناقتى قاجەتتىلىكتى انىقتاۋ كەرەك. شاعىن نەسيەلەۋ بويىنشا جۇمىس, جالپى, جامان ەمەس. بىراق مۇندا پايدالانىلماعان رەزەۆتەر دە بار, اسىرەسە حالىقارالىق گرانتتاردى تارتۋدا. باستاماعا بارىنشا جاستاردى تارتىڭىزدار. ءاربىر اقتوبەلىك جاس ماسەلەن, باسپانالى بولىپ, ءوز ءىسىن اشىپ, مەملەكەت قولداۋىن الىپ جانە تاعى دا باسقاشا وسى جىلدىڭ ارتىقشىلىعىن ىستە سەزىنۋى كەرەك. بارلىق باستامانىڭ جۇزەگە اسىرىلۋىن ۇنەمى باقىلاۋدا ۇستاڭىزدار»,-دەدى ءسوزىن تۇيىندەگەن وبلىس اكىمى.
تەمىر قۇسايىن,
«Egemen Qazaqstan»
