الماتى وبلىسىندا جوبا باستالعالى بەرى 6253 جاس مامان وڭىردەگى اۋىلدارعا ات باسىن بۇرعان ەكەن. ەسەپ بويىنشا 2009 – 2018 جىل ارالىعىندا «ديپلوممەن اۋىلعا» كەلگەندەرگە جالپى سوماسى 785,3 ملن تەڭگە بولاتىن كوتەرمە جاردەماقى بەرىلگەن. ال وتكەن جىلى عانا بۇل قولداۋعا 571 جاس مامان يە بولىپتى.
جالپى, 2009 – 2018 جىل ارالىعىندا «ديپلوممەن اۋىلعا» جوباسىنا قاتىسۋشىلارعا قانداي ماماندىقتار بويىنشا سۇرانىس بولدى؟ مالىمەتتەر ەڭ جوعارى كورسەتكىش ءبىلىم سالاسىنا قاتىستى ەكەنىن ايتادى. جەتىسۋدىڭ اۋىلدارىنا بالا وقىتۋعا كەلگەن جاس مۇعالىم سانى 4328 ادامدى قۇراعان. مۇنان كەيىنگى ورىن مەديتسينا سالاسىنا بۇيىرىپتى, 1487 دارگەر, مەدبيكە سياقتى ماماندىق يەسى ەلگە ورالعان. سونداي-اق, 236 جاس مامان اگروونەركاسىپ كەشەنىنە, 113 ادام مادەنيەت مەكەمەلەرىنە, 49 جاس الەۋمەتتىك قامسىزداندىرۋ سالاسىنا جانە 40 سپورت مامانى ءوز بولاشاعىن اۋىلمەن بايلانىستىرۋعا بەل بۋعان ەكەن. ايتپاقشى, جوبا اياسىندا بەرىلگەن تۇرعىن ءۇي ساتىپ الۋ نەسيەسىنىڭ جالپى كولەمى 7,7 ملرد تەڭگە شاماسىندا. بۇل قارجىعا 2912 جاس مامان باسپانا ساتىپ الدى دەۋگە بولادى.
ەلباسى نۇرسۇلتان نازارباەۆ جاستار جىلىنىڭ اشىلۋىندا سويلەگەن سوزىندە «ديپلوممەن اۋىلعا» جوباسى بويىنشا بەرىلەتىن كوتەرمە اقىنى 70 ايلىق ەسەپتىك كورسەتكىشتەن ارتتىرىپ, 100 پروتسەنتكە دەيىن جەتكىزۋدى ايتقان ەدى. قازىر الماتى وبلىسىنىڭ اكىمدىگى بۇل تاپسىرمانى ورىنداۋعا كىرىستى. بيىل سۇرانىسقا يە 742 جاس مامان كوتەرمە جاردەماقىنى 176750 تەڭگە مولشەرىندە الادى دەپ كۇتىلۋدە. مۇنان بولەك, تاعى 523 ادامعا 3787,5 مىڭ تەڭگە مولشەرىندە 523 مامان جەڭىلدەتىلگەن نەسيە بەرۋ جوسپارلاندى.
قالماحانبەت مۇقامەتقالي,
«Egemen Qazaqstan»
الماتى وبلىسى
