ءبىرىنشى راۋندتان سوڭ, 19 جاستاعى جەرلەسىمىز 96,5 مەتردى باعىندىرىپ, ءبىرىنشى ورىندا تۇردى. ال فينالدىق باسەكەدە سەرگەي 94,5 مەترگە دەيىن «ۇشىپ», 248,9 ۇپايمەن ۇزدىك ۇشتىكتى تۇيىقتادى. التىن جۇلدە 252,1 ۇپاي جيناعان نورۆەگيالىق توماس ماركەنگتىڭ, كۇمىس جۇلدە گەرمانيالىق لۋكا روتتىڭ ەنشىسىندە. فينالدا نەمىس سپورتشىسى 97,5 مەتردى باعىندىرعانىمەن, ماركەنگتىڭ العاشقى اينالىمدا جيعان ۇپايى كومەككە كەلدى.
قازاقستان كومانداسىنىڭ باس باپكەرى پاۆەل ۆاسيلەۆتىڭ ايتۋىنشا, بۇل تاريحي جەڭىسكە پارا-پار جۇلدە.
«تاۋەلسىز قازاقستان تاريحىندا تۇڭعىش رەت ءبىز جاسوسپىرىمدەر اراسىنداعى الەم چەمپيوناتىنان جۇلدە الىپ وتىرمىز. ارينە, بۇل ءبىز ءۇشىن ۇلكەن جەتىستىك. جارىسقا نيكيتا دەۆياتكين, گلەب سافونوۆ, نۇرشات تۇرسىنجانوۆتار دا قاتىستى. بيىل ءبىز العاش رەت كۆوتالار سانىن كوبەيتىپ, قاتىسۋشى سپورتشىلار سانىن تورتكە جەتكىزدىك. بۇرىن ءبىزدىڭ ەل اتىنان ەكى سپورتشىدان ارتىق قاتىسپايتىن. سونداي-اق, ءبىز العاش رەت كوماندالىق تۋرنيردە باق سىنايمىز. الەم بويىنشا 12 كوماندا عانا قاتىساتىن ءتۋرنيردىڭ فينالىنا وتتىك. بۇل دا تاريحتا ءبىرىنشى رەت بولىپ وتىرعان جاعداي», - دەيدى باس باپكەر.
«قازىرگى قۋانىشىمدا شەك جوق. ەلىمىزدىڭ بايراعىن الەمدىك سىندا كوتەرگەنىم ءۇشىن ەرەكشە باقىتتىمىن», - دەيدى سەرگەي تكاچەنكو.
