ەل گازەتى «ەگەمەندە» جاريالانعان ەلباسىنىڭ « ۇلى دالانىڭ جەتى قىرى» اتتى ماقالاسىن مۇقيات وقىپ شىعىپ, «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ زاڭدى جالعاسى ەكەنىن اڭعاردىم. كوشپەندى تەگىمىزدىڭ, سونىڭ ىشىندە ءوزىمنىڭ جانىما اسا جاقىن بىرەگەي قىرىمىز – «اتقا مىنۋمەن» باستالعان ماقالا مەنى قۋانتتى. ويتكەنى كوشپەلىلىك تانىمىمىزداعى كوشەلى تۇسىنىگىمىز ات ۇستىندە قالىپتاسقان ەلمىز. ءبىزدىڭ ەسكى قازاقتا «وڭ-سولىن تانۋ» دەگەن ۇعىم دا وسى اتقا مىنۋمەن تىكەلەي بايلانىستى. مىسالى, جىلقىنىڭ جاي تۇرعانداعى وڭ جاعىن قازاق «مىنەر جاق» دەيدى دە, سول جاعىن «قامشىلار جاق» دەپ اتايدى. ەندى ات جالىن تارتىپ ءمىنىپ, ۇستىنە شىققاندا جاڭاعى «قامشىلار جاق» اۆتوماتتى تۇردە وڭ جاق بوپ, جەردەن قاراعانداعى «مىنەر جاق» سول جاق بوپ شىعا كەلەدى. سوندا ات جالىن تارتىپ ءمىنىپ, دوڭگەلەنگەن دۇنيەگە ات ۇستىنەن قاراي العان جاس قانا «وڭ-سولىن» انىق تانيتىنىن اڭعارعان قازاقي قاراپايىم عانا ءپالساپا تۋماي ما؟! وسى قازاقى تانىمدى بۇگىنگى قازاق بالاسى ۇمىتپاسا, كەشەگى اتا-باباسىنىڭ ەرلىگى مەن كەمەل اقىل-وي بيىگىنەن ۇمتىلارى حاق ەكەنىن ەلباسىمىز ايتىپ وتىر. جىلقى مادەنيەتىن كەز كەلگەن قازاق بالاسى بەس ساۋساعىنداي بىلمەي تاريحي جادىمىزعا ورالا المايتىنىمىز بەلگىلى. مەنىڭ ەرتەدەگى ءبىر ايتىستا ايتقان: «ادىردان ادىر ورعىعان, جىلقى اتاسى كەرقۇلان, ال, مەنىڭ اتام ەر تۇرىك» دەگەن جىر جولدارىم ەسىمە تۇسە كەتكەنى.
بەسىنشى اڭگىمەدە «تۇركى الەمىنىڭ بەسىگى» دە التايداعى اتاقتى «بەرەل» قورعانىنان تابىلعان ون جەتى جيرەن ات تا وسى ماقالاداعى ءاربىر تۇعىرنامانىڭ ءبىر-بىرىمەن ساباقتاستىعىن كورسەتىپ تۇر. بەرەلدەن تابىلعان التىن ادامنىڭ بەزەندىرىلۋىندەگى اڭ ءستيلى دە, ۇلى دالاداعى ەجەلگى مەتاللۋرگيانى مەڭگەرىپ, التىن قورىتقان بابالار ونەرىن پاش ەتپەك. بۇگىنگى جاھاندانۋ زامانىندا جاس ۇرپاقتىڭ ساناسىن بوگدە جۇرتتاردىڭ زاماناۋي مادەنيەتى جاۋلاپ بارا جاتقان ۋاقىتقا قارسى تۇرارلىق قاۋقاردى وسى ماقالاداعى تاپتىشتەي ايتىلعان ۇلتتىق قۇندىلىقتار عانا قۇتقارا الادى دەپ ويلايمىن. كەشەگى كوشەلى مادەنيەتىمىزدەن تامىر تارتقان, ۇلى دالادا, ۇلى جىبەك جولى بويىندا جاۋھار مادەنيەت جاساعان كوشپەلى تانىمىمىزدان كىندىك ۇزبەي, بولاشاققا باعىت العان ۇلى كوشىمىزدىڭ باعدارىن ايقىنداپ بەرگەن ەلباسى ماقالاسى ءار قازاق بالاسىنا وي سالارى انىق. جانە وسى باعدارلاردى ىقتياتتى تۇردە جۇزەگە اسىرۋعا ارقايسىمىز اتسالىسۋىمىز كەرەك دەپ ويلايمىن.
داۋلەتكەرەي كاپ ۇلى,
اقىن, قازاقستان رەسپۋبليكاسىنىڭ ەڭبەك سىڭىرگەن قايراتكەرى, قازاقستان جازۋشىلار وداعى استانا فيليالىنىڭ
توراعاسى
