مەملەكەت باسشىسىنىڭ « ۇلى دالانىڭ جەتى قىرى» اتتى ماقالاسىندا ءتۇپ-تامىرىمىزدى ءبىلۋدىڭ, ۇلتتىق تاريحىمىزعا تەرەڭ ءۇڭىلىپ, جاڭعىرۋ جولىندا جاڭا قادامدار جاساۋدىڭ ماڭىزى جايلى باسا ايتىلعان. ۇلتىمىزدىڭ وركەنيەت جولىنداعى عۇمىرى, ۇلى دالانىڭ تاريحي ۇزدىكسىز دامۋىن بىرنەشە دايەكتەمە ارقىلى كوز الدىمىزعا كەلتىرەدى. ۇلتتىق جاڭعىرۋعا جول العان ەلىمىزدىڭ سوناۋ عاسىرلاردان كەلە جاتقان مادەني جەتىستىكتەرى دالامىزعا سىرتتان كەلمەي, كەرىسىنشە, بايتاق ولكەمىزدەن تامىر جايىپ, باتىس پەن شىعىس, كۇنگەي مەن تەرىسكەيگە تارالعانىن العا تارتادى. تۋعان توپىراعىمىزدان تابىلعان تاريحي جادىگەرلەر ۇلى دالانىڭ جاhاندىق تاريحتان ويىپ تۇرىپ ورىن الاتىنىن مويىنداتپاي قويمايدى. ءبىر عانا اتتى قولعا ۇيرەتىپ, ءتۇرلى ماقساتتا قولدانا بىلگەن, بۇرىن-سوڭدى بولماعان جاڭا قۇرالدار ويلاپ تاۋىپ, عىلىم ءۇشىن سەنساتسيا سانالعان «التىن ادامنىڭ» تابىلۋى, ەڭ كونە جازۋ ونەرىنىڭ بىزدە بولعانىنىڭ دالەلدەنۋى الەمدىك تەڭدەسسىز رەۆوليۋتسياعا جول اشقان اتا-بابامىزدىڭ سالعان سارا جولىنا, ۇلتتىق تاريحىمىزدىڭ كوكجيەگىنە كەڭىنەن كوز تاستاپ, تەرەڭ زەردەلەۋدى تالاپ ەتەدى.
تاريح تولقىنىنداعى اقتاڭداقتاردى قالپىنا كەلتىرۋ ماقساتىندا ىسكە اسىرىلعان «مادەني مۇرا» باعدارلاماسىنىڭ ىزىمەن تاريحي سانانى جاڭعىرتۋ ماقساتىندا ءتۇرلى جوبالاردىڭ قاجەتتىگى كورىنەدى. وسى ماقساتتا ەلباسىمىز تاراپىنان ءوز ماقالاسىندا الەم بويىنشا ەلىكتەۋگە لايىقتى ۇلى دالانىڭ ۇلى تۇلعالار شوعىرىن جاساۋ ءۇشىن « ۇلى دالانىڭ ۇلى ەسىمدەرى» وقۋ-اعارتۋ ساياباعىن اشۋ, «ارحيۆ − 2025» جەتىجىلدىق جوباسىن قولعا الىپ, «تۇركى وركەنيەتى: ءتۇپ-تامىرىنان قازىرگى زامانعا دەيىن» اتتى جوبانىڭ جۇرگىزىلۋىنىڭ ماڭىزىن, ماڭگى ولمەيتىن ۇلتتىق اسپاپتارمەن ورىندالاتىن تۋىندىلار توپتاماسىن جاساپ شىعارۋ, ۇلى دالانىڭ ۇلتتىق مۇراسىن, ساناسىن جاڭعىرتۋ ماقساتىندا حالىقتىڭ تانىمىندا ەرەكشە ورىن الاتىن كينو ونەرى ارقىلى دارىپتەۋ دە كوزدەلگەن.
ەلباسىمىزدىڭ «بولاشاققا باعدار: رۋحاني جاڭعىرۋ» ماقالاسىنىڭ جالعاسى رەتىندە جارىق كورىپ, ەل تاريحى, بولاشاعى جايلى قانشاما قۇندى دۇنيەلەر قامتىلعان. رۋحاني تۇلەپ, سانا-سەزىمىمىزدى جاڭعىرتۋ ءۇشىن, ەڭ اۋەلى, تاريحىمىز جايلى تاپتاۋرىن قاعيدالاردان پىكىرلەردەن ارىلۋىمىز شارت. كوش باسىنداعى ەلدەرمەن تەرەزەمىزدى تەڭەپ, يىق ءتۇيىستىرىپ, تەڭدەي تۇرۋ ءۇشىن وزگەرۋدى وزىمىزدەن باستاۋىمىز كەرەك. وتكەنىمىزبەن ساناسا وتىرىپ, جاڭا ءداۋىردىڭ جاعىمدى جاقتارىن بويعا ءسىڭىرىپ, جاس ۇرپاققا مول مادەني مۇرانى جەتكىزە ءبىلۋ − بۇگىنگى كۇننىڭ تالابى.
باتجان ءماجيتوۆا,
قورعالجىن اۋداندىق تىلدەردى دامىتۋ ورتالىعىنىڭ ديرەكتورى
اقمولا وبلىسى
