مەملەكەت باسشىسى نۇرسۇلتان نازارباەۆتىڭ جاستارمەن جۇزدەسۋىن كوگىلدىر ەكراننان كورگەن جەتىسۋ جاستارى وزدەرىن تولعاندىرعان جايتتاردىڭ ءسوز بولىپ, ناقتى شەشىمدەر قابىلداۋ جايىنداعى تاپسىرمانى جىلى اسەرمەن قابىلدادى.
جىل جاڭالىعىنىڭ رەسمي جاريالانۋىن ۇلكەن مۇمكىندىكتەرگە بالاعان ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ ستۋدەنتتەرى اتقاراتىن ىستەرىنە جوسپار قۇرىپ تا ۇلگەرىپتى.
– ماعان ەلباسىنىڭ ۆولونتەرلىقپەن اينالىساتىن جوعارى وقۋ ورىندارىنىڭ ستۋدەنتتەرىنە كوڭىل ءبولۋ كەرەك دەگەن سوزى قاتتى ۇنادى. سەبەبى, ءوزىم 2-كۋرستان بەرى ۆولونتەرلىقپەن اينالىسامىن. ءبىلىم الىپ جاتقان وقۋ وردامىزدا «الاۋ» جانە «Rise up» ەرىكتىلەر كلۋبى بار. ونىڭ قۇرىلۋىنا ءوزىم ات سالىستىم. «الاۋ» توبىنداعى ەرىكتىلەر قارت كىسىلەرگە, الەۋمەتتىك جاعدايى تومەن وتباسىلارىنا كومەك قولىن سوزسا, «Rise up» توبى تالدىقورعان قالاسىنداعى «اينالايىن» بالالار ءۇيىنىڭ تاربيەلەنۋشىلەرىنە اعىلشىن ءتىلىن ۇيرەتەدى. سونىمەن قاتار «نۇر وتان» پارتياسىنىڭ قالالىق فيليالىمەن بىرلەسىپ, مۇمكىندىگى شەكتەۋلى بالالاردىڭ ساباققا دايىندىعىنا كومەكتەسەدى. ءبىزدىڭ وسى باستامالارىمىزدى وكىمەتتىڭ ءوزى قولداپ, ۆولونتەرلارعا جاعداي تۋعىزىپ جاتسا, ءبىزدىڭ ءىسىمىز العا باسارى انىق. ءبىز وسىنداي مەيىرىمدىلىك ىسىمىزبەن وزگەگە ۇلگى بولىپ, ادامگەرشىلىك تۇرعىدان دا ءوسىپ, داميمىز دەپ سانايمىن. جالپى مەن ءبىلىم الىپ جاتقان جانسۇگىروۆ ۋنيۆەرسيتەتىندە جاستاردى قولداۋعا زور مۇمكىندىكتەر بار. بيىلعى جىلدىڭ ەرەكشەلىگىنە وراي ءبىلىم ورداسىنداعى مۇمكىندىكتەر ەكى ەسەلەنەدى دەپ ويلايمىن, - دەيدى جەتىسۋلىق جاس ۆولونتەر, ستۋدەنت ايدا رىسحانوۆا.
«جاستار جىلىنىڭ» سالتاناتتى اشىلۋىن ستۋدەنتتەرمەن بىرگە كورگەن ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ رەكتورى قۋات بايمىرزاەۆ ستۋدەنتتەردى «جاستار جىلىمەن» قۇتتىقتاپ, الداعى ۋاقىتتا جاستار ءۇشىن اتقارىلاتىن اۋقىمدى شارالار مەن ۇلكەن جوبالار ۇيىمداستىرىلاتىنىن جەتكىزدى.
قالماحانبەت مۇقامەتقالي,
«Egemen Qazaqstan»
الماتى وبلىسى
