«تاۋەلسىزدىك العان جىلدان بەرى ءبىزدىڭ ەلىمىزدە 2,8 ملن مامان جوعارى ءبىلىم الىپ شىققان. ەگەر 1991 جىلى جوعارى ءبىلىمى بار ادامداردىڭ سانى بىزدە 42 مىڭ بولسا, 2018 جىلى بۇل سان 151 مىڭ ادامعا جەتكەن. امەريكادا حالىقتىڭ جارتىسىنىڭ جوعارى ءبىلىمى بار دەپ ايتىپ جاتادى. ال بىزدە ونداي ساپا جوق. البەتتە, بىزگە جوعارى ءبىلىم دەگەندە ديپلومدى قالتاعا سالىپ الۋ ەمەس, ساپاعا ءمان بەرۋ كەرەك. جۇمىسقا كەلگەن كەزىڭدە شاماڭنىڭ قانداي ەكەنى بايقالادى», - دەدى پرەزيدەنت.
سونداي-اق ەلباسى جوو-لار مەن كوللەدجدەردى جاتاقحانامەن قامتۋدى تاپسىردى.
«وسىعان بايلانىستى جوعارى ءبىلىمنىڭ قولجەتىمدىلىگىن ارتتىرۋ, ستۋدەنتتەردىڭ ءومىرىن جاقسارتۋ ماقساتىندا ءبىرشاما جۇمىس اتقارىلىپ جاتىر. بەس الەۋمەتتىك باستامامدا 2018-2019 جىلى 20 مىڭ گرانتتىڭ بولىنەتىنىن ايتقانىم ەستەرىڭىزدە بولار. سونىمەن بىرگە 2020 جىلعا دەيىن 70 مىڭ ورىندىق جاڭا جاتاقحانا سالۋدى ماقسات ەتتىك. الدىمەن جوو-لاردى, سودان كەيىن كوللەدجدەردى جاتاقحانامەن قامتۋ كەرەك», - دەدى مەملەكەت باسشىسى.
بۇدان سوڭ, نۇرسۇلتان نازارباەۆ وسى يگى جۇمىستار جاستارعا ەڭبەك نارىعىنا بەيىمدەلۋگە جول اشاتىنىن اتاپ ءوتتى.
«حالىقارالىق باعالاۋ بويىنشا الەمنىڭ ەڭ ءىرى 300 كومپانياسى قىزمەتكەرلەرىنىڭ ۇشتەن ءبىرى اپتا سايىن ەرىكتىلىككە ءبىر ساعات بولەدى. ءبىز ول تۋرالى ءتىپتى ويلامادىق. وسى باعىتتا ارنايى جۇمىس ىستەۋ كەرەك. سوندىقتان ۇكىمەت ەرىكتىلىكپەن اينالىساتىن جوو-لارداعى وقىعانداردىڭ شاكىرتاقىسىن شامامەن 30 پايىزعا ارتتىرۋ باعىتىندا جۇمىس ىستەۋى كەرەك. ءبىز بۇنى جاساي الامىز. بۇل باعىتتاعى جۇمىس ستۋدەنتتەرگە ارنايى كومەك بولسا, حالىق ءۇشىن دە پايدالى بولادى», - دەدى ەلباسى.
