سالتاناتتى جيىندا ەلباسى جاستارعا قاتىستى ءتورت ماسەلەنى قوزعادى. سولاردىڭ العاشقىسى – تۇرعىن ءۇي ماسەلەسى.
«بيىلعى جىلدى جاستار جىلى دەپ بەكىتۋىمىزدىڭ سەبەبى كوپ. جاستاردى قولداۋدىڭ قاراپايىم جولدارىن تابۋىمىز كەرەك. جاستاردىڭ قاجەتتىلىكتەرى ەسەپكە الىنىپ, ولاردىڭ وسۋىنە جاعداي جاساۋىمىز كەرەك. بۇگىنگى تاڭدا جاستارعا ساپالى ءبىلىم, جۇمىس, باسپانا مەن وتباسى قۇرۋعا مۇمكىندىكتەر كەرەك. عالىمدار كەلەشەكتە الەمنىڭ ءىجو-ءنىڭ 60%-ى 600 ۇلكەن قالادان شىعاتىنىن ايتادى. سول سەبەپتى ۇلكەن قالالارعا كوڭىل ءبولۋىمىز كەرەك. ەلىمىزدەگى ءۇش ۇلكەن قالادا كەزەكتە تۇرعان جاستاردىڭ تۇرعىن ءۇي ماسەلەسى نازارعا الىنۋى كەرەك» دەدى ەلباسى.
نۇرسۇلتان نازارباەۆ استانا, الماتى, شىمكەنت سياقتى ۇلكەن قالالاردا جۇمىسشى جاستارعا ارناپ جىلىنا كەمى 1000 تۇرعىن ءۇي سالۋدى قولعا الۋدى ۇكىمەتكە, پرەزيدەنت اپپاراتىنا تاپسىردى. ەلباسى تۇرعىن ۇيلەر جالدامالى باسپانا نەگىزىندە جانە «7-20-25» مەملەكەتتىك باعدارلاماسى شەڭبەرىندە بەرىلەتىنىن ايتتى.
«وسىنداي باسپاناعا جۇمىس ىستەيتىندەر ءۇمىت ارتا الادى. جۇمىس - ول ءال-اۋقاتتىڭ نەگىزگى كوزى. ءبىز قازاقستاندا پاتەرناليزمدى دامىتقىمىز كەلمەيدى, ياعني بارلىعىن مەملەكەتكە جۇكتەپ قويعان دۇرىس ەمەس. وزدەرىڭىزدىڭ ىستەرىڭىزبەن مەملەكەتكە قولداۋ جاساۋلارىڭىز كەرەك. سوندىقتان جاس قىزمەتكەرلەر ءۇشىن باسپانا جاعدايىن جاساۋعا بارلىق مەنشىك تۇرىندەگى كاسىپكەرلەرلەر بەلسەندى تۇردە قاتىسۋى قاجەت. بۇل تۇرعىدا ءبىزدىڭ بارشا ءىرى كومپانيالارعا ۇندەۋ جاسار وتىرمىن», دەدى پرەزيدەنت.
