مەديتسينا • 22 قاڭتار، 2019

ورالدا ونكولوگ دارىگەرلەر قاۋىپتى دەرتتىڭ قاتەرىن ەسكەرتتى

242 رەتكورسەتىلدى

قازاقستاندا 21-29 قاڭتار ارالىعىندا جاتىر موينى قاتەرلى ىسىگى دەرتى تۋرالى حالىقتى اقپاراتتاندىرۋ اپتالىعى ءوتىپ جاتىر. بۇل بۇكىل دۇنيەجۇزىندە جىل سايىن وتكىزىلەتىن شارا.

ورال قالاسىندا باتىس قازاقستان وبلىستىق ونكولوگيالىق ديسپانسەرى ماماندارى ۇيىمداستىرعان ءباسپاسوز ءماسليحاتىندا بقو دەنساۋلىق ساقتاۋ باسقارماسىنىڭ قوعامدىق دەنساۋلىق ساقتاۋ ءبولىمى جەتەكشىسى ايگۇل بايباتچاەۆا كىرىسپە ءسوز سويلەپ، عاسىر دەرتىنە اينالعان سىرقات ماسەلەسىنە جۇرتشىلىق نازارىن اۋدارۋدىڭ ماڭىزدىلىعىن اتاپ ءوتتى. دارىگەرلەر بۇل دەرتتىڭ الدىن الۋ، كۇرەسۋ جولدارى بار ەكەندىگىن، تەگىن مەملەكەتتىك باعدارلاما جۇزەگە اسىرىلىپ جاتقانىن ايتادى. قاتەرلى دەرتپەن كۇرەس جولدارى جىل سايىن دامىپ كەلەدى، مامانداردىڭ دا كاسىبي بىلىكتىلىگى جوعارى.

- بۇل دەرتتىڭ الدىن الۋدىڭ بارلىق قۇرالى قولىمىزدا، ەڭ باستىسى – بۇل كۇرەسكە ايەلدەردىڭ ءوزى اتسالىسۋى، ءوزىنىڭ جانە جاقىن جاندارىنىڭ دەنساۋلىعىن الدىن الا ويلاۋى كەرەك! «اۋىرىپ ەم ىزدەگەنشە، اۋىرمايتىن جول ىزدە!» دەگەن عوي. بويىڭىزدان اۋىر دەرتتىڭ ەش بەلگىسى بىلىنبەسە دە الدىن الا تەكسەرىلىپ، قاۋىپتىڭ الدىن الۋدىڭ ماڭىزى وتە زور» - دەيدى ايگۇل ماۋلەتبەكقىزى.

الدىن الا جاسالعان سكرينينگ ارقىلى دەنەدەگى دەرتتىڭ 80%-نىڭ الدىن الۋعا بولاتىنى مەديتسينادا الدەقاشان دالەلدەنگەن. بۇعان قوسا بۇگىندە ونكوگەندىك جۇقپا قاۋپىنىڭ بەتىن قايتاراتىن تيىمدىلىگى جوعارى ەكپەلەر پايدا بولدى. ەڭ باستىسى، پروفيلاكتيكالىق قاداعالاۋ ارقىلى جاتىر موينى قاتەرلى ىسىگىنىڭ الدىن الۋعا بولادى، ادام پاپيللوماسى ۆيرۋسىنا (اپۆ) قارسى ۆاكتسينانىڭ دا كومەگى زور. «سوندىقتان 25 جاسقا دەيىنگى ايەلدەرگە جاسالعان ەكپە كوپ قاۋىپتىڭ الدىن الادى» دەيدى ماماندار.

جاتىر موينى قاتەرلى ىسىگى – الەم بويىنشا ايەلدەر اراسىندا كەڭ تارالعان وبىر دەرتىنىڭ اراسىندا ەكىنشى ورىندا تۇر ەكەن. جىل سايىن بۇل دەرتپەن 0،5 ملن ايەل اۋىرىپ، ونىڭ 288 مىڭى وسى اۋرۋدان ولەدى. بۇل سىرقاتقا نەگىزىنەن 30-40 جاستاعى ايەلدەر شالىناتىندىقتان، جاتىر موينى قاتەرلى ىسىگىنىڭ قوعامعا تيگىزەتىن زاردابى وراسان.

باتىس قازاقستان وبلىستىق ونكولوگيا ديسپانسەرى ديرەكتورىنىڭ مەديتسينالىق ءبولىم بويىنشا ورىنباسارى نۇرلان تولەمىسوۆ اق جايىق وڭىرىندە جىل سايىن وسى دەرتكە شالدىققان 80-90 ايەل انىقتالاتىنىن ايتادى. دامىعان ەلدەردە جۇيەلى وتكىزىلىپ تۇراتىن سكرينينگ شارالارى ناتيجەسىندە اتى جامان دەرتكە شالدىعۋ وقيعاسى ەكى ەسەگە ازاياتىنىن تاجىريبە كورسەتىپ وتىر.

ورالدا وتكەن جيىندا گينەكولوگ-دارىگەر اسىلزات جاقىپوۆا جاتىر موينى قاتەرلى ىسىگىن انىقتاۋ جانە ەمدەۋ جولدارى تۋرالى، باتىس قازاقستان وبلىستىق ونكولوگيا ديسپانسەرى تسيتولوگيا ءبولىمىنىڭ مەڭگەرۋشىسى لاۋرا ياكۋپوۆا وسى دەرتتى انىقتاۋدىڭ تسيتولوگيالىق سكرينينگ ءادىسى جونىندە بايانداما جاسادى. ءتۇرلى ساۋالدارعاماماندار تاراپىنان جاۋاپ بەرىلدى.

قازبەك قۇتتىمۇرات ۇلى،

«Egemen Qazaqstan»

باتىس قازاقستان

سوڭعى جاڭالىقتار

باسىلىم باسشىلارى - ەركىن قىدىر (1962)

باسىلىم باسشىلارى • كەشە

ۇقساس جاڭالىقتار