التىناي اپا ايگىلى ماتاي ستانساسىندا تۋىپ-ءوستى. بۇل ستانسانى ايگىلى دەپ اتاۋىمىزدىڭ سىرى بار, ەكىنشى دۇنيەجۇزىلىك سوعىس جىلدارىندا ماتايدىڭ دەپوسىندا ورىس ونەرتاپقىشى ميحايل كالاشنيكوۆ العاشقى اتىس قارۋىن ويلاپ تاۋىپ, قۇراستىرعان بولاتىن. تۇركسىب تەمىر جولىنىڭ نەگىزگى ءبولىمى رەتىندە شاعىن ستانسادا تىرشىلىك كورىگى سۋىعان ەمەس. اسىرەسە, سوعىس جىلدارىندا ورتا ازيادان مايدان شەبىنە اتتانعان سوستاۆتار لەگىندە سان جوق ەدى. جاستايىنان تەمىرجولدىڭ تارسىلى مەن پاروۆوزدىڭ اششى داۋسىنا قۇلاعىنىڭ قۇرىشى قانعان التىناي ەسبولاتوۆا ون توعىز جاسىندا ءماشينيستىڭ قىسقا مەرزىمدى وقۋىن وقىپ, پاراۆوزدىڭ باسقارۋ تىزگىنىن قولىنا الدى. وسىلايشا, اسكەري پويىزدىڭ ءماشينيسى اتانعان قازاقتىڭ جاس قىزى اۋىر سوستاۆتى سۇيرەگەن پاراۆوزدىڭ كابيناسىندا العى شەپكە كەتە باردى. ستالينگراد تۇبىندەگى مايدانعا اسكەري تەحنيكا, ادام كۇشى, ازىق-ت ۇلىك جەتكىزىپ, كەرى ورالعاندا اۋىر جارالانعان جاۋىنگەرلەردى تاسيتىن ەدى.
قازىر «پاروۆوز اپا» تالدىقورعان قالاسىندا تۇرادى. تەك ول كۇندەر تۋرالى اڭگىمەگە قاساڭ. جالىنعا ورانعان جاستىعى مەن ەل كۇيزەلگەن كەزەڭدى ەسىنە تۇسىرۋدەن بوي تارتاتىن بولار. ەسەسىنە بۇگىنگى باقىتتى ۇرپاققا ۇنەمى باتا بەرىپ, تاۋەلسىز ەلدىڭ تىلەۋىن تىلەپ وتىرادى.
...التىناي اپامەن جولىعۋعا «قارتتار كۇنى» قارساڭىندا بارعان ەدىك. ءىزىمىزدى ءالا بىر توپ وقۋشى دا «پاروۆوز اپانى» قۇتتىقتاپ كەلە قالىپتى. اپا بالالارعا باتاسىن بەردى.
– جاقسى وقىڭدار, تاربيەلى بولىڭدار, اتا-انالارىڭنىڭ قۋانىشى, وتاننىڭ تىرەگى بولىڭدار. ءبىلىم – بارلىق يگىلىكتىڭ كىلتى. بالالاردىڭ ءبىز كورگەن قيىندىقتى كورمەي, بولاشاقتارى جارقىن بولۋىن تىلەيمىن! – دەدى ارداگەر.
قالماحانبەت مۇقامەتقالي,
«Egemen Qazaqstan»
الماتى وبلىسى
