«مۇعالىمدەردى اقى تولەنبەيتىن قوسىمشا جۇمىستارعا كوپ ۋاقىت جۇمسايدى. مىسالى, سايلاۋ كەزىندە ۇگىتشى جاسايدى, ساباقتان الىپ سەنبىلىككە جىبەرەدى, جينالىستاردا كىسى تولماسا سوعان قاتىستىرادى, بىرەۋدىڭ كىتابى وتپەي جاتسا سونى الدىرادى جانە گازەت-جۋرنالدارعا كۇشتەپ جازدىرادى, ت.ب.» دەدى.
2000-جىلدارى قازاقتىڭ ءبىرتۋار پەداگوگى, عالىم-ۇستاز قانيپا بىتىباەۆا اپامىز اقسۋاتقا كەلدى. سوندا وسى ماسەلەنى قوزعاپ ەدى. كورەگەن اپامىز ءوز سوزىندە: «مۇعالىمدەردىڭ «بايى» كوپ. ولار – ديرەكتور, ء بىلىم بەرۋ ءبولىمىنىڭ باسشىسى, اكىم ت.ب. سوندىقتان «مۇعالىم مارتەبەسى تۋرالى» زاڭ قابىلداماي تۇك تە بولمايدى» دەپ ەدى. مىنە, بۇيىرسا قانيپا اپامىزدىڭ تىلەگى ورىندالعالى تۇر.
ەندىگى كەزەكتە پەداگوگيكا سالاسىندا 34 جىل ەڭبەك ءوتىلى بار, مۇعالىم, وقۋ ءىسىنىڭ مەڭگەرۋشىسى, ديرەكتور, ءبىلىم بولىمىندە ادىستەمەلىك كابينەتتىڭ مەڭگەرۋشىسى, جاڭادان قۇرىلعان «پمپك» كمم-ءنىڭ باسشىسى بولعان ادام رەتىندە «پەداگوگ مارتەبەسى تۋرالى» زاڭعا قاتىستى وي-پىكىرىممەن بولىسپەكپىن.
ەڭ الدىمەن پرەزيدەنتىمىز اتاپ كورسەتكەندەي (جوعارىدا ايتىلعان), اقى تولەنبەيتىن قوسىمشا جۇكتەمەلەردەن مۇعالىمدەردى بوساتۋ كەرەك. ەكىنشىدەن, مۇعالىمدەردىڭ الاڭسىز ساباققا دايىندالىپ, وقۋ-تاربيە جۇمىسىمەن عىلىمي شىعارماشىلىقپەن اينالىسۋىنا مەكتەپ اكىمشىلىگى جاعداي جاساۋى قاجەت.
ءار مۇعالىمدە ەعۇ (ەڭبەكتى عىلىمي تۇرعىدا ۇيىمداستىرۋ) بولۋى, ياعني ساباق كەستەسىن جاساعاندا ءبىر كۇندى وسىعان ارناۋ, ءپان كابينەتتەرىنىڭ ماتەريالدىق بازاسىن جاقسارتۋ, مەكتەپىشىلىك سەمينارلار, عىلىمي كونفەرەنتسيالار وتكىزۋ, مەكتەپ مۇعالىمدەرىنىڭ پەداگوگيكا سالاسى بويىنشا وتەتىن اۋداندىق, وبلىستىق, رەسپۋبليكالىق جانە حالىقارالىق وليمپيادالارعا, ءتۇرلى بايقاۋلار مەن كونكۋرستارعا قاتىسۋلارىنا جاعداي جاساۋ, مۇعالىمنىڭ ەڭبەگىن سوڭعى ناتيجە بويىنشا باعالاۋ, ياعني وقۋشىسى اۋداندىق, وبلىستىق, رەسپۋبليكالىق, حالىقارالىق وليمپيادالاردان جۇلدەلى ورىن العان ۇستازداردى جۇمىس وتىلىنە قاراماي كاتەگورياسىن كوتەرۋ جانە ماراپاتتاۋ. ۇشىنشىدەن, ەكونوميكالىق جاعداي تۇزەلگەن كەزدە مۇعالىمدەردىڭ اپتالىق جۇكتەمە ساباقتارىن 18-دەن 14-كە دەيىن تومەندەتۋ, 25 جىل جۇمىس وتىلىنەن كەيىن جەڭىلدىكپەن زەينەتكەرلىككە شىعارۋ قاجەت.
پەداگوگتاردى تۇرعىن ءۇيىنىڭ كولەمىنە قاراي كومىرمەن, ەلەكتر ەنەرگياسىمەن تولىق قامتاماسىز ەتۋ, دارىگەرلىك قاراۋدان تەگىن وتكىزۋ قولعا الىنسا دەيمىز. قازىرگى كەزدەگى كوممۋنالدىق قىزمەت اقىسى ءبىر توننا كومىرگە دە جەتپەيدى.
سونىمەن بىرگە مۇعالىمدەردىڭ ەڭبەكاقىلارى ەلىمىزدەگى ورتاشا ەڭبەكاقىدان جوعارى بولۋى قاجەت.
«سانانى تۇرمىس بيلەيدى», دەپ كەزىندە ك.ماركس تەگىن ايتپاعان بولار. ەگەر مۇعالىمدەردىڭ الەۋمەتتىك جاعدايى جاقسارىپ, تۇرمىسى تۇزەلسە, ولارعا ەركىندىك بەرىلسە, ۇستازدار وزدەرىنىڭ اتىنا داق تۇسىرمەي, ەلىمىزدىڭ ەرتەڭى – بولاشاق ۇرپاققا ساپالى ءبىلىم, سانالى تاربيە بەرۋ جولىندا ايانباي ەڭبەك ەتەتىندەرىنە كامىل سەنەمىن.
ەرجان قۇتتىباەۆ,
ءبىلىم بەرۋ ءىسىنىڭ ۇزدىگى, تارباعاتاي اۋداندىق ءماسليحاتىنىڭ دەپۋتاتى
شىعىس قازاقستان وبلىسى
