اقتوبە وبلىسىندا «اتامەكەن» كاسىپكەرلەر پالاتاسىندا قازاقستان مەن رەسەي مەملەتتىك شەكارالارى اراسىنداعى داۋلى جاعدايلاردىڭ ورىن الۋىنىڭ الدىن-الۋ جانە ەكسپورتتىق باقىلاۋعا جاتاتىن كولىك جۇرگىزۋشىلەرى مەن جۇك يەلەرىنە اقپارات بەرۋ ماقساتىندا دوڭگەلەك ۇستەل وتكىزىلدى.
قازاقستان رەسپۋبليكاسى اۋماعىنان اۆتوكولىكپەن مىناداي مەتالل تۇرلەرىن شىعارۋعا تىيىم سالىنادى: قارا جانە ءتۇرلى ءتۇستى مەتالل قالدىقتارى (تن ۆەد ەاەس 7204, 7404 00, 7602 00, 8548 10 210 0, 8548 10 290 0, 8548 10 910 0 كودتى), سونداي-اق پايدالانىلعان جانە ىستەن شىققان قۇبىرلار, رەلستەر, تەمىرجول توسەمدەرى مەن جىلجىمالى قۇرامى (كودى - تن ۆەد ەاەس 7302, 7303, 7304, 7305, 7306, 8607).
الايدا تىيىم سالۋ قوسىندىلانعان جانە كورروزياعا ءتوزىمدى بولاتقا (EAU EEU 7204 21 1 00 0, 7204 21 900 0 كودتارى) جانە باسقا (تن ۆەد ەاەس 7204 29000 0 كودتى) مەتالل قالدىقتارىنا قولدانىلمايدى.
جيىنعا شاقىرىلعان اقتوبە وبلىسى ۇقق شەكارا قىزمەتى جانە وبلىستىڭ مەملەكەتتىك كىرىس دەپارتامەنتىنىڭ لاۋازىمدى تۇلعالارىنىڭ ايتۋىنشا, تىيىم سالۋ ىشكى نارىقتى شيكىزاتپەن قامتاماسىز ەتۋ جانە «كولەڭكەلى اينالىمدى» بولدىرماۋ ماقساتىندا جاسالىپ وتىر. وڭىردەگى مەتالل ساۋداسىمەن اينالىساتىن كاسىپكەرلەر بولسا, قولدانىسقا ەنگىزىلگەن زاڭ اكتىسىنىڭ بيزنەسكە كەدەرگى كەلتىرەتىن بىرنەشە ماسەلەلەردىڭ تۋىنداتاتىنىن ايتتى. اتاپ ايتقاندا, كاسىپكەرلەردىڭ الدىن-الا دايىندالىپ قويىلعان مەتالل لومدارىن شىعاۋعا تىيىم سالىنعاندىقتان, ايتارلىقتاي شىعىنعا ۇشىراۋى جانە تىيىم سالۋ اۆتوكولىك تاسىمالىنا عانا سالىناتىندىقتان, تەمىر جول كولىگىمەن تاسۋدىڭ قيىندىقتارى بولىپ وتىر. سونىمەن قاتار, كاسىپكەرلەر مەتاللدى سىنامادان وتكىزۋ جۇمىستارىنىڭ قولايسىزدىقتارى تۋرالى دا ايتىپ ءوتتى.
«كاسىپكەرلەر مەتالل سىنامالارىن انىقتاۋ ءۇشىن مەملەكەتتىك كىرىس دەپارتامەنتىنە كەلىپ, ءوتىنىش بەرسە بولادى. بۇل ءۇشىن بىزدە ارنايى ءبولىم جۇمىس ىستەيدى. انىقتاما ارقىلى كەز-كەلگەن كەدەن ورنىنان وتە بەرۋگە بولادى»,-دەدى مكد باسقارماسى ساراپشىلىق باقىلاۋ ءبولىمىنىڭ باسشىسى ورازعالي دارىباەۆ. ايتا كەتەلىك, ەلىمىزدە قارا جانە ءتۇرلى-ءتۇستى مەتالدى شەتەلگە شىعارۋعا تىيىم سالۋ بۇدان بۇرىن دا ەنگىزىلىپ كەلگەن. الايدا, ولاردىڭ مەرزىمى 6 ايدان اسپاعان. كاسىپكەرلەر پالاتاسىنىڭ ماماندارى تىيىم سالۋعا بايلانىستى كاسىپكەرلەردىڭ جەكەلەگەن ماسەلەلەرى بويىنشا قۇقىقتىق كەڭەس بەردى.
تەمىر قۇسايىن,
«ەگەمەن قازاقستان»
اقتوبە وبلىسى
