قازاقستاندىق بوكسشى گەننادي گولوۆكيننىڭ بۇرىنعى قارسىلاستارى – ورتا سالماقتاعى ساۋل «كانەلو» الۆارەس پەن IBF تيتۋلىنىڭ يەگەرى دەنيەل دجەيكوبس رينگتە كەزدەسەدى. جەتەكشى بوكسشىلار اراسىنداعى جەكپە-جەك 2019 جىلدىڭ 4 مامىرىنا جوسپارلانعان.
«سينكو دە مايو (5 مامىر) مەرەكەسى قارساڭىندا بولاتىن جەكپە-جەگىم تۋرالى قۋانا حابارلايمىن. ءوزىمنىڭ جەڭىمپاز بولاتىنىما كۇمانىم جوق جانە ورتا سالماقتاعى ءابسوليۋتتى الەم چەمپيونى اتاعىنا يە بولۋىما ءبىر عانا قادام قالدى», — دەدى ساۋل «كانەلو» الۆارەس.
ءوز كەزەگىندە امەريكاندىق بوكسشى دەنيەل دجەيكوبس تە بۇل كەزدەسۋدى كوپتەن كۇتكەنىن جەتكىزىپ, ءوزىنىڭ جەڭىمپاز بولاتىنىنا سەنىمدىلىگىن ءبىلدىردى.
«مەن بۇل مۇمكىندىكتى كوپتەن كۇتكەن ەدىم. مەن ارقاشان «كانەلونى» جەڭە الاتىنىمدى ءبىلدىم جانە 4 مامىر كۇنى مەنىڭ ونى دالەلدەۋگە مۇمكىندىگىم بولادى. ءتورت جىلعا جۋىق «كانەلو» اقش-تان كەلگەن ۇمىتكەرمەن جەكپە-جەككە تۇسكەن جوق. مۇنىڭ ايتۋلى وقيعا بولاتىنىنا سەنىمدىمىن», — دەدى دجەيكوبس.
بۇعان دەيىن ەكى بوكسشى دا رينگتە قازاقستاندىق گەننادي گولوۆكينمەن كەزدەسكەن بولاتىن. 2018 جىلدىڭ قىركۇيەك ايىنداعى جەكپە-جەكتە مەكسيكالىق ساۋل الۆارەس GGG-نى جەڭدى.
