اسىرەسە, دەمالىس كۇندەرى ساۋدا ورىندارى ماڭايىندا كولىكتەردىڭ كەپتەلىسىن ءجيى كەزدەستىرۋگە بولادى. ماسەلەن, اۋىلدان كەلگەن اعايىندار «ارمان» ورتالىق بازارىنا جەتۋ ءۇشىن كولىكتەرىن الىسقا تاستاپ كەتۋگە ءماجبۇر. ءسويتىپ, ساتىپ العان زاتتارىن جاياۋ-جالپىلاپ تاسۋلارىنا تۋرا كەلەدى.
جەرگىلىكتى بيلىككە دەگەن وكپەسى قارا قازانداي كاسىپكەرلەردىڭ ءبىرى – سەرگەي كرۋپەنيچ. ول جامبىل اۋدانىنىڭ ورتالىعى پرەسنوۆكادا تۇرادى. وندا ورنالاسقان دۇكەنگە تاۋارلار الۋ ءۇشىن وبلىس ورتالىعىنا اپتاسىنا 2-3 مارتە قاتىنايدى. ءار كەلگەن سايىن وسىنداي قيىندىقتارعا تاپ بولادى.
«كۇندىز بازار اۋماعىنا كىرۋ مۇلدەم مۇمكىن ەمەس. باستى ماشاقات جاقىن جەرلەردە اۆتوتۇراق قاراستىرىلماعان. سوندىقتان ەلدەن تۇندەلەتىپ شىعىپ, ەرتەرەك كەلۋگە تىرىسامىز» دەيدى س. كرۋپەنيچ.
ارنايى اۆتوتۇراقتار كوپقاباتتى ۇيلەردە دە جەتكىلىكسىز. مەكتەپ اۋلالارىنا دا قاجەت. شەتىن ماسەلەنى قالالىق قوعامدىق كەڭەستىڭ مۇشەلەرى شاھار باسشىلىعىنا جەتكىزىپتى. الەكساندر كازانتسەۆتىڭ ايتۋىنشا, الەۋمەتتىك ماڭىزى بار نىسانداردا اۆتوتۇراقتىڭ ازدىعىنا قاتىستى ەسكەرتۋلەر مەن ۇسىنىستار جيناقتالىپ, اكىمدىك قاراۋىنا ۇسىنىلىپتى.
«زاڭدا 1 مەتر جەر ءۇشىن 5,79 تەڭگە سالىق تولەۋ كورسەتىلگەن. ونى 10 ەسەگە دەيىن وسىرۋگە بولادى. وسىنى العا تارتىپ, جەرگىلىكتى بيلىك سالىقتى ارتتىرعىسى كەلدى. ءبىز بۇعان جول بەرمەدىك. قازىناعا تۇسەتىن اقشانىڭ مولشەرىن سول كۇيىندە قالدىردىق. نەگە دەسەڭىزدەر, ساۋدا ورىندارىنىڭ يەلەرىنە پاركينگ سالۋ, اۆتوتۇراقتارىن كەڭەيتۋ مۇمكىندىگىن بەرۋ قاجەت. كاسىپكەرلەر ەسەلەپ سالىق تولەگەنشە وسىنداي پايدالى ىسپەن اينالىسقاندارى دۇرىس دەگەن شەشىمگە كەلدىك» دەيدى قالالىق ءماسليحاتتىڭ دەپۋتاتى.
بەرەكە ىقشام اۋدانىنداعى مالايا جانە 5-ءشى سەننايا كوشەلەرىن كەڭەيتۋ ارقىلى اۆتۇراقتار سالۋ تۋرالى جوسپار 2017 جىلى ازىرلەنگەنىمەن, جوبا ءالى كۇنگە دەيىن قولداۋ تاپپاپتى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
