وتكەن جىلى 75 زاڭ بۇزۋشىلىق اشكەرەلەنگەن. ونىڭ 25-ءى پارا الۋ بولسا, 16-سى – الاياقتىق. قىلمىستىق جاۋاپكەرشىلىككە تارتىلعان 35 لاۋازىمدى تۇلعانىڭ 14-ءى – اكىمدىك, 7-ءى - ىشكى ىستەر ورگاندارىنىڭ قىزمەتكەرلەرى. «بارماق باستى, كوز قىستىلىقتىڭ» كوشىن اكىمدىكتەگىلەر باستاپ تۇر. ولاردان قۇرىلىس, تۇرعىن ءۇي-كوممۋنالدىق شارۋاشىلىعى جانە قۇقىق قورعاۋ سالاسىنىڭ قىزمەتكەرلەرى دە قالىسار ەمەس.
«بىلتىر 63 ءىس سوتقا جىبەرىلدى. ونىڭ ءبىرى وبلىستىق مەملەكەتتiك ساۋلەت-قۇرىلىس باقىلاۋ جانە ليتسەنزيالاۋ باسقارماسىنىڭ بۇرىنعى باسشىسى مۇرات ابىلاەۆقا قاتىستى. ول قىلمىستىق جوسپار قۇرىپ, «كورسەتىلگەن» ءار قىزمەتى ءۇشىن 700–1500 دوللار ارالىعىندا پارا الىپ كەلگەن. ەكس-شەنەۋنىك «اۋزىن مايلاعانداردى» ءتيىستى ەمتيحاننان سۇرىنبەي وتكىزىپ, تەحنيكالىق قۇجاتتاردى ەش كەدەرگىسىز جاساپ بەرىپ وتىرعان. ءتىپتى, استانا, اقتاۋ, شىمكەنت قالالارىندا اتتەستاتسيادان وتە الماي جۇرگەندەر وسىندا كەلىپ, «مايشەلپەككە باتقان». ابىرويى ايرانداي توگىلگەن مەملەكەتتىك قىزمەتشى 8 جىلعا باس بوستاندىعىنان ايىرىلىپتى.
دەپارتامەنت باسشىسى ەلەنا ستەپاتەنكونىڭ ايتۋىنشا, تايىنشا اۋدانىنىڭ اكىمى ۆلاديمير دۋدوۆتىڭ قىزمەت بابىن جەكە باسىنا پايدالانۋ ارەكەتى ادەپ جونىندەگى كەڭەستە تالقىلانىپ, قىزمەتىنەن بوساتۋ تۋرالى ۇسىنىس ايتىلىپ, شەشىم ورىندالعان. لاۋازىمدى تۇلعا يەسى ەكى مارتە اپپەللياتسيالىق شاعىم تۇسىرگەنىمەن, قاناعاتتاندىرىلماعان.
جيىندا مامليۋت اۋدانىنىڭ بۇرىنعى اكىمى جاستىلەك سىزدىقوۆتىڭ كاسىپكەردەن185 مىڭ رۋبل پارا بوپسالاعانى ءۇشىن قىزمەتتەن بوساتىلعانى, 22 ميلليون تەڭگە ايىپپۇل سالىنعانى دا ايتىلدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
