قازاقستان • 18 قاڭتار، 2019

ينسپەكتور ولىمىنە قاتىستى كۇدىكتىلەر انىقتالدى

366 رەتكورسەتىلدى

ەلىمىزدىڭ ىشكى ىستەر ءمينيسترى قالمۇ­حانبەت قاسىموۆ قاراعاندى وبلىسىندا مەرت بولعان قورىقشىعا شابۋىلداعان كۇدىكتىلەردىڭ انىقتال­عانىن ايتتى. ونىڭ ايتۋىنشا، وقيعا ورىن العان جەردە ەكى كولىك بول­عانى بەلگىلى بولىپ وتىر. «وقيعانى كور­گەندەر بار. ولار ەكى كولىكپەن جۇر­گەن. قىلمىستى ءبىر كولىكتەگى ءۇش ادام جاساعان. ەكىنشى كولىكتەگىلەردى انىق­تاۋ ارقىلى قىلمىس جاسادى دەگەن كۇدىكتىلەردى انىقتادىق»، دەيدى ق.قاسىموۆ.

الايدا جۋرناليستەرگە بەرگەن جاۋابىندا مينيستر كۇدىكتىلەردىڭ قىزىلوردا وبلى­سىنىڭ تۇرعىندارى ەكەنىن عانا حابارلاپ، قىلمىسكەرلەردىڭ سانى قانشا ەكەنىن ايتپادى. جالپى وقيعا بويىنشا قىلمىستىق كودەكستىڭ «ادام ءولتىرۋ» بابىمەن ءىس قوزعا­لىپ، كۇدىكتىلەرگە ىزدەۋ جاريالانعان.

قايعىلى جاعدايدان كەيىن مارقۇمنىڭ تۋىستارىمەن سويلەسكەن ۋاقىتتا براكونەرلەر شابۋىلىنان قازا تاپقان ينسپەكتور ەرلان نۇرعاليەۆتىڭ اۋرۋحاناعا جەدەل ەمەس، كەش  جەتكىزىلگەندىگى بەلگىلى بولىپ وتىر.

«14 قاڭتار كۇنى شامامەن كەشكى سا­عات 6-دا اعاما براكونەرلەر شابۋىل جاسادى دەگەن حابار جەتتى. مەن دەرەۋ بار­لىق جەدەل قىزمەتتەرگە حابارلاستىم، ماعان قىل­مىسكەرلەردى ۇستاۋ جوسپارى جاريا­لان­عانىن ايتتى.  ەرلاننىڭ قانسىراپ جات­قان جەرىن انىقتاۋ قيىن بولدى، براكونەرلەر ماشي­نانىڭ كىلتى مەن GPS قۇرىلعىسىن الىپ كەتكەن. ەرلاننىڭ قاسىنداعى جۇمىس­تاسى حابارلاستى. ول ماڭدا تەلەفون ۇستا­مايدى، ءبىر امالىن تاۋىپ حابارلاسقان ەكەن. ءبىز ولاردى ىزدەستىرۋدى جەدەلدەتۋ ءۇشىن تىك­ۇشاق ۇشىرۋ كەرەك ەكەنىن ايتىپ ەدىك، بىراق رۇقسات ەتپەدى»، دەيدى مارقۇمنىڭ ءىنىسى نۇرلان نۇرعاليەۆ.

ونىڭ ايتۋىنشا، ساناۆياتسيا شاقىرىل­ماعان. سول سەبەپتى ەرلان نۇرعاليەۆتى رەانيماتسياسى بار اۋرۋحاناعا 12 ساعاتتا ارەڭ جەتكىزگەن.

ء«بىز قاراعاندى وبلىسى، قاراقايىڭ كەنت­ىندە ماشينانى كۇتىپ الدىق. ەرلاننىڭ قولىن ۇستاعانىمدا ول قورىلداپ جاتتى، جەلكە تۇسىنان جارالانعانىن كوردىم. 80 شاقىرىم جەردەگى بارشينو اۋىلىنا جەتكەنشە «ساناۆياتسيا شاقىرىڭدارشى» دەپ جالىندىم. بىراق ەشكىم قۇلاق اسپادى، شاقىرمادى. ءسويتىپ قورعالجىنعا كەلدىك. جەدەل جاردەم ماشيناسى دا، رەانيماتسيا دا جوق ەكەن. ءسويتىپ مالينوۆكاعا كەلگەندە جەدەل جاردەمگە حابارلاستىق. ولار دا «قالاعا كىرەبەرىستەن عانا الىپ كەتە الامىز» دەدى. اۋرۋحاناعا تاڭعى 6-دا جەتتىك. ارادا قانشا ۋاقىت ءوتتى!»، دەيدى مەرت بولعان قورىقشىنىڭ باۋىرى.

بيىل قاراعاندى وبلىسىندا وسىمەن ەكىنشى رەت زاڭسىز كيىك اتۋ فاكتىسى تىركەلىپ وتىر. ايدىڭ باسىندا ۇلىتاۋ اۋدانىندا پوليتسيا قىزمەتكەرى زاڭسىز كيىك اۋلادى دەگەن كۇدىكپەن ۇستالعان بولاتىن.

ميراس اسان،

«Egemen Qazaqstan»

سوڭعى جاڭالىقتار

تەرەزەدەن قاراما...

رۋحانيات • كەشە

اعا مەن ءىنى

قوعام • كەشە

ىسقاق قاجى اۋليە

رۋحانيات • كەشە

قابان، تاڭكى جانە بىدىق

رۋحانيات • كەشە

قايىق كۇتكەن كۇن

رۋحانيات • كەشە

ۇقساس جاڭالىقتار