وبلىستىق اكىمدىك سوڭعى ءۇش جىلدا وبلىس پەن اۋدان اۋرۋحانالارىن حالىقارالىق ستاندارتتارعا سايكەس كەلەتىن جابدىقتارمەن قامتاماسىز ەتۋ ءۇشىن 18,8 ميلليارد تەڭگە قارجى بولگەنى بەلگىلى. ىسكە اسىرىلعان باعدارلاما اياسىندا ءوڭىردىڭ دەنساۋلىق ساقتاۋ باسقارماسى انا مەن بالا, قاناينالىم جۇيەسىنىڭ اۋرۋلارى, ونكولوگيا, تراۆموتولوگيا مەن ورتوپەديا باعىتىندا تاجىريبەلى ساراپشىلاردى تارتا وتىرىپ, كەشەندى اۋديت شارالار جۇرگىزگەن. ناتيجەسىندە 2018 جىلى وسكەمەن قالاسىندا ەلىمىزدەگى تۇڭعىش روبوتتى حيرۋرگيا جانە ترانسپلانتولگيا ورتالىعى, التاي مەن اياگوز اۋداندارىندا ينسۋلت ورتالىقتارى, سەمەي قالاسىندا ورتوپەديا جانە پوليتراۆما ورتالىعى مەن جەدەل مەديتسينالىق كومەك اۋرۋحاناسىنىڭ نەگىزىندە نەيروحيرۋرگياعا ارنالعان گيبريدتىك وتا جاساۋ بولمەسى قۇرىلىپ, حالىققا پايداسىن تيگىزە باستادى. مۇنىمەن قوسا, مەديتسينالىق قىزمەتكەرلەردى ەل ءىشى مەن شەتەلدە وقىتۋ بويىنشا ناقتى شارالار قابىلدانىپ, ارنايى باعدارلاما ىسكە اسىرىلۋدا. ونىڭ ماقساتى 2020 جىلعا دەيىن مۋلتيپاندىك بريگادالار پرينتسيپىمەن كەمىندە 300 ماماننىڭ قۇزىرەتتىلىگىن ارتتىرىپ, بىلىكتىلىكتەرىن جەتىلدىرۋ. سوڭعى ەكى جىلدىڭ وزىندە 153 مامان ۇلىبريتانيا, گەرمانيا, جاپونيا جانە پولشا ەلدەرىنىڭ جەتەكشى كلينيكالارىندا وقۋدان وكەن.
ءبىلىم مەن دەنساۋلىق ساقتاۋ سالالارىنا قوماقتى قارجى باعىتتالىپ وتىرعانىن تىلگە تيەك ەتكەن ايماق باسشىسى استانانىڭ جەتەكشى ورتالىقتارىنا وبلىستىڭ اۋرۋحانالارىندا فيليالدار اشۋدى, ستراتەگيالىق ارەكەتتەستىكتىڭ وزگە دە جولدارىن قاراۋدى ۇسىندى. مۇنداعى باستى ماقسات – شىعىسقازاقستاندىق كلينيكالاردىڭ ەلىمىزدەگى جەتەكشى ورتالىقتارمەن جان-جاقتى سەرىكتەستىگىن نىعايتۋ ارقىلى زاماناۋي مەديتسينانىڭ وڭ تاجىريبەلەرىن باسشىلىققا الا وتىرىپ, وڭىرلىك دەڭگەيدە جوعارى ساپالى مەديتسينالىق قىزمەت كورسەتۋدى قامتاماسىز ەتۋ.
ءوڭىردىڭ مەديتسينالىق ورتالىقتارى استانا دەڭگەيىنەن ەش كەم ەمەستىگىن ەرەكشە اتاپ وتكەن ەلىمىزدىڭ جەتەكشى ورتالىقتارىنىڭ باسشىلارى وبلىستا قولعا الىنعان ناقتى شارالاردىڭ وزگە وڭىرلەرگە ۇلگى بولاتىندىعىن, سوڭعى جىلدارى شىعىس قازاقستان وبلىسىمەن جوسپارلى تۇردە جەمىستى قىزمەت جاساپ وتىرعاندارىن باياندادى. اتاپ ايتقاندا, ۇلتتىق عىلىمي كارديوحيرۋرگيا ورتالىعىنىڭ باسقارما توراعاسى يۋ.پيا رەسپۋبليكالىق ورتالىقتاردىڭ شىعىس قازاقستاننىڭ جەتەكشى كلينيكالارىمەن ءوزارا ستراتەگيالىق ارەكەتتەستىگى ساپا دەڭگەيىن ارتتىرىپ, ءوڭىر جۇرتشىلىعىنا مەديتسينالىق كومەكتىڭ قولجەتىمدىلىگىن قامتاماسىز ەتەتىندىگىنە توقتالسا, ۇلتتىق نەيروحيرۋرگيا ورتالىعىنىڭ باسقارما توراعاسى س.اقشولاقوۆ ينسۋلت ورتالىقتارىن قۇرۋ جونىندەگى وڭىرلىك جول كارتاسىنىڭ تيىمدىلىگىن اتاپ ءوتتى. تراۆماتولوگيا جانە ورتوپەديا عىلىمي-زەرتتەۋ ورتالىعىنىڭ ديرەكتورى ن.باتپەنوۆ سەمەي قالاسىندا ورتوپەديا جانە پوليتراۆما ورتالىعىنىڭ جابدىقتالۋ دەڭگەيىن جوعارى باعالاپ, 2018 جىلعى جەلتوقسان ايىندا ورتالىق ماماندارىمەن بۋىنداردى ەندوپروتەزدەۋ جانە تىزە بۋىنىنىڭ بايلانىستىرۋشى اپپاراتىن قالپىنا كەلتىرۋ بويىنشا وتا جاساپ, شەبەرلىك-ساعاتتارىن وتكىزگەندىگىن ايتتى.
كەزدەسۋ سوڭىندا وسكەمەن قالاسىندا قورىتىندى كەڭەس وتكىزۋ, كلينيكالار اراسىنداعى ستراتەگيالىق ارەكەتتەستىكتى نىعايتۋ جونىندە دەنساۋلىق ساقتاۋ باسقارماسىنا تاپسىرما بەرىلىپ, تانىسۋ ءۇشىن استانالىق ورتالىقتارعا جولدانعان ءتيىستى شارتتاردى راسىمدەۋ تۋرالى شەشىم قابىلداندى.
ازامات قاسىم,
«ەگەمەن قازاقستان»
وسكەمەن
