وسى ەسەپتىك كەزدەسۋلەردە ءجيى كوتەرىلەتىن ماسەلەلەردى سارالاي كەلە شىمكەنت اۋىز سۋعا ءزارۋ, جارىعى ءجيى سونەتىن, قوعامدىق كولىك دۇرىس قاتىنامايتىن, ورتالىقتان تىس جەرلەردەگى جولدارى باتپاق قالا ەكەن دەگەن ويعا قالاسىز. ەسەپتىك كەزدەسۋلەردە تۇرعىندار اكىمدەردىڭ جۇمىسىنا كوڭىلى تولمايتىنىن بىلدىرۋدە.
ء«سىزدىڭ اتقارعان جۇمىستارىڭىزعا 283, 282 كۆارتالداعى حالىقتىڭ اتىنان قويار باعام وتە تومەن. ويتكەنى, ءبىزدىڭ كۆارتالدا ىشەتىن سۋ جوق. كادىمگى ىشەتىن اۋىز سۋ جوق. ادام دەگەن كۇنىنە 3 ليتر سۋ ءىشۋ كەرەك. وسى ماسەلەگە بايلانىستى ءبىز كورشىلەرمەن بىرگە قالا اكىمىنىڭ اتىنا, سىزگە دە بىرنەشە رەت ارىز جازدىق. ەشقانداي ناتيجە جوق. ودان كەيىن سىزدەرگە ارنايى ۇسىنىس حات جازدىم. «ەش بولماسا ۆودوۆوز كولىگىن جۇرگىزىڭىز نەمەسە كولونكا قويىپ بەرىڭىز» دەپ. ونى دا شەشە المادىڭىز. ءالى كۇنگە جەكەمەنشىك ترانسفورماتورعا كۇنىمىز قاراپ وتىر. جارىق ءجيى سونەدى. ءورت شىعىپ, ءبىر ءۇي وتقا ورانعاندا ءورت ءسوندىرۋشى كولىك ساز-بالشىق جولدان وتە المادى. سەبەبى, جولعا توسەلگەن تاستىڭ ەنى – 3 مەتر. ول جەرگە ءورت ءسوندىرۋشى كولىگى سىيمايدى», - دەدى اباي اۋدانىنىڭ اكىمى بۇحارباي پارمانوۆتىڭ ەسەبى كەزىندە ءسوز العان كۆارتال تۇرعىندارىنىڭ توراعاسى, قوعام بەلسەندىسى ارمان الپىسوۆ.
شىمكەنت قالالىق ەنەرگەتيكا جانە كوممۋنالدىق شارۋاشىلىق باسقارماسى باسشىسىنىڭ ورىنباسارى نۇرلان جامانكوزدىڭ قالا تۇرعىنى كوتەرگەن ماسەلەلەر بويىنشا بەرگەن جاۋابى كوپشىلىكتى قاناعاتتاندىرمادى. ال اۋدان اكىمى باسقارما وكىلىنە قاراتا: ء«بىز پروتوكولعا ەنگىزىپ, قارجى ءبولدىرتىپ, مىندەتتى تۇردە سۋدى تاسىمالداۋدى قامتاماسىز ەتۋىمىز كەرەك. دەمەۋشىلەر ءبىر رەت, ەكى رەت تاسيدى, بولدى, ودان ارى تاسىمايدى. بۇل كىسىلەر ءار جەردەن جاعىمسىز سۋ ءىشىپ جاتىر. ەرتەڭگى كۇنى اۋرۋ تاراپ كەتسە, ءبىز تىكەلەي جاۋاپتى بولامىز. ءسىز ايتىپ جاتىرسىز, بيۋدجەتتەن قارجى قارالماي جاتىر, مۇمكىنشىلىك جوق دەپ. مەنىڭ دە مۇمكىنشىلىگىم جوق. نە ىستەۋىمىز كەرەك؟ دۇرىس كوزقاراسپەن قاراڭىز. مەكەمەلەر بار بىزدە... ءبىر-ەكى اۆتوكولىك تابايىن. بىراق, جىل ون ەكى اي قامتاماسىز ەتە المايمىن عوي. ءسىز بىزگە جاردەم بەرىڭىز», - دەپ ۇسىنىسى مەن ءوتىنىشىن ءبىلدىردى. وسىلايشا, حالىق اكىم ب.پارمانوۆتان, ال ول باسقارمادان كومەك سۇرادى.
شىمكەنت قالاسى قاراتاۋ اۋدانىنداعى جيىندا دا ەلدى مەكەندەردە جىلۋ, جارىق, اۋىز سۋ, جول سالاسىندا پروبلەما كوپ ەكەندىگى ايتىلدى. سايرام تۇرعىن الابىنان سايلانعان ءماسليحات دەپۋتاتى قۇسان احمەتحانوۆتىڭ ايتۋىنشا, اۋىز سۋ ماسەلەسى 11 جىل بويى كوتەرىلىپ كەلەدى ەكەن. ء«ۇش رەت رەسپۋبليكالىق بيۋدجەتتەن 3 ميلليارد تەڭگەدەن ارتىق قارجى جۇمسالدى. بىراق, بۇگىنگە دەيىن بىردە-ءبىر ەلدى مەكەندە تاۋلىگىنە 24 ساعات سۋ بەرىلمەيدى. كارىز جۇيەسىنىڭ جۇمىسى دا ناشار. ارىق, كانالداردى تازارتۋدى كۇن تارتىبىنە قويساڭىزدار», - دەدى دەپۋتات.
بۇل ورايدا اۋدان اكىمى يسامۋددين قانتورەەۆ اۋىز سۋ ماسەلەسى بويىنشا «ەۆروسەرۆيس» جشس مەكەمەسى جۇمىس ىستەپ جاتقانىن العا تارتىپ, كەلەر جىلدىڭ سوڭىنا دەيىن 3000 ابونەنتكە اۋىز سۋ بەرۋگە ۋادە ەتتى. قالا تۇرعىنى قۋانىش ءابدىراحمانوۆتىڭ شاعىمىنا قاراعاندا, سايرام اۋىلدىق وكرۋگىندەگى 58 ترانسفورماتوردىڭ جارتىسى جەكەمەنشىكتىڭ قولىندا. جارىق كۇنىنە 3-4 رەت سونەدى. سونداي-اق سايرام, وتەمىس, شاپىراشتى ەلدى مەكەندەرىنىڭ مادەنيەت ۇيلەرى كۇردەلى جوندەۋ جۇرگىزۋدى قاجەت ەتەدى. ال قىزىلسۋ, مارتوبە, وتەمىس سىندى ەلدى مەكەندەرگە ورتالىقتان قوعامدىق كولىك از قاتىنايدى.
ءيا, ءبىز تۇرعىندار ەسەپتىك كەزدەسۋلەردە كوتەرگەن ماسەلەلەردىڭ بىرقاتارىن عانا كەلتىردىك. دەگەنمەن, رەسپۋبليكالىق ماڭىزعا يە بولعان ءۇشىنشى مەگاپوليستەگى الەۋمەتتىك ماسەلەلەردىڭ باسىم بولىگى قالاعا ىرگەدەگى اۋدانداردان قوسىلعان ەلدى مەكەندەردە ەكەنىن ايتا كەتەلىك.
ايتپاقشى, ەسەپ بەرگەن كۇننىڭ ەرتەڭىنە اباي اۋدانىنىڭ اكىمى ب.پارمانوۆ كۆارتالداعى تۇرعىندارعا ارناپ «ۆودوۆوزبەن» سۋ جىبەرگەن ەكەن. الايدا سۋ تاسيتىن كولىك كۆارتالدىڭ باتپاق كوشەلەرىنە تىعىلىپ, دىتتەگەن جەرىنە جەتە الماي قالعان.
عالىمجان ەلشىباي,
«ەگەمەن قازاقستان»
شىمكەنت
