جيىن بارىسىندا وبلىستىق ءدىن ىستەرى باسقارماسىنىڭ باسشىسى جانگەلدى وماروۆ بايانداما جاساپ, بىلتىر جىل باسىندا جاسالعان وبلىس اكىمى مەن قالا جانە اۋدان اكىمدەرى اراسىنداعى باسقارماعا تيەسىلى ەكى ينديكاتورلىق كورسەتكىشتىڭ تولىعىمەن ورىندالعانىن اتاپ ءوتتى. سونداي-اق, باسقوسۋدا وتكەن جىلدىڭ 3 مامىرىندا وبلىس اكىمىنىڭ توراعالىعىمەن وتكىزىلگەن كەڭەستىڭ №51 حاتتاماسىنا سايكەس بەرىلگەن تاپسىرمالاردىڭ ورىندالۋ بارىسى دا تالقىلاندى.
باسقارمانىڭ مالىمەتىنە سۇيەنسەك, وتكەن جىلى «نۇر مۇباراك» ۋنيۆەرسيتەتىنىڭ وقىتۋشىلارى قۇرامىنىڭ قاتىسۋىمەن وڭىردەگى 100 يمامعا ارنالعان ەكى اپتالىق وقىتۋ كۋرسى ۇيىمداستىرىلعان. بۇعان دەيىن يمامى بولماعان وبلىستاعى 16 مەشىتتىڭ دە ماسەلەسى تولىعىمەن شەشىلىپ, ءدىني قىزمەتشىلەرمەن قامتىلعان. سونىمەن قاتار, باسقارما باسشىسى مەكتەپتەردەگى «زايىرلىلىق جانە ءدىنتانۋ نەگىزدەرى» پانىنەن ساباق بەرەتىن بارلىق مۇعالىمدەردىڭ ارنايى كۋرستان وتكەنىن دە جەتكىزدى. سونىمەن قاتار, ءپاندى مەڭگەرۋ دەڭگەيىن انىقتاۋ ءۇشىن 450 مۇعالىم جانە 16127 وقۋشىنىڭ قاتىسۋىمەن تەستىلەۋ جۇرگىزىلگەن.
دەي تۇرعانمەن, شەشىمىن تاپپاعان ماسەلەلەر دە ايتىلماي قالمادى. اتاپ ايتساق, 23 حاتتامالىق تاپسىرمانىڭ 14-ءى عانا شەشىمىن تاپسا, قالعانى ورىندالماعان بولىپ شىقتى. وڭىردەگى جەكە مەنشىك يەلىگىندەگى مەشىتتەردىڭ عيماراتتارى مەن جەر تەلىمدەرىن قازاقستان مۇسىلماندارى ءدىني باسقارماسىنىڭ مەنشىگىنە وتكىزۋ ماسەلەسى تولىعىمەن شەشىمىن تاپپاعان. بۇگىندە 19 مەشىتتىڭ قۇجاتتارى راسىمدەلۋدە دەسەك, 4 مەشىتتى قازاقستان مۇسىلماندارى ءدىني باسقارماسىنىڭ مەنشىگىنە وتكىزۋ ماسەلەسىندە كەدەرگىلەر تۋىنداۋدا. ءتىپتى, شەتەلدە ءدىني ءبىلىم الىپ جاتقان 26 ازاماتتىڭ 10-ى سەنىمدى, 16-ى كۇماندى وقۋ ورىندارىندا وقىپ جاتىر ەكەن. بۇل رەتتە اكىم وقىتۋ كۋرسى مەن مەكتەپتەگى «زايىرلىلىق جانە ءدىنتانۋ نەگىزدەرى» ءپانىنىڭ تاقىرىپتارىن تولىقتىرىپ, ناقتىلاۋعا باسقارمانىڭ اتسالىسۋ كەرەكتىگىن ەسكەرتتى. سونداي-اق, جەكە مەنشىكتەگى مەشىتتەردى قازاقستان مۇسىلماندارى ءدىني باسقارماسىنىڭ مەنشىگىنە وتكىزۋدە تياناقتى جۇمىس جۇرگىزۋدى تاپسىردى.
جيىن بارىسىندا اكىم ءدىننىڭ ۇرپاق تاربيەسىندەگى ماڭىزدىلىعىن ايرىقشا اتاپ ءوتىپ, جاس ۇرپاقتىڭ بويىنداعى يمان مەن ءبىلىم ارقىلى قوعامداعى ادىلەتسىزدىكتەر مەن ارسىزدىقتاردى ايتارلىقتاي ازايتۋعا بولاتىنىن جەتكىزدى.
حاميت ەسامان,
«ەگەمەن قازاقستان»
جامبىل وبلىسى
