«قازگيدرومەت» رمك بق فيليالىنان تۇسكەن اقپاراتى بويىنشا قاردىڭ ورتاشا قالىڭدىعى بىلتىرعىمەن سالىستىرعاندا اجەپتاۋىر جوعارى. اسىرەسە, ادەتتە قىسى جايلى وتەتىن وڭتۇستىكتەگى بوكەي ورداسى, جانىبەك اۋداندارى بيىل قىس قيىندىعىن, جول ازابىن تارتىپ جاتىر. مىسالى, بوكەي ورداسى, جانىبەك اۋداندارىندا بىلتىر قار بولماسا, بيىل ونىڭ قالىڭدىعى 28-36 سم-گە جەتكەن.
- قىس مەزگىلىندە رەسپۋبليكالىق جانە جەرگىلىكتى ماڭىزداعى جولداردى كۇتۋگە قاجەتتى جانار جاعار-ماي قورى 850 تونناعا جۋىق كولەمدە جاساقتالدى. تايعاق جولعا قولدانۋ ءۇشىن 20 مىڭ تونناعا جۋىق قۇم, 3 مىڭعا جۋىق تۇز جانە 8 مىڭ توننادان استام قۇم-تۇز ارالاس قوسپا دايىنداعان ەدىك. قازىر حالىق يگىلىنە اسىپ جاتىر. قىس مەزگىلىندە رەسپۋبليكالىق جانە جەرگىلىكتى ماڭىزداعى جولداردى كۇتۋگە 357 جول تەحنيكاسىن جۇمىلدىرىپ, 17 جىلىتۋ پۋنكتى ۇيىمداستىرىلدى, - دەيدى باتىس قازاقستان وبلىستىق توتەنشە جاعدايلار دەپارتامەنتى توتەنشە جاعدايلاردىڭ الدىن الۋ ءبولىمىنىڭ باستىعى, ازاماتتىق قورعاۋ مايورى مارس وتاروۆ.
الايدا وسى شارالارعا قاراماستان جىل سايىن رەسپۋبليكالىق جانە جەرگىلىكتى ماڭىزداعى جولداردا قار قۇرساۋىندا قالىپ قوياتىن اۆتوكولىك كوپ. مىسالى, وسى قىستا تج دەپارتامەنتى, جول قىزمەتى مەن پوليتسيا قىزمەتكەرلەرى جانە جەرگىلىكتى اكىمدىكتەر كۇشىمەن جولدا قالعان 94 تەحنيكا مەن 173 ادام قۇتقارىلعان. مۇنىڭ سەبەبى ارنايى جوعارى ءوتىمدى تەحنيكالار جەتىسپەيدى. «قازاۆتوجور» رمك فيليالىنىڭ ارنايى تەحنيكامەن قامتىلۋى نەبارى 50% شاماسىندا عانا ەكەن. «اتالعان قىزمەتتە فۋرالار مەن ۇلكەن جۇك كولىكتەرىن سۇيرەيتىن ارنايى تەحنيكالار جوقتىڭ قاسى» دەيدى مارس وتاروۆ.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
