- ۇلكەنشىعان اۋىلىنىڭ تۇرعىندارى اۋىل سىرتىنان بۇرىنعى جەرتولەنى بايقاپ, قازعان كەزدە اسكەري قازىنا تاۋىپ الىپتى. توپىراق استىنا مۇقيات جاسىرىلعان كەڭەستىك زاماننان قالعان تانك ەكەن. اسكەري تەحنيكانىڭ قاڭقاسىن كورگەن تۇرعىندار جەرگىلىكتى ۋچاسكەلىك پوليتسيا ينسپەكتورىنا حابار بەرگەن. قازىر توپىراققا «تىعىلعان» تانكتى اسكەريلەر الىپ كەتتى, - دەدى بۇل تۋرالى بىزگە پانفيلوۆ اۋدانى اكىمىنىڭ ءباسپاسوز حاتشىسى نۇربول قاناعات.
تابىلعان اسكەري تەحنيكانىڭ كەڭەس اسكەرىنەن قالعانى انىق. از-كەم شەگىنىس جاساساق, 1950-60 جىلدارى سوۆەت وداعى مەن قىتاي حالىق رەسپۋبليكاسىنىڭ اراسىنداعى شيەلەنىس سوعىس جاعدايىنا جەتىپ, ەكى ەل شەكارا ماڭىنا اسكەر شوعىرلاندىرعانى ءمالىم. بۇگىندە كورشى ەلدىڭ تاريحي وقۋلىقتارىنا «قىتاي مەن سسرو اراسىنداعى ۇلى سوعىس» اتتى تاقىرىپپەن كىرگەن بۇل قاقتىعىس قوس مەملەكەت باسشىلارى ماو تسزەدۋن مەن نيكيتا حرۋششەۆتىڭ جەكە امبيتسيالارىنىڭ كەسىرىنەن تۇتانعان دەيدى تاۋەلسىز ساراپشىلار.
قىرعي-قاباق قارىم-قاتىناس كرەملگە ل.برەجنەۆ باسشىلىقا كەلگەندە ءتىپتى شارىقتاپ, دامان ارالىندا جانە جالاڭاشكول زاستاۆاسىنداعى شەكاراشىلار اراسىندا قاندى سوعىس بولعان ەدى. مىنە, وسى تۇستا يەك استىنداعى قىتايدان قورعانۋ ماقساتىندا شەكارا شەبىندەگى الماتى وبلىسىنىڭ پانفيلوۆ, نارىنقول اۋداندارى اسكەري جاعدايعا كوشكەن بولاتىن. سول جىلدارى الماتى قالاسىنان شىعىپ, نارىنقول, كەگەن, ۇيعىر اۋداندارىنا باعىت الاتىن تاس جول جەدەل سالىنىپ, اسكەري ۇشاقتار قونۋعا ىڭعايلانىپ جاسالعانى تۋرالى دا قىزىقتى دەرەك بار.
كەشە ۇلكەنشىعان اۋىلى ماڭىنان تابىلعان تانك تە سول كەزدىڭ مۇراسى ەكەنى انىق. «تابىلعان تانك ادام ومىرىنە قاۋىپ توندىرمەيدى. تەحنيكا تەمىر قالدىعى رەتىندە قايتا بالقىتۋعا جىبەرىلەدى» دەيدى وقيعاعا تۇسىنىك بەرگەن پوليتسيا وكىلدەرى.
قالماحانبەت مۇقامەتقالي,
«ەگەمەن قازاقستان»
الماتى وبلىسى
