«اقجايىق – ادالدىق الاڭى» جوباسىنا وتكەن جىلى 30 قاراشادا قول قويىلعان. ورال قالاسىنا كەلگەن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسى ا.شپەكباەۆ پەن باتىس قازاقستان وبلىسىنىڭ اكىمى ا.كولگىنوۆ قول قويعان بۇل قۇجات قازاقستان پرەزيدەنتىنىڭ 2018 جىلعى حالىققا جولداۋىنان كەيىن دۇنيەگە كەلگەن «جەمقورلىقتان ادا وڭىرلەر» جوباسى بويىنشا جۇزەگە اسقان بولاتىن.
19 جەلتوقساندا باتىس قازاقستان وبلىسى اكىمدىگى عيماراتىندا «اقجايىق – ادالدىق الاڭى» جوباسىنىڭ ءوفيسى اشىلعان.
- «اقجايىق – ادالدىق الاڭى» جوباسىنىڭ ماقساتى – باتىس قازاقستان وبلىسىندا ازاماتتاردىڭ مەملەكەتتىك بيلىك ينستيتۋتتارىنا سەنىمىن ارتتىرۋ, جەمقورلىق دەڭگەيىن تومەندەتۋ جانە سىبايلاس جەمقورلىقتى قابىلداماۋدىڭ قوعامدىق احۋالىن قالىپتاستىرۋ, - دەيدى جوبا جەتەكشىسى ورىنبەك ءناسيمۋللين.
جوبا تۇرمىستىق سىبايلاس جەمقورلىقتى جويۋ, قوعامدىق باقىلاۋدى جۇزەگە اسىرۋ, سىبايلاس جەمقورلىققا قارسى مادەنيەتتى قالىپتاستىرۋ باعىتىندا جۇمىس ىستەمەك.
- ءتىپتى جول جوندەۋ جۇمىستارى كەزىندە ءتيىستى جول بەلگىلەرىن دەر كەزىندە ورناتپاۋدىڭ ءوزى سىبايلاس جەمقورلىق قاۋپىن تۋدىرادى. بۇل جەردە مەملەكەتتىك مەكەمە مەن پوليتسيانىڭ مۇددەسى بولۋى مۇمكىن. ويتكەنى جول بەلگىسى تالابىن بۇزعانى ءۇشىن سالىناتىن ايىپپۇل جەرگىلىكتى بيۋدجەتكە تۇسەدى. نەمەسە پارا تۇرىندە پوليتسيا قىزمەتكەرىنىڭ قالتاسىندا كەتەدى, - دەيدى ورىنبەك جامبىل ۇلى.
«كۇندەلىكتى تۇرمىستا كەزدەسەتىن جەمقورلىقتى جويۋ - ەلىمىزدىڭ ءار ازاماتىنىڭ مىندەتى» دەيدى «اقجايىق – ادالدىق الاڭى» جوباسىنىڭ جەتەكشىسى. بولاشاقتا جوبالىق كەڭەس اياسىنداعى ساراپشىلىق توپتىڭ قۇرامىنا جەرگىلىكتى باق قىزمەتكەرلەرى شاقىرىلماق.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
