قازىرگى كەزدە ۇزىندىعى 1,8 كم بولاتىن اۋماققا تىرەك قابىرعالارىن ورناتۋ, وزەن تۇبىنە تەمىربەتون توسەۋ جانە تەحنيكالىق جولداردى اباتتاندىرۋ جۇمىستارىنىڭ 65 پايىزى اياقتالعان. اتقارىلعان شارالار ۋچاسكەدە سۋ اۋقىمىن كۇندەلىكتى وتكىزۋ قۋاتىن 10 ەسەگە دەيىن ۇلعايتپاق.
«قۇرىلىس جۇمىستارى بارىسىندا «Tokyo Rope Almaty» زاۋىتىندا شىعارىلاتىن وتاندىق ونىمدەر قولدانىلۋدا. ءوندىرۋشى الەمدىك جوعارى ساپالى ستاندارتقا ساي اۋىر گابيوندارعا 50 جىلدان استام كەپىلدىك بەرۋدە. مەگاپوليس باسشىسى سەلدىڭ الدىن الۋ جۇمىستارىنا ەرەكشە نازار اۋدارىلاتىنىن اتاپ ءوتتى. سوڭعى ءۇش جىل ىشىندە سەل قاۋپى بار ۋچاسكەلەر 67-دەن 12-گە قىسقاردى, توعىز وزەننىڭ ارنالارى رەكونسترۋكتسيالاندى جانە 300 كم ارىق جەلىلەرى قايتا جاسالدى. شاھاردى ودان ءارى دامىتۋداعى باستى قاعيدا قاۋىپسىزدىك پەن تازا ەكولوگيا بولۋى ءتيىس», – دەيدى قالا اكىمدىگىنىڭ ءباسپاسوز قىزمەتىنىڭ وكىلدەرى.
بۇلاردان وزگە, الماتىدا «اقساي» جانە «ايۋساي» جاڭا سۋ بوگەتتەرىن سالۋ ءىسى دە جوسپارلانعان. «مىڭجىلقى» سۋ بوگەتىن رەكونسترۋكتسيالاۋ جۇمىستارى اياقتالۋعا جاقىن. وسىعان دەيىن قالا اۋماعىنداعى ەرمەنساي, كەرەڭقۇلاق, ۇلكەن جانە كىشى قاراسۋ سياقتى ءتورت وزەننىڭ ارنالارى بەكىتىلگەن.
ارمان وكتيابر,
«ەگەمەن قازاقستان»
الماتى
