«بۇل كەلىسىمگە 2018 جىلى ناۋرىزدا استانا قالاسىندا قول قويىلدى. كەلىسىمدى راتيفيكاتسيالاۋ جاعدايىندا كوشى-قون اعىمدارىن رەتتەۋ مەن ازاماتتىق ماسەلەلەردى شەشۋ ءۇشىن قولايلى جاعداي جاسالادى. قۇجات بىرقاتار باعىت بويىنشا اقپارات الماسۋدى كوزدەيدى. وسى ورايدا, ستاتيستيكالىق, قۇقىقتىق جانە عىلىمي-ادىستەمەلىك اقپارات, تاراپتاعى مەملەكەتتەر اۋماقتارىنداعى ەلدەر ازاماتتارى تۋرالى مالىمەتتەر ەسكەرىلەدى. 2018 جىلعى شىلدەدە كەلىسىم تاجىكستان پارلامەنتىمەن راتيفيكاتسيالانعان» دەدى ىشكى ىستەر ءمينيسترى قالمۇحانبەت قاسىموۆ.
ەكى ەل اراسىنداعى اتالعان كەلىسىم كوشى-قون سالاسىنداعى ەكىجاقتى ىنتىماقتاستىق ءۇشىن قۇقىقتىق نەگىز قۇرۋعا باعىتتالعان. كەلىسىم ەكى ەلدىڭ كوشى-قون زاڭناماسى تۋرالى, ونىڭ ىشىندە كوشى-قون پروتسەستەرىن رەتتەۋدى, پانا جانە ازاماتتىق بەرۋ ءتارتىبى تۋرالى مالىمەتتەرمەن الماسۋدى جۇزەگە اسىرۋ ءۇشىن قولايلى جاعداي جاساۋدى, زاڭسىز كوشى-قونعا قارسى كۇرەسۋدى انىقتايدى.
وسى كەلىسىمنىڭ شەڭبەرىندە تاراپتار ۇلتتىق زاڭنامالارعا جانە حالىقارالىق شارتتارعا سايكەس ەكى ەل اۋماعىندا ەڭبەك رەسۋرستارىن تارتۋ سالاسىندا مەملەكەتتىك ورگاندار مەن شارۋاشىلىق سۋبەكتىلەرى اراسىنداعى ىنتىماقتاستىققا جاردەمدەسەدى.
