تاۋەلسىزدىككە يە بولعان ۋاقىت ىشىندە اۋقىمدى ەكونوميكالىق, ساياسي جانە الەۋمەتتىك رەفورمالار جۇزەگە اسىرىلدى. ەلباسى حالىقتى وراسان زور ىستەرگە جۇمىلدىردى, قوعامداعى تاتۋلىق پەن كەلىسىمدى نىعايتۋ ىسىندە الەم ءتالىم الارلىق ساياسات ۇستاندى. ەلىمىزدىڭ سىرتقى ساياسي باعىتىن ءدال نۇسقاپ, قازاق مەملەكەتىنىڭ شەكاراسىن ايقىندادى, تورتكۇل دۇنيەگە تەڭ تەرەزەلى ەل رەتىندە مويىنداتتى.
بيىلعى قازاقستان رەسپۋبليكاسىنىڭ پرەزيدەنتى ن.نازارباەۆتىڭ قازاقستان حالقىنا ارناعان «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىندا قوعامنىڭ بارلىق سالاسىن قامتىدى: ءبىلىم بەرۋ مەكەمەلەرى جانىنان «سارباز» اسكەري-پاتريوتتىق تاربيە بەرەتىن ورتالىقتار, كۋرستار اشۋ جونىندەگى تاپسىرمالار بەرىلدى. بۇل ءوز كەزەگىندە وسكەلەڭ ۇرپاقتىڭ اسكەري قىزمەتكە دەگەن قىزىعۋشىلىعىن ارتتىرىپ قانا قويماي, ەلى مەن جەرىنىڭ شىن قورعانى بولۋ جولىنداعى تالپىنىستى ايقىندايدى. جالپى تاۋەلسىزدىگىنە جيىرما التى جىل ۋاقىت بولعان ەل ەگەمەندىگىنىڭ تاريحىنا ۇڭىلسەك, مەملەكەتىمىزدىڭ الۋان باعىتتاعى تىنىس-تىرشىلىگىنىڭ دامۋى ەلباسىمىزدىڭ حالىققا ارناعان جولداۋلارىنىڭ جەمىسى.
ال ەڭ باستىسى – ەلىمىزدىڭ رۋحىن كوتەرەتىن, ۇلى ماقساتتارعا جەتكىزەتىن «ماڭگىلىك ەل» ۇلتتىق يدەياسى بولىپ تابىلادى. «ماڭگىلىك ەل» يدەياسى – قازاق ەلىنىڭ عاسىرلار بويى ارمانداعان ماقساتى عانا ەمەس, تاۋەلسىزدىك جولىنداعى جانقيارلىق ەڭبەگى مەن تىنىمسىز شىعارماشىلىعىنىڭ ناتيجەلەرى ارقىلى قول جەتكەن اسۋ.
ەلباسىمىز ن.نازارباەۆتىڭ « ۇلى دالانىڭ جەتى قىرى» ماقالاسى – قازاق ەلىنىڭ ومىرىندەگى ەرەكشە مۇرا. اتقا ءمىنۋ مادەنيەتى, ەجەلگى مەتال ءوندىرۋ مەن وڭدەۋ تەحنولوگياسى, اڭ ءستيلى ونەرى, بۇكىل الەمدى تامساندىرعان دالا وركەنيەتىنىڭ جادىگەرى − «التىن ادام» جاۋىنگەرى, تۇركى الەمىنىڭ بەسىگى سانالاتىن التايدان باستاۋ الاتىن تۇركى تاريحى, الەمدىك ەكونوميكانىڭ وركەندەۋىنە سەپتىگىن تيگىزگەن – ۇلى جىبەك جولى جۇيەسى, ەلىمىزدىڭ اۋماعىندا ورىن العان تاريحي جايت قانا ەمەس, سونىمەن قاتار قازاقستاندىقتار ءۇشىن دە اسا قىمبات قۇندىلىقتار, ۇمىتىلماس تاريح بولىپ تابىلادى.
تۇركى الەمى ەجەلدەن قازاقستاندى – كۇللى تۇركى حالىقتارىنىڭ قاسيەتتى قاراشاڭىراعى رەتىندە مويىندايدى. ال كيەلى تۇركىستان قالاسى حالقىمىزدىڭ رۋحاني ورتالىعى عانا ەمەس, سونداي-اق, بۇكىل تۇركى الەمى ءۇشىن كيەلى ورىننىڭ تەك ءبىزدىڭ ەلىمىزدە ورنالاسقانى ءاربىر قازاقتىڭ جۇرەگىندە ماقتانىش سەزىمىن وياتادى.
«رۋحاني جاڭعىرۋ» باعدارلاماسىنىڭ جالعاسى بولاتىن ەلباسىنىڭ تاريحي سانانى جاڭعىرتۋعا باعىتتالعان ۇسىنىستارى مەملەكەتىمىزدىڭ نىعايۋىنا سەپتىگىن تيگىزەتىنىنە تولىق سەنىمدىمىن.
ەلباسىنا ۇلكەن ۇمىتپەن, ساليقالى سەنىممەن قاراي وتىرىپ پاراساتتى شەشىمدەرىنە العىسىمىزدى ايتامىز. ەلباسى جولداۋى ەرتەڭگى كۇنگە دەگەن سەنىمىمىزدى نىعايتا تۇسەدى, « ۇلى دالانىڭ جەتى قىرى» سەكىلدى ماقالالارى جاستاردىڭ ءتۇپ-تامىرىمىزدى جەتە تانۋدىڭ جولى, ۇلتىمىزدىڭ تاريحىن, سالت-ءداستۇرىن ەستەن شىعارماي, ءبىلىپ جۇرۋ ماقساتىندا جاريالانعان. وتانىمىزدىڭ كەمەل كەلەشەگىنە دەگەن جاۋاپكەرشىلىكتى ەلباسىمەن بولىسە وتىرىپ, العا قويىلعان ماقساتتاردى جۇزەگە اسىرۋدا بار كۇش-جىگەرىمىزدى ايامايمىز.
عازيز تۋلەۋشەۆ,
قورعانىس مينيسترلىگى
كەڭەس وداعىنىڭ باتىرى سابىر راحىموۆ اتىنداعى
شىمكەنت رەسپۋبليكالىق «جاس ۇلان» مەكتەبىنىڭ باستىعى,
پولكوۆنيك
