حالقىمىزدىڭ بي ونەرىن ناسيحاتتاۋدا ايرىقشا ەڭبەك ەتىپ جۇرگەن اۋليەاتالىق «اقكەربەز» بي ءانسامبلى تاعى ءبىر بەلەستى باعىندىردى. مىڭ بۇرالا بيلەگەن سەگىز ارۋدان قۇرالعان توپ بۇگىندە ۇلتتىق بي ونەرىن الەمدىك ساحنالاردان ناسيحاتتاۋعا باعىت الدى. ناقتى ايتساق, قازىرگى تاڭدا حالىقارالىق كونكۋرستاردىڭ لاۋرەاتى «اقكەربەز» بي ءانسامبلى بىرىككەن اراب امىرلىكتەرىنىڭ پرەزيدەنتى شەيح حاليفا مەن زايد ءال-ناحايان اتىنداعى گۋمانيتارلىق ۇيىمىنىڭ ۇيىمداستىرۋىمەن ءابۋ-دابي قالاسىندا وتەتىن حالىقارالىق شەيح زايد اتىنداعى مادەني فەستيۆالگە قاتىسىپ جاتىر. ءبۇل ىس-شارانىڭ ماقساتى – جىل سايىن بىرىككەن اراب امىرلىكتەرى ۇلتتىق كۇنىنىڭ تويلانۋىنا وراي ونىڭ حالقى مەن قوناقتارىن الەم ەلدەرىنىڭ ۇلتتىق مادەنيەتتەرىمەن تانىستىرۋ. ەلىمىزدىڭ ونەرپازدارى ىس-شاراعا وسىمەن ءتورتىنشى رەت قاتىسۋدا. الەمدىك مادەنيەت مايتالماندارىنىڭ پىكىرىنشە, قازاقستاننان كەلگەن قاتىسۋشىلار ءاردايىم جوعارى دەڭگەيدەگى دايىندىقتارىمەن ەرەكشەلەنىپ, ۇنەمى فەستيۆال قوناقتارىنىڭ ىقىلاسىنا بولەنىپ كەلەدى.
كەنەن ازىرباەۆ اتىنداعى جامبىل وبلىستىق فيلارمونياسىنىڭ مالىمەتىنشە, ۇيىمداستىرۋشىلار قازاقستاندىق ونەرپازدارىمىزعا ارنايى ورىن ءبولىپ, 8 ادامنان تۇراتىن ۇلتتىق بي ءانسامبلىنىڭ قارجىلىق شىعىندارىن وتەپ بەرۋدە ەكەن. ء«بۇل ىس-شاراعا فيلارمونيا ونەرپازدارىنىڭ قاتىسۋى مەملەكەت باسشىسىنىڭ «رۋحاني جاڭعىرۋ» باستاماسىنداعى مىندەتتەرگە تولىعىمەن جاۋاپ بەرىپ, ەلىمىزدىڭ مادەنيەتىن حالىقارالىق دارەجەدە جان-جاقتى دارىپتەۋگە مۇمكىندىك بەرىپ وتىر» دەيدى «اقكەربەز» بي ءانسامبلىنىڭ باس بالەتمەيستەرى ايجان قونارباەۆا.
ايگىلى ءابۋ دابي تورىندە ەلىمىزدىڭ كوك بايراعىن جەلبىرەتكەن «اقكەربەز» بيشىلەرى مۇنداعى جەرگىلىكتى ونەرسۇيەر قاۋىمعا «ەركە سىلقىم», «القيسسا», «اققۋ», «بيلە, بيلە», «جايلاۋدا» اتتى ۇلتتىق قازاق بيلەرىن ناسيحاتتاۋدا. وسىلايشا, «اقكەربەز» بي ءانسامبلى اعىمداعى جىلعى 27 قاڭتارعا دەيىن ءابۋ دابي قالاسىنىڭ تۇكپىر-تۇكپىرىندە جالعاسىن تاباتىن فەستيۆالدە بەس ءتۇرلى بيىمەن ەرتە زاماننان قالىپتاسقان حالقىمىزدىڭ اسا باي اۋىز ادەبيەتىمەن, ءان-كۇيلەرىمەن, ءداستۇرلى تۇرمىس سالتىمەن بىتە قايناسىپ كەلە جاتقان ەل مۇراسىن ناسيحاتتايتىن بولادى.
ايتا كەتۋ كەرەك, «اقكەربەز» بي ءانسامبلىنىڭ ونەر جولىندا 6 جىلدىق تاريحى بار. بي ۇجىمى وسى ۋاقىتقا دەيىن ەلباسىنىڭ «رۋحاني جاڭعىرۋ» باعدارلاماسىنىڭ «وڭىرلىك مادەنيەت, داستۇرلەر مەن قۇندىلىقتار» بازالىق جوباسىن جۇزەگە اسىرۋ ماقساتىندا كەنەن ازىرباەۆ اتىنداعى جامبىل وبلىستىق فيلارمونياسىنىڭ 50 جىلدىق مەرەيتويى اياسىندا «بالاساعۇن» ورتالىق كونتسەرت زالىندا اۋليەاتا جۇرتشىلىعىنا «بي كەرۋەنى» اتتى ەسەپتىك كونتسەرتتىك باعدارلاماسىن ۇسىنعان بولاتىن. ەندى بۇگىندە ءابۋ دابي تورىندە ۇلتتىق بي ونەرىن ناسيحاتتاپ جۇرگەن اۋليەاتالىق ارۋلاردىڭ جەڭىستى جولى جالعاسا بەرەتىنىنە سەنىم مول.
حاميت ەسامان,
«ەگەمەن قازاقستان»
جامبىل وبلىسى
