نەگىزگى دىڭگەگىن «اقبوتا» قوعامدىق قورى مەن ۇكىمەتارالىق ۇيىمدار ۇستاپ وتىرعان جوبا اتالعان اۋداننىڭ 6 اۋىل ايماعىن قامتىپ, ونى ىسكە اسىرۋعا كەمىندە 16 مىڭ ادام قاتىستىرىلادى. بۇعان قوسىمشا, اقمولا وبلىسىنىڭ ءۇش اۋدانىنىڭ تۇرعىندارىن اۋىز سۋدى ۇنەمدەۋ باعىتىنداعى جاڭا تەحنولوگيا نەگىزدەرىن وقىتۋعا تارتىپ, استانا ماڭىنداعى اۋىلداردىڭ 30 مىڭنان استام ادامىن اقپاراتتاندىرۋ جوسپارلانعان.
سونىمەن قاتار, ارناساي اۋىلىنداعى 10-16 جاس ارالىعىنداعى 35 مۇشەسى بار «جاس فەرمەر مەكتەبىندە» كليماتتىق وزگەرىستەرگە بايلانىستى مەكتەپ جانە تۇرعىندار باقشاسىندا كوكونىستەردى تامشىلاتا سۋارۋ تەحنولوگياسىن ۇيىمداستىرۋ ماسەلەسى زەرتتەلدى. بەلگىلى عالىمدار مەن مامانداردىڭ قاتىسۋىمەن اتقارىلعان جۇمىس ناتيجەلەرى قازاقستاننىڭ سولتۇستىك وڭىرىندە سۋ شىعىنىن 2 ەسەگە قىسقارتۋعا جانە ارنايى الاڭداردا ونىمدىلىكتى اناعۇرلىم ارتتىرۋعا مۇمكىندىك بارلىعىن دالەلدەپ وتىر.
ارناسايلىقتار تۇرمىسى تومەن, كوپبالالى جانە جالعىزباستى اۋىلداستارىن 3 تەكشە مەترلىك سۋ جيناعىشتارمەن, سۋ سورعىشتارمەن, باسقا دا جابدىقتارمەن قامتاماسىز ەتۋگە كومەكتەسىپ جاتىر. سوڭعى ەكى-ءۇش جىلدىڭ اراسىندا ارناساي اۋىلىندا تامشىلاتىپ سۋارۋ جۇيەسىندەگى 160 ۋچاسكە, جىبەك جولى, ۆولگودونوۆكا, ميحايلوۆكا اۋىلدارىندا, باباتاي ستانساسىندا جانە ارشالى كەنتىندە 10 تاجىريبەلىك ۋچاسكە ۇيىمداستىرىلدى.
بايقال ءبايادىل,
«ەگەمەن قازاقستان»
اقمولا وبلىسى,
ارشالى اۋدانى.
