جاڭاقورعان اۋدانىندا جاس جۇبايلار نۇركەن مەن اينۇر جانازاروۆتار وزدەرىنە سىيعا بەرىلگەن قارجىنى قايىرىمدىلىق ماقساتقا جۇمسادى. ولار مەشىتكە كەلىپ, الەۋمەتتىك جاعىنان از قامتىلعان وتباسىلارعا تەگىن ازىق-ت ۇلىك ۇلەستىردى.
- ۇيلەنۋ تويى ومىرىمىزدەگى ەڭ ۇلكەن قۋانىش, - دەيدى نۇركەن. - دوستارىمىز تويعا 250 مىڭ تەڭگە جيناپ بەردى. ول قارجىعا ليمۋزين جالداپ, قۇربى-قۇرداسپەن ەمەن-جارقىن ءبىر كۇن تويلاۋعا بولار ەدى. الايدا, ءبىز وتباسىلىق ءومىرىمىزدىڭ العاشقى اق پاراعىن قايىرىمدىلىقپەن باستاعىمىز كەلدى. ساداعا - ساۋاپتى ىستەرگە باستايدى. بۇگىندە تاعدىر تالقىسىنا ءتۇسىپ, قينالىپ جۇرگەن جانداردىڭ جانىنان تابىلساڭ ۇلكەن ساۋاپقا قالاسىڭ ءارى ومىرلەرىنىڭ جاقسىعا وزگەرۋىنە ءسال دە بولسا سەپتىگىڭ تيەدى. وسىنداي نيەتىمىز بار ەكەنىن دوستارىمىزعا ءبىلدىرىپ ەدىك, ولار قۋانا قولدادى. ءبىز مۇنى ات شىعارۋ نەمەسە ماقتان ءۇشىن ەمەس, جۇرەك قالاۋىمىزبەن جاسادىق. ءبىر كۇنگى توي قىزىعى ەشتەڭە شەشپەيدى. ءبىز وسىنداي قادامىمىز ارقىلى باسقا دا جاس جۇبايلاردى ويلاندىرعىمىز كەلەدى.
جانازاروۆتاردىڭ ويى - وسى. قايىرىمدىلىق - قازاقتىڭ قانىنا انا سۇتىمەن سىڭگەن قاسيەت. الايدا, كەڭەستىك ۇردا-جىق زامان لەبى وسىنداي يگى ءداستۇردى ۇمىتتىرا جازداعان ەدى. بىراق, «ورنىندا ءبىر وڭعالار» دەگەندەي, سۇيەككە سىڭگەن ءداستۇر ۇمىتىلماسا ەكەن. كەيىنگى جىلدارى قازاق جاستارىنان وسىنداي ۇلگى الارلىق قادامدار ءجيى بايقالىپ ءجۇر. ءبىر كۇندىك ىردۋ-دىردۋ كەلەسى كۇنى ۇمىتىلار, بىراق قينالعاننىڭ قولتىعىنان دەمەۋ ناعىز تەكتىلىك, جاقسى اكە-شەشەنىڭ تاربيەسى. ۇلتتىق قۇناردىڭ ۋىزىنان قانىپ ىشكەن وسىنداي جاستار باردا قازاق قاسيەتى ايدىندانا بەرمەك.
باقتيار تايجان,
«ەگەمەن قازاقستان».
قىزىلوردا وبلىسى.
