ەرمەك تۇرسىنوۆ ءوز جازباسىندا بۇگىنگى وتاندىق كينوتۋىندىلاردىڭ جاي-كۇيىنە توقتالدى.
«بارلىق شوۋ-بيزنەس وكىلدەرى كينو الەمىنە كەلىپ جاتىر. كەشەگى كۆن ويىنشىلارى مەن باسقا دا مەديا جۇلدىزدار بۇگىندە جىل سايىن كينو ءتۇسىرىپ, جارىسا تۇساۋكەسەر جاسايتىن بولعان. ءبىر تۋىندىنىڭ ءىزىن سۋىتپاي, ارتىنشا جاڭا ءفيلمنىڭ افيشاسى شىعىپ جاتادى. وتاندىق تەلەونىمنىڭ سانى ارتقانى ارينە, جاقسى. الايدا كينو الەمى ويىن الاڭى ەمەس. «وكىنىش», «سيسيتاي», «توي ليۋبوي تسەنوي», «جەنا نە ستەنا», «برات يلي براك», « ۇلى دالا كومەدياسى», «گلامۋر دليا دۋر» سەكىلدى كوپتەگەن فيلمدەردى ناعىز فيلم دەۋگە كەلمەيدى», دەلىنگەن جازبادا.
سونداي-اق ول ادەبيەت سالاسىنداعى ولقىلىقتاردى دا اتاپ ءوتتى.
«مەديا جۇلدىزدار كينو تۇسىرۋمەن عانا ەمەس, كىتاپ جازۋمەن دە اينالىساتىن بولعان. مىسالى الماتىدا وتكەن كىتاپ فەستيۆالىندە ادەبيەت سالاسىنداعى باس سىيلىقتى بايان الاگوزوۆا الدى. بايان ەگەر جازۋشىعا اينالسا, مەن وندا ءوزىمدى ارحيەپيسكوپ دەر ەدىم. قوعام ىشىندە مۇنداي قۇبىلىس ورناتقاندار كوپ. قايرات نۇرتاس, بۇركىت, نۇرتاس ادامباي, تورەعالي تورەالى, سيۆي ماحمۋدي سەكىلدى ءبىر توپ جۇلدىزدار شىعارماشىلىق الەمدى بيزنەس, ساۋدا ورتالىعىنا اينالدىردى», دەدى ول.
سونىمەن قاتار ول ءفيلمدى كاسسادان قىرۋار قارجى جيناۋ ءۇشىن ەمەس, قوعامعا وي سالۋ ءۇشىن ءتۇسىرۋ قاجەت ەكەنىن ايتادى.
«كينو الەمىنەن ماركەتينگتى كورۋدىڭ قاجەتى جوق. ول وزىنشە بولەك شىعارماشىلىق پەن بيىك مادەنيەتتىڭ بەلگىسى. سوندىقتان دا شىنايى دۇنيەنى ادەمى ەتىپ كورسەتۋ كەرەك. ءبىزدىڭ ناعىز قاھارماندار كوپ جاعدايدا كادر سىرتىندا قالىپ قويادى. مىسالى قانشاما ادامنىڭ ومىرىنە اراشا بولعان كارديوحيرۋرگ يۋري پيا, 2016 جىلى اپاتتى جاعدايدا 116 جولاۋشىسى بار ۇشاقتى ءساتتى قوندىرعان دميتري رودين سەكىلدى ارامىزداعى تالانتتى جاندار جايىندا فيلم تۇسىرىلسە, كورەرمەنى كوپ بولار ەدى. تەلەارنالاردان ەشكىمگە قاجەتى جوق جۇلدىزداردىڭ ءومىرىن ۇلگى ەتۋدى دوعارۋ قاجەت», دەلىنگەن جازبادا.
