قىزىلوردا قالاسىندا سالىنىپ جاتقان الىپ جىلىجايدىڭ قۇرىلىسى اياقتالۋعا جاقىن قالدى. تولىق اۆتوماتتاندىرىلعان ەكى گەكتاردا جىلىنا 900 توننا قىزاناق وسىرىلەدى. جوبا قۇنى – 1 ملرد 100 ميلليون تەڭگە. ونىڭ 650 ميلليون تەڭگەسىن ۇكىمەت قولداۋىمەن الدى.
سەرىكتەستىك ديرەكتورى عاني الماتوۆ كومپيۋتەرمەن باسقارىلاتىن كەشەندەگى قىزاناق كوكوس سۋبستراتىنا وتىرعىزىلاتىنىن ايتادى. مۇنىڭ ەكولوگيالىق جاعدايى حالىقارالىق ستاندارتتارعا نەگىزدەلەدى. ماسەلەن قىتاي جاعى ەكولوگيا, تاۋاردىڭ ساپاسىنا باس اۋىرتا بەرمەيدى. جالعا العان جەرلەردى ءتۇرلى حيميكاتتارمەن از جىلدا كۇلگە اينالدىرىپ جىبەرەتىندىكتەن دە رەسەيدىڭ حاكاسيا ۇكىمەتى ولاردىڭ جىلىجايلارىن جيناپ, ەلدەرىنە كەتۋىنە بۇيرىق شىعاردى. وزگەلەرى دە ىقىلاستى ەمەس.
ال قىزىلورداداعى جىلىجاي جاڭا تەحنولوگيا ارقىلى دۇنيەجۇزىلىك تاجىريبە نەگىزىندە جۇمىس ىستەيدى. مەردىگەر كومپانيانىڭ وكىلى, يسپانيادان كەلگەن سەرحيو مولينا جىلۋ, جارىق, سۋارۋ, سالقىنداتۋ سياقتى جۇيەلەر اۆتوماتتى تۇردە باسقارىلاتىندىعىن ايتادى. جۇمىسشىلارعا قالعانى – دايىن ءونىمدى جيناپ, قوراپتارعا سالۋ. جاڭا تەحنولوگيانى ءبىر كورگەننەن باسقارىپ كەتۋ مۇمكىن ەمەس. سوندىقتان, يسپانيادان كەلگەن اگرونوم ءبىر جىل وسى كەشەندە جۇمىس ىستەپ, جەرگىلىكتى مامانداردى ۇيرەتپەك.
قىزىلورداداعى باۋ-باقشا ونىمدەرى كورشى تۇركىستان وبلىسىنا قاراعاندا قىمباتتاۋ بولىپ كەلگەن. ەندى وسىنداي جىلىجايلار وبلىستىڭ باسقا اۋداندارىندا دا سالىناتىندىقتان سىرتتان تاسىمالداناتىن كوكونىس باعاسى ازايادى, باعا تومەندەيدى دەپ كۇتىلۋدە. جاڭا جۇمىس ورىندارى كوبەيەدى. ءبىر شيەلى اۋدانىنىڭ وزىندە جيىرماعا جۋىق جىلىجاي بوي كوتەرەتىنىن ەسكەرسەك, بۇل الىنبايتىن مەجە ەمەس.
باقتيار تايجان,
«ەگەمەن قازاقستان»
قىزىلوردا وبلىسى
