ەلباسى جولداۋىندا ايتىلعان كوپشىلىكتىڭ باسپاناعا قولجەتىمدىلىگىن ارتتىرۋدى كوزدەگەن يگىلىكتى جوبانى ەلوردا اكىمدىگى مەن تۇرعىن ءۇي قۇرىلىس جيناق بانكى بىرلەسىپ جۇزەگە اسىرىپ وتىر. تۇرعىن ءۇي سەرتيفيكاتتارىن تابىستاعان قالا اكىمى باقىت سۇلتانوۆ جەڭىلدىككە يە بولعان 100 تۇرعىننىڭ جايدان-جاي تاڭدالماعانىن, ولاردىڭ بارلىعى ءوز سالاسىنا ەڭبەگى سىڭگەن بىلىكتى ماماندار ەكەنىن جەتكىزدى.
«ەلباسى جەرگىلىكتى بيۋدجەتتەن جەڭىلدەتىلگەن يپوتەكا بويىنشا العاشقى جارنانى جارتىلاي سۋبسيديالاۋ جولدارىن قاراستىرۋدى بۇيىردى. بۇل يپوتەكانىڭ قولجەتىمدىلىگىن ارتتىرادى. ءبىز قاراجاتتى بۇگىنگى تاڭدا قالانىڭ دامۋىنا اسا قاجەتتى ماماندىق يەلەرىنە بولدىك. ءبىزدىڭ ەلوردا ءومىر ءسۇرۋ ءۇشىن ەڭ قاۋىپسىز جانە جايلى بولۋى كەرەك. سوندىقتان ءبىلىم, دەنساۋلىق ساقتاۋ جانە قۇقىق قورعاۋ سالاسىن دامىتۋعا ءتيىسپىز. الەۋمەتتىك سالاداعى قىزمەتكەرلەر دە نازاردان تىس قالمايدى», دەدى شاھار باسشىسى ب.سۇلتانوۆ.
بولىنگەن اقشالاي قاراجات سالىمشىلارعا العاشقى جارنانىڭ 20%-ىن تەز جيناقتاۋعا كومەكتەسەدى. تقجب 7%-دان اسپايتىن جىلدىق مولشەرلەمەدە نەسيە بەرەدى. قارىزدىڭ ماكسيمالدى مەرزىمى 25 جىل, ال نەسيە سوماسى 20 ملن تەڭگەدەن اسپاۋى قاجەت. قارجى تۇرعىن ءۇي قۇرىلىس جيناق بانكىنە بولىنگەننەن كەيىن الەۋمەتتىك كومەكتى الۋشىعا باسپانا تاڭداپ, ونىڭ يەسى بولۋىنا ءۇش اي ۋاقىت بەرىلەدى. «سالىمشى العاشقى جارنا رەتىندە جالپى سومانىڭ 20 پايىزىن جيناۋى ءتيىس. سودان كەيىن 7 پايىزدى يپوتەكا 25 جىلعا بەرىلەدى. بىراق پاتەردى ءۇش ايدىڭ ىشىندە تاۋىپ, يپوتەكانى راسىمدەپ الۋ قاجەت. ءۇي جاڭا تۇرعىن ۇيدەن الىنۋى شارت. ايتپەسە, اكىمدىكتىڭ اقشاسى بيۋدجەتكە كەرى قايتارىلادى. ازىرشە, بۇل اقشا ارنايى ەسەپشوتتا جاتا بەرەدى. بارلىق شارت ورىندالعاننان كەيىن ەسەپشوت اشىلادى دا العاشقى جارنا رەتىندە سالىمشىنىڭ قارجىسىنا قوسىلادى», دەيدى «تۇرعىن ءۇي قۇرىلىس جيناق بانكى» استانا قالاسىنداعى ورتالىق فيليالىنىڭ ديرەكتورى جانسۇلتان ماتاەۆ.
سەرتيفيكاتقا يە بولعان №44 ورتا مەكتەپتىڭ تاريح ءپانىنىڭ مۇعالىمى نۇرجامال جاقىپوۆا العاشقى جارناعا قاراجاتتى 2,5 جىل بويى جيناعانىن ايتتى. «وسى ناۋقاننىڭ ناتيجەسىندە ءبىز وزىمىزگە قاجەتتى باسپاناعا يە بولۋعا مۇمكىندىك الدىق. بىزدە تۇرعىن ءۇي قۇرىلىس جيناق بانكىندە دەپوزيت بار. العاشقى جارنا ميلليون تەڭگەگە ارتقانىنىڭ ناتيجەسىندە ەندى ءبىز ەكى بولمەلى پاتەر الا الامىز. وسىنداي قولداۋ كورسەتكەن اكىمدىككە ريزامىز!», دەدى ول.
مايگۇل سۇلتان,
«ەگەمەن قازاقستان»
