بريفينگ بارىسىندا «اتىراۋ سۋ ارناسى» كمك جايىق وزەنىنە تاستايتىن سۋداعى زياندى زاتتار كورسەتكىشتەرىنىڭ ارتۋىنا جۇرگىزگەن تەكسەرىس قورىتىندىسى رەسمي تۇردە جاريالاندى.
تەكسەرۋ بارىسىندا اعىمداعى جىلدىڭ 14 جەلتوقسانىندا دەپارتامەنت №1 ونەركاسىپتىك الاڭ - اتىراۋ قالاسىنداعى سۋ قۇبىرى تازارتۋ يماراتتارى (ستق) ارقىلى جايىق وزەنى سۋىنىڭ سىنامالارىن ىرىكتەپ الدى.
- سىناق ناتيجەلەرى بويىنشا حلوريدتەر بويىنشا اسىپ كەتۋ انىقتالدى. اتاپ ايتقاندا, حلوريدتەردىڭ ناقتى كورسەتكىشى 505,596 مگ/دم3 قۇرادى . شەكتى جول بەرىلەتىن كورسەتكىش 108 مگ/دم3 بولعاندا توگىندىدە اسىپ كەتۋ 396,6 مگ/دم3 قۇرادى. وسىلايشا, «اتىراۋ سۋ ارناسى» كمك تاراپىنان قر ەكولوگيالىق كودەكسىنىڭ تابيعات پايدالانۋشىنىڭ اعىندى سۋلاردا لاستاۋشى زاتتاردىڭ شوعىرلانۋىن بەلگىلەنگەن نورماتيۆتەردەن اسىرماۋى تۋرالى ايتىلعان 225-بابى 4-تارماعىنىڭ تالاپتارى بۇزىلدى, -دەپ اتىراۋ وبلىسى بويىنشا ەكولوگيا دەپارتامەنتىنىڭ تاراتىلعان حابارلاماسىندا ايتىلعان. - سونداي-اق, كاسىپورىن اعىندى سۋلاردى ەسەپكە الۋ جۋرنالىن جۇرگىزبەگەن.
تەكسەرۋ ناتيجەسى بويىنشا دەپارتامەنت «اتىراۋ سۋ ارناسى» كمك-عا قاتىستى قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 328-بابى بويىنشا بەلگىلەنگەن نورماتيۆتەن اسىپ كەتكەندىگى ءۇشىن اكىمشىلىك ءىس قوزعادى.
اتىراۋ وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى باسشىسىنىڭ ورىنباسارى ارمان مۋلداشەۆتىڭ ايتۋىنشا ۆەدومستۆوارالىق كوميسسيا مۇشەلەرىمەن بىرلەسكەن جۇمىس بارىسىندا جايىق وزەنىنەن 4 توننا 165 كگ ولگەن بالىق جينالدى. بيولوگيالىق ورتاعا جالپى سوماسى 4,2 ميلليون تەڭگە شىعىن كەلتىرىلگەن.
- سونىمەن قاتار, ءبىز جايىق وزەنىنىڭ تۇبىنە سۇڭگۋىر تۇسىردىك, ول 30 مەتر راديۋستاعى اۋماقتى زەرتتەدى. ءتۇسۋ بالىق قىستايتىن «بالىق شۇڭقىرلارى» بار ەكى جەردە جۇرگىزىلدى. وزەن تۇبىندە ءولى بالىق ۇشاسى تابىلعان جوق. 19 جەلتوقساندا گەولوگ كەنتىندە بالىقتىڭ قىرىلۋىنا قاتىستى, بۇل تاياز سۋلاردا وتتەگىنىڭ جەتىسپەۋىنەن پايدا بولاتىن بالىقتىڭ قىرىلعانى انىقتالدى, بۇل – تابيعي سەبەپ. گەولوگتا اۋلانعان بالىقتىڭ جالپى سالماعى 230 كگ قۇرادى, - دەدى ارمان مولداشەۆ.
ايتا كەتەيىك, 6-25 جەلتوقسان ارالىعىنداعى كەزەڭدە «ۇلتتىق ساراپتاما ورتالىعى» شجق رمك اتىراۋ وبلىستىق فيليالى بارلىعى 84 سىناما زەرتتەدى, ونىڭ ىشىندە جايىق وزەنىنىڭ سۋى – 69 سىناما, ستق سۋ اعىزۋ قۇدىعى – 8 سىناما جانە اتىراۋ قالاسىنداعى ستق سۋ قۇبىرىنىڭ سۋى – 7 سىناما.
- باكتەريولوگيالىق جانە حيميالىق كورسەتكىشتەرگە زەرتحانالىق زەرتتەۋ ناتيجەلەرى بويىنشا بارلىق ىرىكتەلگەن سىنامالار سانەجن تالاپتارىنا سايكەس كەلەدى, تۇرعىنداردىڭ دەنساۋلىعىنا قاۋىپ توندىرمەيدى. سونىمەن قاتار, 8 جەلتوقساندا «ۇلتتىق ساراپتاما ورتالىعى» اف-نا جايىق وزەنىنەن ءتىرى بالىقتىڭ 7 سىناماسى الىنىپ, زەرتحانالىق زەرتتەۋگە جىبەرىلدى, سايكەس كەلمەيتىندەر جوق, - دەپ قورىتىندى شىعاردى ەكولوگيا دەپارتامەنتى.
قازىرگى ۋاقىتتا ەكولوگيا دەپارتامەنتى مەن قۇقىق قورعاۋ ورگاندارى جايىق وزەنىنە سۋ اعىزۋدى جۇزەگە اسىراتىن تاعى ءۇش كاسىپورىندى تەكسەرۋدى جالعاستىرۋدا. سونىمەن, جايىق وزەنىندە بالىقتىڭ جاپپاي قىرىلۋىنىڭ سەبەبى مەن كىنالىلەر قىلمىستىق ءىستى تەرگەۋ اياقتالعاننان كەيىن انىقتالاتىن بولادى.
