سپارتاكيادانىڭ سالتاناتتى اشىلۋىنا قاتىسقان مەكتەپ ديرەكتورى ەرمەك پايزوۆ, «نازارباەۆ زياتكەرلىك مەكتەپتەرى» دببۇ ۇجىمىنىڭ باسىن قوسىپ, بىرلىگىن ارتتىراتىن سپارتاكيادالاردىڭ ماڭىزدىلىعىن اتاپ ءوتىپ, قاتىسۋشىلارعا ساتتىلىك تىلەدى.
- اقتاۋ قالاسىنداعى زياتكەرلىك مەكتەپ العاش رەت جەلىلىك سپارتاكيادانى ۇيىمداستىرىپ وتىر. سول سەبەپتى اتسالىسقان بارشا ارىپتەستەرىمىزگە العىسىمىزدى بىلدىرەمىز, دەدى ەرمەك سەرىك ۇلى.
سايىستىڭ العاشقى كۇنى قۇراما كوماندالار ۆولەيبول, دارتس, شاحمات, ۇستەل تەننيسىنەن باق سىناسا, ەكىنشى كۇنى كوماندالار فۋتبول ويىنىمەن جارىستى.
- كيەلى ماڭعىستاۋ جەرىندە وتكەن سپارتاكياداعا قاتىسقانىمىزعا شىن جۇرەكتەن قۋانىشتىمىن. مۇنداي سايىستار ەلىمىزدىڭ ءار قيىرىنداعى ارىپتەستەردىڭ باسىن قوسىپ, ىنتىماقتاستىعىن ارتتىرىپ, تاجىريبە الماسۋعا تاپتىرماس مۇمكىندىك. دەنە شىنىقتىرىپ قانا قويماي, كوماندادا جۇمىس ىستەۋ قابىلەتتەرىمىز شىڭدالا ءتۇستى, دەيدى ورال قالاسىنداعى نازارباەۆ زياتكەرلىك مەكتەبىنىڭ پەداگوگ-كۋراتورى گۇلنار سەرجانوۆا سپارتاكيادا جايىندا.
ەكى كۇنگە سوزىلعان سايىس ناتيجەسىندە جالپىكوماندالىق ەسەپتە اقتاۋ قالاسىنداعى زياتكەرىلك مەكتەپ ۇجىمى سپارتاكيادا كۋبوگىنا يەلەنسە, ورال قالاسىنداعى زياتكەرلىك مەكتەپ ۇجىمى ەكىنشى ورىنمەن ماراپاتتالدى. ال شىمكەنت قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبى ءۇشىنشى ورىنعا لايىقتى دەپ تانىلدى.
سايىس سوڭىندا ۇيىمداستىرۋشىلار قۇراما كوماندا جەتەكشىلەرىنە ماڭعىستاۋ وبلىستىق سپورت باسقارماسىنىڭ العىس حاتىن تابىس ەتتى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
