زامان وزگەرىپ, زاڭ تۇرلەنگەندە دە قازاق بالاسىنىڭ ايەل زاتىنا قۇرمەتى وزگەرمەدى. بىراق جولى جىڭىشكە قىز بالاسىنىڭ ءسوز ونەرىندەگى جولى جازۋشى سوزىمەن ايتقاندا, ءتىپتى قىلدىرىقتانىپ كەتتى. ايەل زاتىنىڭ ۇلكەن جازۋشى, جۋرناليست بولۋىنا سەنىمسىزدىكپەن قاراعاندار دا بولسا كەرەك. بىراق وسى ءسوزدىڭ سەمىپ قالعان تۇسىنىگىن بۇزعان قازاقتىڭ قالامگەر قىزدارىنىڭ ءبىرى جۇماگۇل سولتيەۆانىڭ كەلبەتىن تانىعان سايىن سول سەنىمسىزدىك جاداعاي ويدان تۋعان جاتتاندى سوزدەي سەزىلەدى بۇگىن. «ەگەمەن قازاقستان» گازەتىنىڭ شاڭىراعىندا گازەت ارداگەرى, بەلگىلى جۋرناليست, جازۋشى, دراماتۋرگ جۇماگۇل سولتيەۆانىڭ
70 جاسقا تولۋ قۇرمەتىنە وراي سالتاناتتى جيىن ءوتتى. ء«داستۇرى بەرىك ۇجىمنىڭ باعدارى ايقىن. عاسىر جاساپ وتىرعان اتا باسىلىمنىڭ بۇرىننان قالىپتاسقان جولىن, ۇرپاقتار ساباقتاستىعىن ساقتاپ, ءوز ارداگەرلەرىمىزدى قاشاندا قۇرمەتتەپ سىيلاپ جۇرەمىز. سىزدەردىڭ سالعان دارا جولدارىڭىزبەن كەيىنگى وسكەلەڭ ۇرپاق جاڭىلماي جۇرە الادى. سىزدەر ايتقان ءسوز بىزگە – ونەگە, جاستارعا – ۇلگى. ءوزىڭىزدىڭ ۇجىمىڭىزدىڭ اتىنان قۇتتىقتاۋىمىزدى قابىل الىڭىز» دەپ «ەگەمەن قازاقستان» اق باسقارما توراعاسى دارحان قىدىرالى قۇتتىقتاۋ ءسوزىن ايتىپ, ارداگەر قالامگەرىمىزدىڭ يىعىنا كامزول جاپتى. جۇماگۇل سولتيەۆانى قۇتتىقتاۋعا زامانداستارى مەن سىيلاستارى كەلدى. جانات ەلشىبەك, سايراش ابىشقىزى, سۇلەيمەن مامەت, قايسار ءالىم, ورازگۇل اسانعازى, ەلەنا ابدىحالىقوۆا سياقتى ءسوز ساڭلاقتارى جىلى لەبىزدەرىن ارنادى.
«وسى استانانى ارقاعا كوشىرىپ, باعانالى وردا قۇرعان ەلباسىنا ريزامىز. استاناعا كەلگەنگە دەيىن سىرتتاي سىيلاسىپ, جىلىنا ءبىر-ەكى رەت سويلەسەتىن جۇماگۇلمەن وسى استاناعا كەلگەن سوڭ, قويان-قولتىق ارالاسىپ, جۇمىس ىستەدىك. جۇماگۇل دەسە, مەنىڭ كوز الدىما باۋىرجان مومىش ۇلى, شەرحان مۇرتازا ەلەستەيدى. «قىزداردان جۋرناليست شىقپايدى» دەگەندەردىڭ ءسوزىن جوققا شىعارعان ۇركەردەي توپتىڭ ماڭداي الدىندا جۇرگەن زامانداسىمىز. جۋرناليستكاسىنان بولەك دراماتۋرگياسى دا كوپشىلىكتىڭ كوڭىلىن جادىراتتى. ماعجاننىڭ زىليحاسىن قالاي شەبەر ساحناعا شىعاردى. بۇل كۇللى الاش قايراتكەرلەرىنىڭ جارلارىنا قويىلعان ەسكەرتكىش دەپ ويلايمىن. كەشەگى جەلتوقساندا ەرلىك كورسەتكەن قايرات رىسقۇلبەكوۆتىڭ قىزدارعا جازعان حاتىن «قازاقستان ايەلدەرىنە» جاريالادى. ياعني جۇماگۇل قاشاندا ۇلتقا كەرەك قازىنالاردى ارشىپ جۇرەدى. وسى ءۇشىن ساعان حالقىڭ دا رازى» دەپ قۇتتىقتاۋىن جەتكىزدى قوعام قايراتكەرى ورازگۇل اسانعازى.
ءسوز سوڭىندا جۇماگۇل سولتيەۆا دا ءوزى ىستەگەن قاراشاڭىراققا پەيىل, كوڭىلدەرى ءۇشىن العىسىن جەتكىزدى. جۇماگۇل اپاي «ياپىراۋ» ءانىن جاس كۇنىندە ءجيى ايتىپ, كەرەمەت جاقسى كورەدى ەكەن. «كوڭىل كوڭىلدەن سۋ ىشەدى». جاقسى لەبىز, ءايبات قۇتتىقتاۋلاردى ەستىپ, كوڭىلى مارقايعان جۇماگۇل اپامىز قاناتىنىڭ استىنا مارجان تاعىپ, اندەتىپ كەتىپ بارا جاتقان جوق پا ەكەن...
باعاشار تۇرسىنباي ۇلى,
«ەگەمەن قازاقستان»
