ءتۋريزمنىڭ دامۋىندا تۇركىستان قالاسىنىڭ الار ورنى ەرەكشە ەكەنى ءمالىم. جىل باسىنان بەرگى 11 ايدا قالاعا كەلگەن زياراتشىلار مەن تۋريستەر سانى 1 136,5 مىڭعا جەتكەن. ونىڭ ىشىندە الىس-جاقىن شەتەلدەن 37,9 مىڭ تۋريست كەلدى. ياعني 2017 جىلدىڭ ءتيىستى كەزەڭىمەن سالىستىرعاندا تۋريستەر مەن زياراتشىلار سانى 3,6 %-عا نەمەسە 39,2 مىڭ ادامعا ارتىپ وتىر. كەلگەن تۋريستەر مەن زياراتشىلارعا كورسەتىلگەن ءتۇرلى قىزمەتتەر كولەمى 5143,4 ملن.تەڭگە بولىپ, قالاداعى ءجوو-ءنىڭ 7,5 %- ىن قۇراعان.
بۇل دەرەكتەردى تۇركىستان قالاسىنىڭ اكىمى ءا.وسەرباەۆ بيىلعى 11 ايدا ءوڭىردىڭ الەۋمەتتىك-ەكونوميكالىق دامۋى جونىندە اتقارعان جۇمىستارىنىڭ قورىتىندىسى بويىنشا وتكەن بريفينگتە مالىمدەدى. «كەلۋشىلەرگە ىڭعايلى جاعداي جاساۋ ارقىلى, تۇراقتى تابىس تابۋ كوزىن قالىپتاستىرۋ باستى ماقساتىمىز بولىپ وتىر. بۇل تەك قالا كولەمىندەگى ماسەلە ەمەس. تۇركىستاندى تۋريستىك وڭىرگە اينالدىرۋ ماقساتىندا رەسپۋبليكا كولەمىندە جانە وبلىس اكىمدىگىنىڭ ىقپالىمەن كەشەندى جۇمىستار اتقارىلىپ كەلەدى. ماسەلەن, سوڭعى 5-6 جىل كولەمىندە قالا اۋماعىندا تۋريزم سالاسىن جەتىلدىرۋ ءۇشىن 10-عا تارتا نىسان بوي كوتەردى. ونىڭ ىشىندە, وڭىرىمىزدەگى قاسيەتتى ورىندارعا باراتىن جولدار سالىنىپ, ينفراقۇرىلىمدارى قالاپتاستىرىلدى. قالامىزدا جالپى سانى 22 قوناق ءۇيى جۇمىس ىستەيدى (978 ورىن). سونداي-اق, قازىرگى تاڭدا, تۇركىستان قالاسى بويىنشا «تۇران-ساياحات» جانە «ناربەكوۆ» تۋريستىك ۇيىمى ساياحاتشىلارعا قىزمەت كورسەتۋدە», - دەدى قالا اكىمى.
جۋىردا ىرگەلى جوبالاردىڭ ءبىرى «Rixos Hadisha Turkistan» كەشەنىنە جانە «اكىمشىلىك ىسكەرلىك ورتالىعىنا» قاجەتتى جەر بەلگىلەنىپ, العاشقى قازىعى قاعىلدى. سونىمەن قاتار, ۋاقىت وتكەن سايىن سانى ارتىپ جاتقان تۋريستەر ءۇشىن قالادا زاماناۋي ۇلگىدە تاۋلىگىنە 60 ادامعا قىزمەت كورسەتۋ مۇمكىندىگى بار جاڭا «رويال گراند حولد» قوناق ءۇي كەشەنى ىسكە قوسىلعان. قالا اكىمى ءا.وسەرباەۆتىڭ ايتۋىنشا, جالپى اتقارىلعان جۇمىستاردىڭ ناتيجەسىندە اعىمداعى جىلدىڭ 11 ايىندا قالانىڭ وڭىرلىك ءونىمى 68,1 ملرد تەڭگە بولىپ, وتكەن جىلدىڭ ءتيىستى كەزەڭىمەن سالىستىرعاندا ناقتى كورسەتكىش 103,1 % ارتقان. ال حالىقتىڭ جان باسىنا شاققانداعى ءجوو 412, 6 مىڭ تەڭگە بولعان. سونداي-اق قالا اكىمى تۇركىستاننىڭ الەۋمەتتىك-ەكنوميكالىق الەۋەتىنىڭ بيىلعى كورسەتكىشىنە سالالار بويىنشا جەكەلەي توقتالىپ, تولىق مالىمەتتەر بەردى.
عالىمجان ەلشىباي,
«ەگەمەن قازاقستان»
تۇركىستان وبلىسى
