پوليتسيا دەپارتامەنتىنىڭ جەدەل جوسپارلاۋ باسقارماسى مەن توتەنشە جاعدايلار دەپارتامەنتىنىڭ كەزەكشى بولىمىنە حابارلاما ءتۇسىپ, اقجار اۋدانى اۋماعىندا جۇرگىنشىلەردىڭ قيىندىققا دۋشار بولعانى جايلى ايتىلعان. كەيىن انىقتالعانداي 3 جولاۋشىسى بار «نيۆا-شەۆرولە» كولىگى وبلىس ورتالىعىنان شالعايداعى اۋدانعا بەت الىپ, ورتا جولدا تەحنيكالىق اقاۋ شىققان. ارالارىندا جاسى سەكسەندى القىمداعان قاريا بولعان. ولار قاي جەردە تۇرعاندارىن تاپ باسىپ ايتا الماعان.
اقجار اۋدانى پوليتسيا ءبولىمىنىڭ باستىعى, پوليتسيا پودپولكوۆنيگى مارات نۇراحمەتوۆتىڭ باسشىلىعىمەن 4 جەدەل-ىزدەستىرۋ توبى قۇرىلىپ, ءىز كەسەدى. ءتۇن قاراڭعىلىعى, ۇيالى بايلانىستىڭ بولماۋى, ەلدى مەكەندەردىڭ الشاقتىعى ءبىراز قيىندىقتار تۋدىرادى. جۇرگىزۋشى تاڭعا جاقىن اقجارقىن اۋىلىنا جەتىپ, ورنالاسقان جەرى تۋرالى حابارلايدى. وسى ساتتە ىزدەستىرۋ توبى وعان تاپ بولىپ, جولاۋشىلار ەلدى مەكەنگە ءدىن امان-ەسەن جەتكىزىلەدى.
كومەك ۋاقىتىلى كەلمەگەندە تەرىسكەيدىڭ سارشۇناق ايازى مەن وكپەك جەلىنە جولاۋشىلاردىڭ شىداس بەرۋى ەكىتالاي.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
