ءوز قىلمىسىن وزىنەن جاسىرعان قوعام. ىشكى ءىرىڭ. سىزداۋىقتاي سىزداعان دەرت. جاننىڭ جاراسى. بوس نامىس. وزدەرىنە دە كەرەك ەمەس. جالعانشىلدىق. جالعىزدىق. ۇرپاق تراگەدياسى.
اۆتورلىق كينو – كينو ونەرىنىڭ ىشىندەگى ەڭ ماڭىزدىسى. ونىڭ ءتىلى – كۇردەلى. قابىلداۋ قيىن. ونىڭ تابيعاتىندا كوپشىلىك بايقاسا دا مويىنداي بەرمەيتىن شىنايى شىندىق بار. ول اۆتوردىڭ ءۇنى. ونىڭ قارۋى – اقيقات.
جاننا يساباەۆانىڭ «وتۆەرگنۋتىە» اتتى جاڭا ءفيلمى قازاق وتباسىلارىنىڭ ىشكى ماسەلەسىنىڭ جاندى جەرىن سۋرەتتەپ بەرەدى. ءبارى وكپەلى. ءبارى وشپەندى. ءفيلمنىڭ تابيعاتى كەكتى. وڭمەنىڭنەن يتەرگەندى قابىلداۋ وتە قيىن. وڭمەنىنەن يتەرە سالۋ سونشالىقتى وڭاي جول. فيلم باستى كەيىپكەر قاراگوز قازاق قىزى ايعانىمنىڭ جانىنىڭ دەرتىنە دياگنوز قويادى.
مويىنداماۋ ەڭ وڭاي ءتاسىل. ءوز شىندىعىڭدى. الداۋ. جالعان نامىسقا كونۋ. كوزبوياۋشىلىققا سەنۋ. قىلمىسىڭدى جاسىرۋ ءۇشىن پارا بەرۋ. قۇتىلۋ. قۇتىلدىم دەپ الداۋ. ءوزىڭدى. وزگەلەردى. وزىڭە ەڭ جاقىن جانداردىڭ جانىن جارالاۋ. بۇل كوپتەگەن وتباسىلاردىڭ ىشىندە بار ماسەلە.
جاسىرۋ – ءار كەيىپكەردىڭ ىشكى تراگەدياسىن قۇرايدى. جاندارىن اۋىرتاتىن دا ءوز شىندىقتارى. مويىنداماۋ – امالدارى. اقىلدارىنىڭ جەتكەن نۇكتەسى – وسى. قابىلداماۋ. الشاقتاۋ. اقيقاتىنان اتتاۋ.
كۇرەستەرى كوبىنەسە نامىس تاپتاۋ. ەركەكپىن دەپ كوكىرەك ۇرۋ. اسىراپ جاتىرمىن دەپ مىندەت ەتۋ. ادامنىڭ تىلىندە تۇسىنىسۋدەن ادا كەتۋ. ۇرۋ. ايەل زاتىنا ءزابىر كورسەتۋ. قورلاۋ. ءوز قارىنداسىن سوققىدان جارىمجان مۇگەدەك ەتۋ. اجالىنا جەتكىزۋ. جارىن جەسىر, بالاسىن جەتىم ەتۋ. جاۋاپسىزدىقتىڭ اقىرى – ارقايسىسىن وزىنشە قىلمىسكەر ەتۋ.
كۇنا. وتەمى اۋىر. فيلم وسىنى ءتۇسىندىرىپ بەرۋدى ماقسات ەتەدى. قاتەلىك بۇل فيلمدە كەيىپكەرگە تۇزەلۋگە مۇمكىندىك بەرمەيدى. جۇرەكتەرى ءوز قايعىلارىن كوتەرە بىلمەيدى. ءوزارا ەشبىرى مامىلەگە كەلمەيدى. شىندىقتىڭ تابيعاتى قانشالىقتى كۇردەلى بولسا, بۇل ءفيلمنىڭ وقيعاسى دا سونشالىقتى قابىلداۋعا اششى.
وتباسى. ونىڭ مادەني ولشەمى. وعان ءتان قۇندىلىقتارى. تاس-تالقان بولعان بالانىڭ قيالى. مەكتەپتەگى تاقتاعا جازۋعا سىيماعان اقيقاتى. ايعانىمدى تۋعان اتا-اناسىنىڭ ءۇيىنىڭ تابالدىرىعىنا اكەلەدى. ونسىز دا قورلانعان قىزدىڭ جانايعايىن ەشكىم ەستىگىسى دە كەلمەيدى. ارقاسۇيەر اعاعا جارىماعان ونىڭ قايعىسىن قايرات تا تۇسىنبەيدى. اعاسى ءوز قارىنداسىن قورعاماق تۇگىلى, قورلاۋعا كەلگەندە ەشكىمگە دەس بەرمەيدى. بۇل ورەسى تومەن جىگىتتەردىڭ – جيىنتىق بەينەسى.
قوعام. كەرەڭ. مەڭىرەۋ. وزىنەن ءوزى جالىققان. ەسەپ بەرمەيتىن. تۇزەلگىسى كەلمەيتىن. جالىقسا دا العا قادام جاساۋدان ادا. ورە. ىشكى مادەنيەت. وتباسىنداعى قارىم-قاتىناس. ءبارىن الدانعان ءبىر قاراگوزدىڭ كوز جانارىنا بايلاعان. جاسى دا جازىقسىزدىعىن دالەلدەپ بەرمەيدى. اعىسقا قارسى جۇزگىسى كەلگەنىمەن, ايعانىمنىڭ اششى شىندىعىن مويىنداۋعا تۇبەگەيلى ەشكىم العا قادام جاساعىسى كەلمەيدى. شاراسىزدىق. اقىرى ونى اجالىنا جەتكىزىپ, جەرلەيدى.
شەڭبەر. ولاردى بوساتپايدى. ورەنىڭ ولشەمى. تومەن. ءۇي اۋلاسىنداعى ءبىر-اق قادام سىزىقتان ەشقايسىسىن ءبىر-بىرىمەن تابىستىرۋعا بوس نامىس جىبەرمەيدى. اناسى دا قاتىگەز. جۇرت ايتاتىن بوس ءسوزدى عانا كوزدەيدى. قىزىنىڭ قايعىسىن تۇسىنگىسى كەلمەيدى. قورلانىپ قالعان قىزىنان تۋعان بالا – ناعىز تراگەديا. جاۋاپسىزدىقتىڭ «جەمىسى». ۇرپاعىم جاسىق بولماسىن دەگەن ۇلتتىڭ ۇلدارى سوندا قانداي بولماق؟!
گۇلزات كوبەك,
كينوتانۋشى, ونەرتانۋ PhD دوكتورى
