تۋعان قالانى تۇلەتۋ ءۇشىن جاسالىنعان 32 جوبا «تۋعان جەر» ارنايى جوباسىنىڭ «اتامەكەن» كىشى باعدارلاماسى شەڭبەرىندە جۇزەگە اسىرىلعان. بۇل ماقساتتا دەمەۋشىلەر مەن مەتسەناتتار ەسەبىنەن 1,6 ملرد تەڭگە بولىنگەن. يگى باستامالاردىڭ باسىندا «وتاۋ گرۋپپ» جشس مەن «اتامەكەن» كورپوراتسياسى تۇر. اتالعان مەكەمە مەملەكەتتىك-جەكەمەنشىك ارىپتەستىك اياسىندا قۇنى 280 ملن تەڭگەنى قۇرايتىن, 110 ورىندىق ينكليۋزيۆتى ءبىلىم بەرۋ ورتالىعىن سالىپ بەردى. ال «اتامەكەن» كورپوراتسياسى 547 ملن تەڭگەنى قۇرايتىن 320 ورىندىق بالاباقشا قۇرلىسىنا كومەك كورسەتكەن.
ۇلت كوشباسشىسىنىڭ باعدارلامالىق ماقالاسىنداعى «تاربيە جانە ءبىلىم» باعىتى بويىنشا شىمقالادا 138 ءىس-شارا ۇيىمداستىرىلىپ, قالاداعى 94 مەكتەپتە روبوت-تەحنيكاسى كابينەتى اشىلدى. 164 وقىتۋشى ءتيىستى كۋرستا ءبىلىمىن جەتىلدىردى. سونىمەن قوسا «رۋحاني قازىنا» باعدارلاماسى بويىنشا شىمكەنتتەگى قاسيەتتى, كيەلى ورىندار مەن تۋريستىك ماڭىزى بار ەسكەرتكىشتەرگە, جالپى سانى 18 نىسانعا QR كودتار ورناتىلدى. «وتىرار» كىتاپحاناسىنان كوۆوركينگ ورتالىعى اشىلدى. «ادەبي ولكەتانۋ» جوباسى اياسىندا ءتۇرلى كونكۋرستار, كەزدەسۋلەر, ايتىستار, اشىق ساباقتار, كونفەرەنتسيالار مەن سەمينارلار وتكىزىلىپ, كىتاپتار باسىپ شىعارىلدى.
پرەزيدەنتتىڭ قازاق ءتىلى ءالىپبيىن كيريلليتسادان لاتىن گرافيكاسىنا كوشىرۋ تۋرالى تاپسىرماسىنا وراي شىمكەنتتە لاتىن قارپىندەگى قازاق ءالىپبيىن ناسيحاتتاۋ جۇمىستارى دا بەلسەندى جۇرگىزىلىپ كەلەدى. شىمكەنتتەگى بىرقاتار باسىلىمداردا لاتىن قارپىندە جازىلعان ماقالالار باسىلىپ, قالا بويىنشا وسى رەفورماعا ارنالعان 75 باننەر ىلىنگەن. سونىمەن قاتار, قالاداعى جوعارى وقۋ ورنىنىڭ باسشىلارى, وقىتۋشىلار, پروفەسسورلىق قۇرام مەن زيالى قاۋىم وكىلدەرىنىڭ قاتىسۋىمەن «100 جاڭا وقۋلىق» جوباسى اياسىندا الەمدىك دەڭگەيدەگى قالامگەرلەردىڭ, ساراپشىلاردىڭ قازاق تىلىنە اۋدارىلعان 18 وقۋلىعىن تانىستىرۋ جيىنى ءوتتى.
نۇرشات توكەن,
«ەگەمەن قازاقستان»
