اقان سەرىگە ارنالعان شىعارمالار قاتارى بۇگىن مازمۇنى تەرەڭ جاڭا تۋىندىمەن تولىپ وتىر. ۇرپاققا رۋحاني ازىق بولار قۇندى دۇنيەلەردى قۇراستىرىپ, سەرى بابانىڭ ولەڭدەرى مەن ايتىستارىن توپتاستىرعان قازاقستاننىڭ ەڭبەك سىڭىرگەن قايراتكەرى, دراماتۋرگ جابال ەرعاليەۆ.
– ەلباسىنىڭ «رۋحاني جاڭعىرۋ» باعدارلاماسىنا سايكەس, بۇل ءىس اقمولا وبلىسىنىڭ اكىمى مالىك ءمىرزاليننىڭ تىكەلەي باستاماسىمەن جانە قولداۋىمەن جۇزەگە اسىرىلا باستادى. بيىلدىڭ وزىندە وبلىس باسشىسىنىڭ قولداۋىمەن اكادەميك, باتىر ءارى عالىم مالىك عابدۋلليننىڭ 11 تومدىعى, «مالىك عابدۋللين – قازاقتىڭ وقجەتپەسى», «جەر ءجانناتى اقمولا» فوتوالبومدارى, ساكەن ءجۇنىسوۆتىڭ «زاماناي مەن امانايى» لوندوندا اعىلشىن تىلىندە, تاريحشى قادىرجان ابۋەۆتىڭ كىتاپتارى جارىق كورىپ, وقىرمانداردىڭ ىقىلاسىنا بولەندى. مەنىڭ دە «الەمگە! عارىشقا! بولاشاققا جول اشقان تۇڭعىش!» اتتى ەلباسى جايلى كىتابىم دا اكىمنىڭ قولداۋىمەن باسىلىپ شىقتى. اقمولا وبلىسىنىڭ اكىمى مالىك ءمىرزاليننىڭ تاپسىرۋى جانە قولداۋىمەن «سال–سەرىلەر» كىتاپحاناسى سەرياسىمەن كوكشەتاۋ مەن قاراوتكەل وڭىرلەرىنىڭ سال-سەرىلەرىنىڭ مۇرالارىن جيناقتاپ كىتاپ شىعارۋدى قولعا الدىق,–دەدى جابال ەرعاليەۆ.
«سال-سەرىلەر» كىتاپحاناسى سەرياسىنىڭ العاشقى كىتابى «اقان سەرى» جارىق كورىپ, وقىرمان قولىنا ءتيدى. تاعىلىمدى كەشتە ەل اعاسى شياپ اليەۆ, يران سال تاسقارا, مەيرامبەك قيىقوۆ, عالىم, ادەبيەتشى مۇساتاي عالىم, اقىن قۇدايبەرلى مىرزابەك, اقان سەرى اتىنداعى جوعارى مادەنيەت كوللەدجىنىڭ قازاق ءتىلى مەن ادەبيەتى ءپانىنىڭ وقىتۋشىسى اقمارال قوڭىرقىزى جانە تاعى باسقالارى ءسوز سويلەپ, كىتاپتىڭ قۇندىلىعى حاقىندا ءوز ويلارىن ورتاعا سالدى.
تۇساۋكەسەر بارىسىندا وبلىستىق مادەنيەت باسقارماسىنىڭ باسشىسى رۇستەم بيكەنوۆ تاعى ءبىر جاعىمدى جاڭالىقتى ورتاعا سالدى. باسقارما باسشىسىنىڭ ايتۋىنشا, الداعى جىلى «استانا-كوكشەتاۋ» تاس جولىنىڭ بويىنا ۇكىلى ىبىراي, ءبىرجان سال, اقان سەرى, بالۋان شولاق جانە كەنەسارى حاننىڭ ەسكەرتكىشتەرى قويىلادى.
ادەبي كەشتە وبلىستىق فيلارمونيانىڭ انشىلەرى اۋەلەتە ءان شىرقاپ, شولىركەگەن ءشولدى قاندىردى. تاعى ءبىر ايتا كەتەرلىگى جاستار اقانداي ءور تۇلعانىڭ ءومىرى مەن شىعارماشىلىعىن پاش ەتەر كىتاپ كورمەسىنەن مول ماعلۇمات الدى.
بايقال ءبايادىل,
«ەگەمەن قازاقستان»
