وتىرىستا اۋعان سوعىسى ارداگەرلەرىنە جانە ارداگەرلىك ۇيىمدارعا قاتىستى بىرقاتار وزەكتى ءارى ماڭىزدى ماسەلەلەر تالقىلاندى. جيىن سالتاناتتى ماراپاتتاۋ راسىمىمەن باستالدى. قازاقستان رەسپۋبليكاسى پرەزيدەنتىنىڭ جارلىعىنا سايكەس جانە ەلباسى اتىنان ءماجىلىس دەپۋتاتى, «نۇر وتان» فراكتسياسىنىڭ مۇشەسى, QAZAQSTAN ARDAGERLERI قاۋىمداستىعىنىڭ توراعاسى باقىتبەك سماعۇل اۋعان سوعىسىنىڭ ءۇش ارداگەرىنە «قۇرمەت» وردەنىن تابىستادى.
ولار «اۋعانستان ارداگەرلەرى كەڭەسى» توراعاسىنىڭ ورىنباسارى بەيسەنعالي ارىستامبەكوۆ (الماتى وبلىسى قاراساي اۋدانى), «بوەۆوە براتستۆو» فيليالىنىڭ توراعاسى باۋىرجان مۇحامەديەۆ (قاراعاندى وبلىسى بالقاش قالاسى) جانە «اۋعانستان جانە جەرگىلىكتى سوعىستار ارداگەرلەرىنىڭ وداعى» توراعاسىنىڭ ءبىرىنشى ورىنباسارى سەرىك وسپانوۆ (استانا قالاسى).
باسقوسۋدا QAZAQSTAN ARDAGERLERI قاۋىمداستىعىنىڭ توراعاسى اۋعان سوعىسىنىڭ ارداگەرلەرى ەلباسى ن.نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋىندا العا قويعان «مەكتەپتەردە اسكەري-پاتريوتتىق تاربيەنىڭ ءرولىن كۇشەيتۋ» مىندەتىن جۇزەگە اسىرۋعا اتسالىسىپ, جاس ۇرپاق بويىندا تۋعان جەرگە دەگەن ماحاببات پەن بابادان قالعان باتىرلىق قاسيەتىن دارىتۋعا ۇلەس قوساتىنىن ايتتى. ول سونىمەن قاتار «اۋعانستاننان كەڭەس اسكەرلەرىنىڭ شەكتەۋلى كونتينگەنتىنىڭ شىعارىلۋىنىڭ 30 جىلدىعىنا» وراي ارنايى مەدال شىعارۋ تۋرالى شەشىم قابىلدانعانىن دا تىلگە تيەك ەتتى. مەرەيتويعا ارنالعان مەدالمەن قاتارى 18 مىڭنان اساتىن بارلىق اۋعان سوعىسىنىڭ ارداگەرلەرى ماراپاتتالماق.
– بۇگىندە اۋعان سوعىسىنىڭ ارداگەرلەرى ەلباسىنىڭ بيىلعى 5 قازانداعى جولداۋىندا ايتىلعان «سارباز» بالالار-جاسوسپىرىمدەر بىرلەستىگىن قۇرىپ, مەكتەپتەردە اسكەري-پاتريوتتىق تاربيەنىڭ ءرولىن كۇشەيتۋ مىندەتىن ورىنداۋعا بەلسەندى قاتىسۋدا. اسكەري-پاتريوتتىق تاربيە بەرۋ ىسىندە وسى جىلدار ىشىندە ارقايسىمىز ءوز سالامىزدا, ءوز وڭىرىمىزدە ءبىراز ناقتى ءىس تىندىردىق, مول تاجىريبە قوردالادىق. ءبىز اتقاراتىن جۇمىس ءالى كوپ. ەندى بۇل جۇمىستى بىرلەسە ءارى ۇيلەسىمدى نەگىزدە جۇرگىزۋگە ءتيىسپىز, – دەيدى باقىتبەك سماعۇل ۇلى.
QAZAQSTAN ARDAGERLERI قاۋىمداستىعى وتكىزگەن ەلىمىزدەگى اۋعان سوعىسى ارداگەرلەرى ۇيىمدارىنىڭ كەزەكتەن تىس كونفەرەنتسياسىندا بارلىق ۇيىم باسشىلارى «قازاقستاننىڭ ينتەرناتسيوناليست-جاۋىنگەرلەرىنىڭ ارداگەرلىك ۇيىمدارىنىڭ ورتالىق كەڭەسىن قۇرۋ» تۋرالى شەشىم قابىلدادى.
اتالعان كەڭەس وسكەلەڭ ۇرپاقتى اسكەري-پاتريوتتىق رۋحقا تاربيەلەۋ, اۋعان سوعىسى ارداگەرلەرىن الەۋمەتتىك قولداۋ, سونداي-اق قورعانىس مينيسترلىگى ۇسىنعان, مۇددەلى مەملەكەتتىك ورگانداردىڭ بىرلەسكەن بۇيرىعىمەن بەكىتىلگەن «اۋعانستاننان كەڭەس اسكەرلەرىنىڭ شەكتەۋلى كونتينگەنتىنىڭ شىعارىلۋىنىڭ 30 جىلدىعىنا ارنالعان ءىس-شارالاردى وتكىزۋ جونىندەگى نەگىزگى جوسپار» بويىنشا ارى قارايعى جۇمىستار مەن ءىس-قيمىلداردى ۇيلەستىرەتىن بولادى. بۇل جۇمىسقا باسشىلىق ەتۋ QAZAQSTAN ARDAGERLERI قاۋىمداستىعىنا جۇكتەلدى.
