زامان تالابىنا ساي ەلباسىنىڭ قولداۋىمەن سالىنعان ورتالىق وسى ءوڭىردىڭ مەديتسينادا قوردالانعان ماسەلەلەرىن شەشىپ كەلەدى. بۇرىن دەرتتى جۇرت وتا جاساتۋ ءۇشىن الماتى, استانا بارسا بۇگىندە وسى ورتالىقتى تاڭدايدى. ايتۋلى مەرەكەمەن ورتالىق قىزمەتكەرلەرىن قۇتتىقتاعان وبلىس اكىمى قىرىمبەك كوشەرباەۆ بۇل ورتالىقتىڭ مەملەكەت باسشىسىنىڭ قولداۋىمەن سالىنعانىن تىلگە تيەك ەتتى.
- وبلىستىق مەديتسينا ورتالىعىنىڭ تولىق اياقتالۋى – ەلباسىمىز نۇرسۇلتان ءابىش ۇلى نازارباەۆتىڭ تاباندى ساياساتىنىڭ جەمىسى. وسىدان 20 جىل بۇرىن جەلتوقسان ايىندا سىر بويىنا كەلىپ, مەديتسينا ورتالىعىنىڭ لەنتاسىن قيدى. زامان تالابىنا ساي بولۋعا امانات ارقالاتتى. وبلىستىق مەديتسينا ورتالىعى وڭىردە كوپسالالى مەديتسينالىق كومەك كورسەتەتىن جالعىز ورتالىق. وسى ورتالىقتىڭ زامان تالابىنا ساي بولىپ, مەديتسينانىڭ سوڭعى جەتىستىگىن يگەرۋگە كۇش سالۋىمىز قاجەت,-دەدى وبلىس باسشىسى.
سالتاناتتى جيىندا مەديتسينا ورتالىعىنىڭ ۇجىمى اتىنان مەديتسينا ارداگەرى تۇرعانباي ماحانوۆ قۇتتىقتادى.
وبلىس اكىمدىگى مامانداردى دايارلاۋ ىسىنە ۇلكەن كوڭىل ءبولىپ وتىر. بۇگىندە اكىم گرانتى ارقىلى 72 ستۋدەنت ەلىمىزدەگى جەتەكشى وقۋ ورىندارىندا ءبىلىم الىپ جاتسا, وبلىس دارىگەرلەرى شەت ەلدىڭ مىقتى كلينيكالارىندا تاجىريبەدەن وتۋدە.
باقتيار تايجان,
«ەگەمەن قازاقستان»
قىزىلوردا وبلىسى
