بۇل ءبىلىم ورداسىنداعى كومپيۋتەرلىك ينجينيرينگ كافەدراسىندا وقيتىن ستۋدەنتتەرگە ارنايى جاساقتالعان جاڭا زاماناۋي زەرتحانا بولىپ تابىلادى. «Cisco» IT-تەحنولوگيالار سالاسىنداعى جەتەكشى كومپانيالاردىڭ ءبىرى جانە «تسيفرلىق قازاقستان» باعدارلاماسىنا اياسىندا جۇزەگە اسىرىلادى. Cisco - جوعارى تەحنولوگيالار سالاسىندا ماماندانعان, ويتكەنى وسى زەرتحانادا ءبىلىم العان ستۋدەنتتەرگە حالىقارالىق سەرتيفيكات بەرىلەدى.
شاراعا «Yessenov University» رەكتورى بەرىك احمەتوۆ, «نۇر وتان» پارتياسى ماڭعىستاۋ وبلىستىق فيليالى توراعاسىنىڭ ءبىرىنشى ورىنباسارى نۋري تۋمىشەۆ جانە فيليال قىزمەتكەرلەرى, ءبىلىم ورداسىنىڭ وقىتۋشىلارى جانە ستۋدەنتتەر قاتىستى.
زەرتحانانىڭ اشىلۋىندا ءسوز سويلەگەن نۋري تۋمىشەۆ, بۇعان دەيىن بىرقاتار وقۋ ورىندارىندا تەگىن IT-سىنىپتاردىڭ اشىلعاندىعىن ايتىپ ءوتتى جانە بۇل باستامالار «نۇر وتان» پارتياسىنىڭ قولداۋىمەن جۇزەگە اسىرىلىپ جاتقاندىعىن تىلگە تيەك ەتتى.
ونىڭ ايتۋىنشا, قازىردىڭ وزىندە الەمنىڭ كوپتەگەن ەلدەرىندە ساۋاتتى ينجەنەرلەر مەن IT-سالا ماماندارىنىڭ جەتىسپەۋشىلىگى بايقالادى. كۇندەلىكتى ءومىرىمىز اقپاراتتىق تەحنولوگيالارعا بارىنشا بەيىمدەلىپ جاتقاندىعىننا قاراماستان, بۇل ماماندىق يەلەرى ءالى دە سۇرانىسقا يە.
قازىرگى قوعامدا عىلىمي-تەحنيكالىق پروگرەستىڭ دامۋىنا بايلانىستى ادام ءىس-ارەكەتىنىڭ بارلىق سالاسىندا اقپاراتتىق تەحنولوگيانى پايدالانۋ كەڭ ەتەك جايدى. قوعامداعى اقپاراتتىڭ تارالۋ اۋقىمىنىڭ تەز وسۋىنە قازىرگى زامان ادامىنىڭ اقپاراتپەن جۇمىس ىستەي ءبىلۋ يكەمدىلىگى وڭ ىقپال ەتۋدە. ادام مۇمكىندىگىنشە كوپ ماعلۇمات الىپ, اقپاراتتى بارىنشا كوبىرەك يگەرۋگە تالپىنا تۇسۋدە. سول سەبەپتى وسى سالانى يگەرۋ ماڭىزدى جانە وعان جاستاردىڭ قىزىعۋشىلىعى كۇن ساناپ ارتا ءتۇسۋى ءتيىس. ەڭ باستىسى قولىنا ديپلوم العان ماماندار جۇمىسسىز قالماۋى كەرەك. ال ءبىلىمدى جاستارعا جۇمىس قاشاندا تابىلاتىنى ءسوزسىز.
-قازىرگى زاماندا كاسىپورىن ءيميدجى جانە سايتى – كەز-كەلگەن ۇيىمنىڭ بولاشاعىنىڭ بار نەمەسە جوعىن كورسەتىپ تۇرعانداي. بۇل رەتتە ۆەب-ديزاينەر – ەڭ جوعارى تولەنەتىن «كومپيۋتەرلىك» ماماندىقتاردىڭ ءبىرى بولىپ قالا بەرمەك. ءححى-عاسىر – جاڭا اقپاراتتىق تەحنولوگيالار عاسىرى دەپ بەكەر ايتىلماسا كەرەك, بۇگىنگى كۇنى ءاربىر كومپانيا وتە جوعارى جالاقى مەن مانساپتىق وسىممەن ىنتالاندىراتىن IT- باعىتتاعى قىزمەتكەرلەرگە ءزارۋ ەكەندىگى جاسىرىن ەمەس.
الەمنىڭ ەڭبەك نارىعى ءبىز ويلاعاننان دا جىلدام وزگەرە تۇسۋدە. دەموگرافيانىڭ ءوسۋى مەن تەحنولوگيانىڭ دامۋىنان 2020 جىلعا قاراي 5 ميلليوننان استام ادام جۇمىسسىز قالۋى مۇمكىن دەگەن بولجامدار ءجيى ايتىلىپ ءجۇر. قازىرگى تاڭدا دامىعان ەلدەردىڭ ءوزى قاي سالانى مەڭگەرگەن دۇرىس دەگەن سۇراققا ءدوپ باسىپ جاۋاپ قايتارا الماي الەك. دەسە دە, الەمدىك نارىقپەن ساناسۋعا تۋرا كەلىپ تۇر. روبوتتىق تەحنولوگيانىڭ دامۋىنا سەپتىگىن تيگىزىپ وتىرعان IT سالاسىنىڭ ماماندارى وسىعان دەيىن دە سۇرانىستا بولسا, كەيىن دە سۇرانىستان تۇسپەيتىنى انىق, دەدى ول.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
