بۇۇ قاۋىپسىزدىك كەڭەسىنىڭ مۇشەلەرى حالىقارالىق قوعامداستىق پەن بۇۇ-نىڭ استانا پروتسەسى اياسىنداعى ءىس-قيمىلىن قوسا العاندا, سيرياداعى داعدارىستى رەتتەۋدەگى كۇشىن جوعارى باعالادى. قابىلدانعان قاراردا استانا فورماتىنداعى كەلىسسوزدەر ۇستالعان ادامداردىڭ, اسىرەسە ايەلدەر مەن بالالاردىڭ تەز ارادا بوساتىلۋىنا, سونداي-اق قايتىس بولعانداردىڭ ءمايىتىن تاپسىرۋعا, جوعالعان ادامداردى انىقتاۋعا ەلەۋلى ۇلەس قوساتىنىن اتاپ ءوتتى.
قارارعا سايكەس, بۇۇ قاۋىپسىزدىك كەڭەسى «بارلىق تاراپتار بۇۇ-نىڭ سيرياداعى قاجەتتىلىكتەرىن كەڭىنەن باعالاۋ نەگىزىندە بارلىق سۇرالعان اۋداندارعا جانە حالىقتىڭ بارلىق توپتارىنا بۇۇ-نىڭ گۋمانيتارلىق جاساقتارى جانە ونىڭ ورىنداۋشى سەرىكتەستەرى ءۇشىن, سونىڭ ىشىندە ءدارى-دارمەكتەر مەن حيرۋرگيالىق جابدىقتاردىڭ قاۋىپسىز, كەدەرگىسىز جانە تۇراقتى قولجەتىمدىلىگىن قامتاماسىز ەتۋىن تالاپ ەتەدى».
قازاقستاننىڭ بۇۇ جانىنداعى تۇراقتى وكىلى قايرات وماروۆ كەزدەسۋ بارىسىندا قازاقستان سيرياداعى گۋمانيتارلىق ۇيىمداردىڭ, سونىڭ ىشىندە بۇۇ اگەنتتىكتەرى مەن ۇەۇ-نىڭ قىزمەتىن قولدايتىندىعىن اتاپ ءوتتى. ء«بىز ۇكىمەت باقىلاۋىنداعى, ۇكىمەتپەن باقىلانبايتىن اۋماقتاردا بارلىق ادامدارعا كومەك كورسەتۋدە گۋمانيتارلىق بەيتاراپتىلىق پەن ادىلەتتىلىك پرينتسيپتەرىن ساقتاۋدىڭ ماڭىزدىلىعىن اتاپ وتەمىز», دەدى ەلشى.
قازاقستان يوردانيا مەن تۇركيادان سيرياعا گۋمانيتارلىق كومەك كورسەتۋدى قايتا جانداندىرۋ مەن ونى ۇلعايتۋدى قولدادى. سونىمەن قاتار بۇۇ-نىڭ گۋمانيتارلىق ميسسيالارىنا قاۋىپ توندىرەتىن تەرروريستىك ۇيىمداردىڭ ارانداتۋ ارەكەتتەرىنە الاڭداۋشىلىق ءبىلدىرىلدى.
سونداي-اق ق.وماروۆ بۇۇ-نىڭ بوسقىندار ءىسى جونىندەگى جوعارعى كوميسسار باسقارماسى جانە حالىقارالىق قىزىل كرەست كوميتەتى وكىلدەرىنىڭ 28-29 قاراشادا استانا قالاسىندا وتكەن سيريا جونىندەگى كەلىسسوزىنە قاتىسۋىن قولدادى. استانا فورماتىنداعى وتكەن كەزدەسۋ وسى ەلدەگى بەيبىت كۇشتەردى نىعايتۋعا جانە حالىقتىڭ جاپا شەگۋىن توقتاتۋعا باعىتتالعانىن اتاپ ءوتتى.
بۇۇ قاۋىپسىزدىك كەڭەسىنىڭ وتىرىسىندا بۇۇ باس حاتشىسىنىڭ گۋمانيتارلىق ماسەلەلەر جونىندەگى ورىنباسارى مارك لوۋكوكتىڭ بايانداماسى تىڭدالدى. ءوز بايانداماسىندا ول 13 ميلليون ادامنىڭ گۋمانيتارلىق كومەككە مۇقتاج ەكەنىن, ونىڭ ىشىندە 3 ميلليوننان استام ادامعا جەدەل كومەك قاجەتتىگىن اتاپ ءوتتى. رۋكبان لاگەرىندە تۇراتىن 40 مىڭ ادامنىڭ جاعدايى تۇراقتى تۇردە گۋمانيتارلىق كومەك كورسەتۋدى تالاپ ەتەدى. 2018 جىلعى قاڭتار-قىركۇيەك ارالىعىندا بۇۇ مەن ونىڭ گۋمانيتارلىق ارىپتەستەرى اي سايىن ءۇش ميلليون ادامعا كومەك كورسەتتى. جالپى العاندا, بۇۇ مەن ونىڭ گۋمانيتارلىق ارىپتەستەرى كومەككە مۇقتاج ادامداردىڭ 40 پايىزىنا كومەك كورسەتتى.
