يپوتەكا ورتالىعى حالىققا تۇرعىن ءۇي نەسيەسى بويىنشا بارلىق قىزمەتتى كورسەتەدى جانە تۇرعىن ءۇي ساتىپ الۋعا بايلانىستى بارلىق ماسەلەنى ءبىر جەردە شەشۋگە مۇمكىندىك بەرەدى. ورتالىق ء«بىر تەرەزە» قاعيداتى بويىنشا جۇمىس ىستەپ, قۇجات تاپسىرۋدا كليەنتتەرگە بارلىق جاعداي قاراستىرىلعان. BI Group حولدينگىنىڭ باسقارما توراعاسى امانگەلدى وماروۆ:
− كليەنتتەردىڭ قاجەتتىلىكتەرىن قاناعاتتاندىرۋعا جانە قازىرگى زامانعى تەحنولوگيالارمەن بىرگە جۇرۋگە ۇمتىلاتىن كومپانيا رەتىندە بۇگىنگى تاڭدا ادام ءۇشىن ەڭ ماڭىزدى رەسۋرس − ۋاقىت ەكەنىن جاقسى تۇسىنەمىز. وسى رەتتە, BI Group پاتەر تاڭداۋدان باستاپ, تولەم شارتتارىنا دەيىن ءاربىر كليەنتكە قولايلى بولاتىنداي جاعداي جاساپ وتىر, – دەدى. ونىڭ ايتۋىنشا, استانادا يپوتەكالىق قارىز بەرۋ بۇگىندە 2016 جىلعى دەرەكتەرمەن سالىستىرساق, 3 ەسەگە وسكەن. 2018 جىلى حولدينگكە 10 000-عا جۋىق كليەنت جۇگىنگەن. بۇل دەرەكتەردى تالداپ, ساراپتاي كەلە كومپانيا باسشىلىعى ەلىمىزدەگى قۇرىلىس كومپانيالارى مەن بانكتەر الدىندا يپوتەكا ماسەلەسى بۇگىنگى تاڭدا اسا ماڭىزدى ەكەنىن نازارعا العان.
– وسىلايشا, كليەنتتەرىمىزگە ىڭعايلى بولۋ ءۇشىن BI Finance يپوتەكا ورتالىعىن قۇرۋ تۋرالى ورتاق شەشىمگە كەلدىك. وسى ورتالىقتى قۇرۋدىڭ باستى ماقساتى − نەسيە بەرۋ پروتسەسىن جەڭىلدەتۋ, كليەنتكە ىڭعايلى بولاتىنداي جاعداي جاساۋ. BI Group-تان پاتەر تاڭداعاننان كەيىن, كليەنت BI Finance قىزمەتكەرىمەن بىرلەسىپ, بانك نەمەسە مەملەكەتتىك باعدارلامالاردىڭ ءبىرىنىڭ تالاپتارى مەن وعان قولايلى شارتتارى بار نەسيە بەرۋ باعدارلاماسىن تاڭدايدى. ءبىزدىڭ كومپانيانىڭ قىزمەتكەرى سەرىكتەس بانكتەردىڭ بىرىنەن قارىز الۋدىڭ بارلىق پروتسەسىندە كليەنتكە قولداۋ بىلدىرەدى. ورتالىقتىڭ تاعى ءبىر ارتىقشىلىعى – ءوتىنىمدى جەدەل قاراۋ جانە اقشانى جەدەل بەرۋ. بۇعان قوسا, ءوتىنىم بەرۋدەن باستاپ يپوتەكالىق نەسيە الۋعا دەيىنگى يپوتەكالىق قارىزدى رەسىمدەۋ ۋاقىتىن قىسقارتۋ جانە وڭاي ءارى تەز شەشۋگە مۇمكىندىك بەرەدى. ءبىزدىڭ كليەنتكە ساۋالناما تولتىرۋ جانە قۇجاتتار پاكەتىن راسىمدەۋ ءۇشىن بانك كەڭسەلەرىنە قوسىمشا كەلۋدىڭ قاجەتى جوق. ءبىرىنشى كرەديتتىك بيۋرومەن (بكب) ىنتىماقتاستىقتىڭ ارقاسىندا ءبىز وزدىگىمىزشە, كليەنتتەردىڭ كەلىسىمىمەن جسن بويىنشا بكب دەرەكتەر بازاسىمەن سكورينگ وتكىزەمىز, كليەنتتەردىڭ بار بورىشتىق جۇكتەمەسى, ولاردىڭ كرەديتتىك تاريحى جانە شەشىم قابىلداۋ ءۇشىن قاجەتتى وزگە دە دەرەكتەر بويىنشا اقپارات الامىز, – دەدى باسقارما توراعاسى. ونىڭ ايتۋىنشا, جاڭا ورتالىق ءتۇرلى ولشەمدەردەگى پاتەرلەر مەن ۇيلەردىڭ سان ءتۇرىن ۇسىنىپ قانا قويماي, سەرۆيستى جاقسارتۋ ماسەلەلەرىن دە قامتيدى. «بۇل جاڭالىق ءبىزدىڭ كومپانيانىڭ ءاربىر كليەنتىنە ارتىق كۇش, بوس ۋاقىت جۇمساماي, جەكە تۇرعىن ءۇي يەسى بولۋعا مۇمكىندىك بەرەدى دەپ سەنەمىز», – دەدى امانگەلدى وماروۆ.
«قازاقستاننىڭ تۇرعىن ءۇي قۇرىلىس جيناق بانكى» اق ورتالىق فيليالىنىڭ ديرەكتورى جانسۇلتان ماتاەۆتىڭ ايتۋىنشا, جىلجىمايتىن م ۇلىكتى ساتىپ الۋ كەزىندە كليەنتتىڭ جانىندا بولۋ, ول ءۇشىن پروتسەستى بارىنشا ىڭعايلى جانە جايلى ەتۋ اسا ماڭىزدى.
– سوندىقتان BI Group كومپانياسىنىڭ «BI Finance» يپوتەكا ورتالىعىن قۇرۋ تۋرالى ويىن قۋانا قولدادىق. بۇل ورتالىققا كەلگەن قوناق پاتەر تاڭداپ قانا قويماي, قولايلى نەسيەلەندىرۋ شارتتارىن بەلگىلەپ, كەڭەس الىپ, مەنەدجەرلەر ارقىلى نەسيەگە ءوتىنىم بەرە الادى. بۇل ءۇشىن ارنايى ۋاقىت ءبولىپ, تۇرعىن ءۇي قۇرىلىس جيناق بانكى بولىمشەسىنە بارۋدىڭ قاجەتى جوق. مۇنداي جاڭالىقتىڭ كليەنتتەرىمىزگە ۇنارى ءسوزسىز. ونىڭ ۇستىنە ولاردىڭ اراسىندا BI Group كومپانياسىنان ەڭ وڭتايلى شارتتارمەن ءۇي ساتىپ العان ادامدار دا بار. ءبىزدىڭ بانك سالىمشىلارعا جىلدىق مولشەرلەمەسى 3,5-8,5% ارالىعىنداعى زاەمدار ۇسىنادى. تۇرعىن ءۇي قۇرىلىس جيناق جۇيەسىن بارلىق ادام قولدانا الادى. ول كەز كەلگەن تابىس دەڭگەيى بار ادامعا ءۇي الۋعا مۇمكىندىك بەرەدى. ەڭ باستىسى الدىڭا ماقسات قويىپ, تۇرعىن ءۇي قۇرىلىس جيناق بانكىنەن دەپوزيت اشىپ, وعان تۇراقتى تۇردە اي سايىن اقشا سالىپ وتىرۋ كەرەك. وسى جوسپارمەن ءجۇرىپ وتىرعان ادام بىرنەشە جىل ىشىندە باسپانا يەسى اتانا الادى. بۇعان تۇرعىن ءۇي قۇرىلىس جيناق بانكى ارقىلى ءۇيلى بولعان 170 مىڭ قازاقستاندىقتىڭ مىسالى – دالەل. ولاردىڭ 35 مىڭى وسى جىلى قونىس تويىن اتاپ ءوتتى. بۇدان بولەك 1,2 ملن سالىمشى تۇرعىن ءۇي قۇرىلىس جيناق بانكىندە اقشا جيناپ جاتىر. ولار جاقىن ارادا پاتەرلى بولۋدى جوسپارلايدى. بۇل جولدا ولارعا BI Group ۇيىمىنىڭ دا قولداۋ بىلدىرەتىنىنە سەنىمىم مول, – دەدى ج.ماتاەۆ.
جيىندا ءسوز العان «بانك تسەنتركرەديت» اق باسقارما توراعاسىنىڭ ورىنباسارى تيمۋر يشمۇراتوۆ بۇگىندە تۇرعىن ءۇي نارىعىندا يپوتەكالىق كرەديت بەرۋ نارىعىنىڭ ساپالىق دەڭگەيى ارتىپ كەلە جاتقانىن جەتكىزدى. ونىڭ ايتۋىنشا, بۇل ۇدەرىس يپوتەكالىق قارىزدىڭ بىرقاتار مەملەكەتتىك باعدارلامانىڭ ارقاسىندا ەلىمىزدىڭ تۇرعىندارىنىڭ باسىم بولىگىنە قولجەتىمدى بولا باستاعاندىعىمەن تىعىز بايلانىستى.
– ءبىز كامەلەت جاسىنا جەتكەن ءاربىر قازاقستاندىق ازاماتتىڭ ءوز شاڭىراعى بولۋى قاجەتتىگىن جاقسى تۇسىنەمىز جانە قىزمەتىمىزدىڭ وسى باعىتىنا باستى كوڭىل بولەمىز. قازىرگى ساتتە تسەنتركرەديت بانكى يپوتەكالىق كرەديت بەرۋگە بايلانىستى ءوزىنىڭ باعدارلامالارىن دا, مەملەكەتتىك باعدارلامالاردى دا ىسكە اسىرىپ وتىر. ءاربىر ونىمگە دەگەن وزىندىك سۇرانىس بار. ءبىزدىڭ باعدارلامالارىمىزدىڭ نەگىزگى ارتىقشىلىعى ءاربىر كليەنتتىڭ بابىن تاۋىپ, وتىنىمدەردى وپەراتيۆتى تۇردە شۇعىل قاراستىرۋ بولىپ تابىلادى. قارىز الۋشىنىڭ قارجىلىق جاعدايى جەتكىلىكسىز بولعاندا, بانك بالاما شەشىمدەر ۇسىنا الادى. بۇرىن بانك قازاقستان يپوتەكالىق كومپانياسىمەن بىرگە «يپوتەكا نۇرلى جەر» باعدارلاماسىن ءساتتى ىسكە اسىرعان بولاتىن, بۇل باعدارلامانىڭ بارلىق كەزەڭى ىشىندە تسەنتركرەديت بانكى ساتىلىمدار كولەمى بويىنشا كوشباسشى بولدى. ايتا كەتەتىن تاعى ءبىر جايت – قازىر بانك تانىمال مەملەكەتتىك «7-20-25» باعدارلاماسىن ىسكە اسىرىپ جاتىر. پايىزدىق مولشەرلەمە تومەن, باستاپقى جارنا قولجەتىمدى جانە قارىزدى وتەۋ مەرزىمى ۇزاق بولعاندىقتان, كوپتەگەن قازاقستاندىقتار وزدەرىنىڭ باسپانا ماسەلەلەرىن شەشۋ ءۇشىن وسى باعدارلامانى قاراستىرادى. قازىرگى ساتتە تسەنتركرەديت بانكى وسى باعدارلامانى ىسكە اسىرۋشى قازاقستاندىق ەكىنشى دەڭگەيلى بانكتەر اراسىندا ءسوزسىز كوشباسشى اتانۋدا. ءبىز BI Group يپوتەكالىق ورتالىعىنىڭ اشىلعانىن قولدايمىز جانە وسى جاڭا قۇرىلىمنىڭ ەلىمىزدەگى تۇرعىن ءۇي ماسەلەلەرىن شەشۋگە وڭ ىقپال ەتەتىنىنە سەنەمىز. ءبىزدىڭ ارامىزدا بۇرىننان سەرىكتەستىك قارىم-قاتىناس قالىپتاسقان, سوندىقتان BI Group توبىمەن ىنتىماقتاستىعىمىز كەلەشەكتە دە بەرىك ءارى جەمىستى بولاتىنىنا سەنەمىز, – دەدى ت.يشمۇراتوۆ.
جيىندا «قازاقستان يپوتەكالىق كومپانياسى «يۇ» اق باسقارما توراعاسىنىڭ ورىنباسارى ءماجيت ءجۇسىپوۆ وسىدان 1 جارىم اي بۇرىن حالىققا جاڭا «وردا» يپوتەكالىق باعدارلاماسى تانىستىرىلعانىن تىلگە تيەك ەتتى. ونىڭ ايتۋىنشا, بۇل جوباعا مەملەكەت تاراپىنان قاراجات تارتىلماعان. نارىققا بەيىمدەلىپ جاسالعان يپوتەكالىق باعدارلاما تابىسى تۇراقتى ءارى جەتكىلىكتى قازاقستاندىقتارعا ارنالعان.
– BI Group بىزگە كومپانيانىڭ كليەنتتەرىنە ءوز يپوتەكاسىن ۇسىنۋعا مۇمكىندىك بەرەدى. «وردا» باعدارلاماسىنىڭ شارتتارى قارىز سوماسى جانە كىرىستەردى راستاۋ, باستاپقى جارنانى اۋىستىرۋ بويىنشا BI Group كليەنتتەرىنە ىڭعايلى بولادى دەپ ەسەپتەيمىز, – دەدى م.ءجۇسىپوۆ.
كەزدەسۋ بارىسىندا حولدينگ پەن بانكتەر ىنتىماقتاستىق تۋرالى مەموراندۋمعا قول قويدى. 2017 جىلى قازاقستاندا يپوتەكالىق نەسيە بەرۋ كولەمى 355,8 ملرد تەڭگەنى, اعىمداعى جىلدىڭ 10 ايىندا 410 ملرد تەڭگەنى قۇرادى. 2017 جىلى BI Group-تان پاتەردى يپوتەكامەن العانداردىڭ پايىزدىق كورسەتكىشى 5,9%, 2018 جىلى – 6,8% قۇرادى. 2019 جىلى كومپانيا جوسپارى بويىنشا بۇل كورسەتكىش 10-15%-عا دەيىن ارتۋى مۇمكىن. جاڭا يپوتەكا ورتالىعى 2018 جىلدىڭ 20 جەلتوقسانىنان باستاپ سىعاناق كوشەسى 18/3, Viva Plaza بيزنەس ورتالىعىندا جۇمىسىن باستايدى.
ەركەجان ايتقازى,
«ەگەمەن قازاقستان»
