قازان قالاسىنداعى «حالىقتار دوستىعى» ۇيىندە وتكەن شاراعا تاتارستانداعى قازاق دياسپوراسى وكىلدەرى, ستۋدەنت-جاستار جانە مەملەكەتتىك مەكەمە وكىلدەرى دە قاتىسقان.
قازان ۋنيۆەرسيتەتى تاريح جانە حالىقارالىق قاتىناستار فاكۋلتەتىندە تۇركىتانۋ ماماندىعىنا وقىپ جۇرگەن 3 كۋرس ستۋدەنتى, وسى شارانى ۇيىمداستىرۋشىلاردىڭ ءبىرى روزاليا ەلجاسوۆا مەرەكەلىك سالتاناتتى شاراعا قازاقستاننان بارعان وزگە ۇلت وكىلدەرى, ءتىپتى تاتارستاندىق جەرگىلىكتى جاستار دا بەلسەنە قاتىسقانىن ايتادى. ايتا كەتەيىك, روزاليا رافحاتقىزى – قازانداعى قازاق قاۋىمداستىعى جاستار قاناتىنىڭ جەتەكشىسى.
قازاقستاننىڭ ءار تۇكپىرىنەن جينالعان جاستار وتانىنىڭ ەڭ ۇلىق مەرەكەسىنە وراي كونتسەرتتىك باعدارلاما ازىرلەپ, بار ونەرىن كورسەتتى.
- وتانىمىزدان الىستا جۇرسەك تە وسىناۋ مەرەكە كۇندى ءبىز بۇكىل قازاقستاندىقتارمەن اتاپ وتكىمىز كەلدى. ويتكەنى وسىدان 27 جىل بۇرىن قول جەتكەن تاۋەلسىزدىك پەن ازاتتىق – قازاق حالقىنىڭ تالاي جىل بويى كۇرەسكەن ارمانى ەدى, - دەيدى روزاليا ەلجاسوۆا.
شارانىڭ وتۋىنە قازانداعى «قازاقستان» قوعامىنىڭ توراعاسى ساعيت جاقسىباەۆ, «حالىقتار دوستىعى» ءۇيىنىڭ باسشىلىعى قولداۋ كورسەتكەن.
قازبەك قۇتتىمۇرات ۇلى,
«ەگەمەن قازاقستان»
