قازاقستاننىڭ ءار وڭىرىنەن جينالعان كوماندالار اراسىنداعى سايىس 19 جەلتوقسانعا دەيىن جالعاسادى.
قازبەك بايبولوۆ ەڭبەك جولىن تۋعان جەرى پەتروپاۆلدا باستاعان. كسرو چەمپيوناتىنىڭ بەس دۇركىن كۇمىس جانە ءتورت دۇركىن قولا جۇلدەگەرى, دوپتى حوككەيدەن سپورت شەبەرى, قازاقستاننىڭ ەڭبەك سىڭىرگەن جاتتىقتىرۋشىسى اتانعان.
سولتۇستىك قازاقستان كومانداسىنىڭ باس باپكەرى اناتولي كۋۆشينيكوۆتىڭ ايتۋىنشا, ق. بايبولوۆ سياقتى تاماشا حوككەيشىنىڭ ەسىمىن ۇلىقتاۋ, لايىقتى ءىزباساسارلارىن تاربيەلەۋ جاعى ۇمىت بولىپ كەلەدى. وسى ولقىلىقتىڭ ورنىن تولتىرۋدى ماقسات ەتكەن دەنەشىنىقتىرۋ جانە سپورت باسقارماسى بىرقاتار باستامالارعا قولدۋ كورسەتۋدە. سونىڭ ءبىرى– وڭىردە ەل كۋبوگى جارىسىنىڭ ۇيىمداستىرىلۋى.
اقتوبە وبلىسى حرومتاۋ قۇراما كومانداسىنىڭ ويىنشىسى اندرەي سەميننىڭ اتالمىش سپورت تۇرىمەن اينالىسقانىنا 9 جىل بولىپتى. بىلتىر كۋبوكتى جەڭىپ السا, بيىل دا ءۇمىتتى.
«جارىسقا دايىندىعىمىز وتە جاقسى. اتاعىمىزدى قورعاۋعا بار كۇش-جىگەرىمىزدى جۇمىلدىرامىز», دەيدى كوماندانىڭ بەلدى شابۋىلشىسى.
سولتۇستىك قازاقستان كومانداسىنىڭ قورعاۋشىسى دياس ەرعاليدىڭ سوزىنە قاراعاندا,قۇراما وسكەمەن, ورال قالالارىندا وتكەن جارىستارعا قاتىسىپ, جۇلدەلى 3-ءشى ورىندى يەلەنگەن. ءبىراز تاجىريبە جيناقتاپتى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
