ديماشتىڭ دارا داۋىسى دۇنيەنى ءدۇر سىلكىنتىپ, جاھاننىڭ جاڭالىعى بولعانىنا كوپ ۋاقىت وتە قويعان جوق. وسى از عانا ۋاقىتتىڭ ىشىندە الەمدىك دەڭگەيدە قۇبىلىسقا اينالعان دارىننىڭ ونەردەگى ەڭ العاش تۇساۋىن كەسكەن ەلەۋلى وقيعا – 2015 جىلى ۆيتەبسك قالاسىندا وتكەن XXIV حالىقارالىق ەسترادالىق ءان ورىنداۋشىلاردىڭ «سلاۆيان بازارى-2015» بايقاۋى. بايقاۋدىڭ گران-ءپريىن جەڭىپ العان ايتۋلى ءسات ءانشى ومىرىنە ءوزىنىڭ ۇلكەن وزگەرىسىن دە قوسا الا كەلدى. ايتكەنمەن, ودان كەيىن دە تالاي ءان بايقاۋلارىندا توپ جارىپ جۇرگەن تالانتتى جاھان تانىپ, اتاعى شارتاراپتى شارلاعان تاريحي ءسات ديماشتىڭ قىتايدا وتكەن «I am a singer» جوباسىنداعى جۇلدىزدى ونەر كورسەتۋىنەن كەيىن ءتىپتى ءورشىدى. بۇگىندە ديماشتى تانىمايتىن ەل كەم دە كەم. وتكەندە عانا ءانشىنىڭ لوندون قالاسىندا قازاق تىلىندە وتكەن كونتسەرتىنە ينە شانشار ورىن قالدىرماي جينالعان اعىلشىن جۇرتىنىڭ انگە, ديماش ونەرىنە دەگەن ىستىق ىقىلاسى – تۇتاستاي قازاق ۇلتىنا دەگەن قۇرمەت پەن باس ءيۋدى بىلدىرسە كەرەك.
ديماشتىڭ ونەردەگى جاڭالىعىن جالعاپ, وكشە باسىپ كەلە جاتقان ءىنىسى راحات-بي ابدىساعين ەسىمى دە بۇگىندە مۋزىكاداعى الەم تانىعان فەنومەنگە اينالىپ ۇلگەردى. 10 جاسىندا جاڭالىق جاساپ, العاشقى كلاسسيكالىق تۋىندىسىن ومىرگە اكەلگەن الەمدەگى ەڭ جاس كاسىبي كومپوزيتور راحات-بي ابدىساعين ەسىمىمەن قازاق ەلى مەملەكەت باسشىسى نۇرسۇلتان نازارباەۆتىڭ «رۋحاني جاڭعىرۋ» باعدارلاماسى اياسىندا جۇزەگە اسقان «قازاقتىڭ 100 جاڭا ەسىمى» جوباسى بارىسىندا ەتەنە تانىستى. جوبا جەڭىمپازدارىن قۇتتىقتاۋعا ارنالعان سالتاناتتى جيىندا ەلباسى جاس دارىننىڭ تەڭدەسسىز شىعارماشىلىق قابىلەتىنە ءتانتى بولىپ, ءورىمتال تالانت ونەرىن ايگىلى موتسارت شىعارمالارىمەن تەڭ قويا تاڭدانعانىن سول ساتكە كۋا بولعاندار ءالى ۇمىتا قويعان جوق.
ءيا جاھان نازارىن وزىنە اۋدارتقان ونەر يەسىنىڭ شەكسىز تالانتى بۇگىندە شارتاراپقا تانىلىپ, تۋىندىلارى الەمنىڭ ايتۋلى ساحنالارىن مويىنداتىپ ۇلگەردى. ءالى 20-عا دا تولماعان مۋزىكانت بۇگىنگە دەيىن سيمفونيالىق وركەسترگە جانە ءار جانرداعى كامەرالىق انسامبلدەرگە ارنالعان 100-دەن اسا كلاسسيكالىق مۋزىكالىق تۋىندىنىڭ اۆتورى.
ال كينو الەمىندە 2018 جىلدىڭ ۇزدىگى اتانعان سامال ەسلياموۆانىڭ ورنى ايرىقشا. مامىر ايىندا فرانتسيانىڭ كانن قالاسىنان جەتكەن «سامال – ۇزدىك اكتريسا» دەگەن اقجولتاي حابار تورتكۇل دۇنيە نازارىن قازاق ەلىنە بۇرعىزسا, اراعا از ۋاقىت سالىپ تۇركيانىڭ انتاليا قالاسىندا وتكەن 55-ءشى حالىقارالىق كينوفەستيۆالى دە رەجيسسەر سەرگەي دۆورتسەۆويدىڭ «ايكا» فيلمىندەگى ءرولى ءۇشىن تالانتتى اكتريسانى ۇزدىك دەپ تانىدى.
سونىمەن قاتار قازاق ونەرىنىڭ عانا ەمەس, ەسىمىن دۇنيە ءجۇزى تانىعان كلاسسيكالىق مۋزىكا مايتالمانىنا اينالعان الان بورىباەۆتىڭ ديريجەر تۇعىرىنداعى تابىستى ىزدەنىسى دە بۇگىندە جەر جاھاندى تاڭعالدىرا تاڭداي قاققىزىپ كەلەدى. 2003-2007 جىلدارى استانا مەملەكەتتىك فيلارمونياسى سيمفونيالىق وركەسترىنىڭ باس ديريجەرى, 2004-2007 ماينينگەننىڭ (گەرمانيا) باس مۋزىكا ديرەكتورى, 2007 جىلى نوررچيوپينگ سيمفونيالىق وركەسترىن (شۆەتسيا), 2007 جىلى نيدەرلاندتىق برابانت وركەسترىن, ال 2009 جىلدان باستاپ يرلانديانىڭ ۇلتتىق سيمفونيالىق وركەسترىن باسقارعان الان بورىباەۆ قازىرگى تاڭدا «استانا وپەرا» مەملەكەتتىك وپەرا جانە بالەت تەاترىنىڭ باس ديريجەرى قىزمەتىندە. ايگىلى ماەسترونىڭ شىعارماشىلىق قيالىنا قانات بىتىرگەن ل.حاميدي مەن ا.جۇبانوۆتىڭ ايگىلى «اباي» وپەراسى جاڭا زامان تىلىندە كورەرمەنگە جول تارتقان بولاتىن. الەمگە قازاق ۇلتتىق وپەرا ونەرىن ايگىلەپ جۇرگەن ايتۋلى تۋىندى بيىل مەملەكەتتىك سىيلىقتىڭ لاۋرەاتى اتاندى.
سول سەكىلدى بۇگىندە وپەرا ونەرىنىڭ الەم مويىنداعان جارىق جۇلدىزىنا اينالعان سۇندەت بايعوجين, 27 جاسىندا ەلىمىزدىڭ باس وركەسترى – 85 جىلدىق تاريحى بار قۇرمانعازى اتىنداعى قازاق مەملەكەتتىك اكادەميالىق ۇلت اسپاپتار وركەسترىنىڭ باس ديريجەرى قىزمەتىنە تاعايىندالىپ, جاقىندا عانا قۇرمانعازى اتىنداعى قازاق ۇلتتىق كونسەرۆاتورياسىنىڭ رەكتورى قىزمەتىنە كىرىسكەن ارمان جۇدەباەۆ سىندى جالىندى جاستاردىڭ ءوز سالاسىنىڭ كاسىبي بىلىكتى مامانى اتانىپ قانا قويماي, ونەر الەمىندە جاھان تاڭدانا قارايتىن جاڭالىق تۋدىرۋعا دەگەن ۇمتىلىسى مەن جەڭىسى قاي كەزدە دە ۇلتىمىزدىڭ ماقتانىشى ءھام ابىرويى.
بۇل دا بولسا قاسيەتتى تاۋەلسىزدىگىمىز تۋدىرعان تالانتتى جاستاردىڭ شىعارماشىلىعىنا قانات بايلاپ, ۇنەمى شابىتقا بولەپ كەلە جاتقان ەڭسەلى ەلدىگىمىز ەكەنى ءسوزسىز.
نازەركە جۇماباي,
«ەگەمەن قازاقستان»
